ដោយ៖ យ៉ា រសាត់ និងឡាយ សាមាន | ថ្ងៃអង្គារ ទី21 កក្កដា 2015, 06:10 PM
http://vodhotnews.com
លោក មាជ សុវណ្ណារ៉ា និងសកម្មជនបក្សសង្គ្រោះជាតិផ្សេងទៀតចេញពីតុលាការនាពេលកន្លងមក (រូបភាព៖ ទេព សូនី)
សាលាដំបូងរាជធានីភ្នំពេញផ្ដន្ទាទោសលោក មាជ សុវណ្ណារ៉ា និងសកម្មជនគណបក្សសង្គ្រោះជាតិ១០នាក់ផ្សេងទៀតឲ្យជាប់ពន្ធនាគារពី៧ឆ្នាំទៅ២០ឆ្នាំ ពីបទដឹកនាំនិងចូលរួមក្នុងចលនាកុប្បកម្មនាំឲ្យមានហិង្សានៅក្បែរទីលានប្រជាធិបតេយ្យកាលពីឆ្នាំ២០១៤។
បន្ទាប់ពីបានបើកសវនាការអស់ពេញមួយថ្ងៃនៅថ្ងៃនេះ ចៅក្រមនៃសាលាដំបូងរាជធានីភ្នំពេញបានអានសាលក្រមសម្រេចផ្ដន្ទាទោសលោក មាជ សុវណ្ណារ៉ា លោក អឿ ណារិទ្ធិ និងលោក ឃិន ជំរឿន ឲ្យជាប់ពន្ធនាគារម្នាក់២០ឆ្នាំ ពីបទដឹកនាំកុបកម្ម ចំណែកសកម្មជន៨នាក់ផ្សេងទៀតត្រូវជាប់ទោសម្នាក់៧ឆ្នាំពីបទចូលរួមក្នុងចលនាកុប្បកម្មនាំឲ្យមានហិង្សនៅក្បែរទីលានប្រជាធិបតេយ្យកាលពីថ្ងៃទី១៥ ខែកក្កដា ឆ្នាំ២០១៤។
តុលាការក៏បានសម្រេចឲ្យសកម្មជនទាំង១១នាក់ត្រូវរួមគ្នាផ្ដល់ប្រាក់សំណងរដ្ឋវប្បវេណីទៅដើមបណ្ដឹងជាសន្តិសុខខណ្ឌដូនពេញចំនួន៣៩នាក់ចាប់ពី៨លានរៀល ដល់២០លានរៀលផងដែរ។ សកម្មជនទាំង១១នាក់ត្រូវបានបញ្ជូនខ្លួនទៅពន្ធនាគារព្រៃសបន្ទាប់ពីសវនាការ។
នៅក្នុងសវនាការនាថ្ងៃនេះ មានតែមេធាវីម្នាក់ក្នុងចំណោមមេធាវី៩នាក់ដែលការពារក្ដីឲ្យជនជាប់ចោទទាំង១១នាក់ប៉ុណ្ណោះដែលមានវត្តមាន ដោយមេធាវី៨នាក់ផ្សេងទៀតត្រូវគេរាយការណ៍ថាបានធ្វើពហិការមិនចូលរួមសវនាការ។
អ្នកស្រី សន ស៊ូដាឡែន មេធាវីការពារក្ដីដែលបានចូលរួមសវនាការនៅថ្ងៃនេះបដិសេធមិនធ្វើអត្ថាធិប្បាយលើសេចក្ដីសម្រេចរបស់តុលាការ ដោយអះអាងថា កំពុងធ្វើការលើរឿងនេះ និងឲ្យទាក់ទងទៅពេលក្រោយ។
ភ្លាមៗក្រោយពីសេចក្ដីសម្រេចរបស់តុលាការ អង្គការលីកាដូបានចេញសេចក្ដីថ្លែងការណ៍មួយដោយបានធ្វើការថ្កោលទោសសាលក្រមរបស់តុលាការ និងអំពាវនាវឲ្យតុលាការទម្លាក់ចោលសាលក្រម ដែលផ្ដន្ទាទោសសកម្មជនទាំង១១នាក់ ដោយអះអាងថា ដោយផ្អែកទៅលើភាពមិនប្រក្រតីនៃការជំនុំជម្រះ និងអង្គហេតុនៃសំណុំរឿងនេះ។ លីកាដូក៏បានអំពាវនាវកុំឲ្យមានការប្រើប្រាស់តុលាការជាឧបករណ៍នយោបាយផងដែរ។
វីអូឌី (VOD) មិនទាន់អាចសុំការអត្ថាធិប្បាយពីមេដឹកនាំគណបក្សសង្គ្រោះជាតិលោក សម រង្ស៊ី និងលោក កឹម សុខា ព្រមទាំងមន្ត្រីជាន់ខ្ពស់របស់គណបក្សនេះបាននៅឡើយទេ ដោយទូរស័ព្ទមិនចូល ឬទូរស័ព្ទចូលតែពុំមានអ្នកទទួល។
ទាក់ទងនឹងការផ្ដន្ទាទោសរបស់តុលាការនេះដែរ សាស្រាចារ្យនយោបាយ សូ ចន្ថា យល់ថា ការដែលតុលាការធ្វើការចោទប្រកាន់ និងផ្តន្ទាទោសសកម្មជន និងមន្ត្រីបក្សប្រឆាំងទាំង១១នាក់នោះ ហាក់បីដូចជារឿងអយុត្តិធម៌មួយ និងគ្មានការវាយតម្លៃច្បាស់លាស់។ បែបនេះក្តី លោកមើលឃើញថា មូលហេតុចម្បងដែលតុលាការផ្តន្ទាទោសនោះ គឺជាការដាក់សម្ពាធដល់បក្សប្រឆាំង ករណីសើរើរឿងព្រំដែន។
គួរបញ្ជាក់ថា ក្រោយហិង្សាក្បែរទីលានប្រជាធិបតេយ្យកាលពីឆ្នាំ២០១៤ លោក មាជ សុវណ្ណារ៉ា និងសកម្មជនគណបក្សសង្គ្រោះជាតិមួយចំនួនទៀតត្រូវបានអាជ្ញាធរចាប់ខ្លួន។ នៅថ្ងៃទី១៣ ខែមេសា ឆ្នាំ២០១៥ មុនចូលឆ្នាំខ្មែរ លោក មាជ សុវណ្ណារ៉ា និងសកម្មជនគណបក្សសង្គ្រោះជាតិទាំងនោះត្រូវបានដោះលែងឲ្យនៅក្រៅឃុំបណ្តោះអាសន្ន បន្ទាប់ពីលោកនាយករដ្ឋមន្ត្រី ហ៊ុន សែន និងប្រធានគណបក្សសង្គ្រោះជាតិលោក សម រង្ស៊ី បានជួបចរចាគ្នានៅពេលដែលគណៈកម្មាធិការជាតិរៀបចំការបោះឆ្នោតលេចចេញជារូបរាង៕
សូមសរសេរមកលោក យ៉ា រសាត់ តាមរយៈ rorsart@vodhotnews.com
តុលាការផ្តន្ទាទោសសកម្មជនគណបក្សសង្គ្រោះជាតិទាំង១១នាក់ជាប់ទោសពី៧ទៅ២០ឆ្នាំ (វីដេអូ)
ដោយ៖ ឧស្សាហ៍ | ថ្ងៃអង្គារ ទី21 កក្កដា 2015, 05:17 PM
http://vodhotnews.com
តុលាការផ្តន្ទាទោសសកម្មជនគណបក្សសង្គ្រោះជាតិទាំង១១នាក់ជាប់ទោសពី៧ទៅ២០ឆ្នាំ
ចាប់អោយអស់ទៅលោកម្ចាស់ ច្បាប់នៅនឹងមាត់លោកម្ចាស់ហើយ ចាប់ទៅលោកម្ចាស់
ព្រោះអាណត្តិក្រោយលោកម្ចាស់មិនដឹងជាយ៉ាងមេចយ៉ាងម៉ាទេ