ដោយ៖ ឡាយ សាមាន | ថ្ងៃអាទិត្យ ទី19 កក្កដា 2015, 03:57 PM
http://vodhotnews.com
ប្រធានសហជីពសេរីកម្មករកម្ពុជាលោក ជា មុន្នី ប្រកាសលាឈប់ពីប្រធានសហីព ដោយអះអាងថា ទៅធ្វើការងារផ្សេងទៀតដែលជាកិច្ចការជួយសង្គម និងការពារធនធានធម្មជាតិដែលនៅសេសសល់ ។
ការប្រកាសនេះ ធ្វើឡើងក្នុងកិច្ចប្រជុំប្រចាំត្រីមាស នៅទីស្នាក់ការសហជីពសេរីកម្មករកម្ពុជា នាព្រឹកថ្ងៃទី១៩ ខែ កក្កដានេះ ដែលមានសមាជិក និងកម្មករចូលរួមប្រមាណ ១០០នាក់ ។
ប្រធានសហជីពសេរីកម្មករកម្ពុជាលោក ជា មុន្នី ប្រាប់ VOD បន្ថែមថា នៅពេលសមាជខាងមុខនេះ លោកនឹងឈប់ឈរឈ្មោះធ្វើជាបេក្ខភាពប្រធានសហជីពសេរីកម្មករកម្ពុជាទៀតហើយ ។ លោកបន្តថា ការលាឈប់ពីប្រធានសហជីពនេះ ដោយសារលោកចង់ធ្វើការងារផ្សេងទៀត ដែលជាផលប្រយោជន៍សង្គម រួមមាន ការតស៊ូមតិ និងការពារធនធានធម្មជាតិជាដើម ។ យ៉ាងណាក៏ដោយលោក ស្នើឲ្យសហជីព និងសមាជិករបស់ខ្លួនរួមគ្នាបន្តសកម្មភាពការពារសិទ្ធិកម្មករ កុំឲ្យមានការរំលោភបំពានពីសំណាក់ថៅកែរោងចក្រមួយចំនួន ។ លោកមិនទាន់កំណត់ថ្ងៃធ្វើសមាជខាងមុខនោះទេ ដោយកំពុងរៃអង្គាសថវិកា ដើម្បីទ្រទ្រង់ការធ្វើសមាជនោះ ។
បើតាមលោក ជា មុន្នី លក្ខន្តិកក្នុងសហជីពរបស់លោកបេក្ខជនអាចឈរឈ្មោះបាន ២ អាណត្តិ ហើយក្នុងមួយអាណត្តិមានរយៈពេល ២ឆ្នាំ ។ លោក ជា មុន្នី ឲ្យដឹងបន្តថា បច្ចុប្បន្នកម្មករដែលជាសមាជិករបស់ខ្លួនមានចំនួន ១០ ម៉ឺននាក់ និងសហជីពមានចំនួន ២៨០ នាក់នៅទូទាំងប្រទេស ៕
សូមសរសេរមកលោក ឡាយ សាមាន តាមរយៈ samean@vodhotnwes.com
Well done! Chea Mony , for any right reason life goes on.
Samneang