ដោយ៖ ញឹម សុខន | ថ្ងៃអង្គារ ទី21 កក្កដា 2015, 04:28 PM
http://vodhotnews.com
ស្តាប់សំឡេង៖ |
ចម្លងទុក |
ទិដ្ឋភាពប្រជាពលរដ្ឋ និងតំណាងរាស្ត្រ ទៅពិនិត្យបង្គោលព្រំដែនលេខ២០៣ កាលពីថ្ងៃអាទិត្យសប្តាហ៍មុន (រូបថត៖ ណាត សុភាព)
អាជ្ញាធរខេត្តស្វាយរៀង បានចោទប្រកាន់ថា អ្នកចុះពិនិត្យព្រំដែនដែលដឹកនាំដោយតំណាងរាស្ត្រគណបក្សប្រឆាំង ថាបានបង្កប់ទៅជាមួយនូវឧបករណ៍គ្រោះថ្នាក់ ហើយអាជ្ញាធរខេត្តជាប់ព្រំដែនមួយនេះ ចោទថាជាដើមចមបង្កជម្លោះ ដើម្បីកេងចំណេញនយោបាយ។
សេចក្តីប្រកាសព័ត៌មាន របស់សាលាខេត្តស្វាយរៀង ចុះថ្ងៃទី២០ ខែកក្កដា ឆ្នាំ២០១៥ បានចោទថា ក្រុមអ្នកចុះទៅពិនិត្យព្រំដែននោះ សមត្ថកិច្ចបានរកឃើញបង្កប់នូវឧបករណ៍គ្រោះថ្នាក់មួយចំនួន ដូចជាកាំំបិត ពូថៅ ធ្វើដំណើរគ្មានសណ្តាប់ធ្នាប់ បង្កឲ្យកកស្ទះចរាចរណ៍ និងបង្កភាពភ័យខ្លាច ដល់អ្នកភូមិ ដែលក្បួនដង្ហែបានឆ្លងកាត់ជាដើម។
អ្នកនាំពាក្យសាលាខេត្តស្វាយរៀង ប្រកាសថា ខ្លួនមិនគាំទ្ររាល់សកម្មភាពនៃផលប៉ះពាល់ទាំងនេះ និងបានចាត់ទុកថាទង្វើនោះ ជាការញុះញង់ បង្កើតឲ្យមានស្មារតីជាតិនិយមជ្រុល ដើម្បីកេងចំណេញនយោបាយ មិនគិតពីគ្រោះមហន្តរាយដ៏ធ្ងន់ធ្ងរ ដល់សង្គមជាតិ និងបានចាត់ទុកទង្វើនោះថា បានដើរផ្ទុយពីឆន្ទៈរបស់រាជរដ្ឋាភិបាល ក្នុងការការពារបូរណភាពទឹកដីតាមរដ្ឋធម្មនុញ្ញ។
ប៉ុន្តែតំណាងរាស្ត្រគណបក្សសង្គ្រោះជាតិ លោក រៀល ខេមរិន្ទ្រ បានច្រានចោលកាចោទប្រកាន់នេះ ដោយលោកអះអាង អ្វីដែលអាជ្ញាធររកឃើញនោះគឺជាភស្តុតាងដែលគេរៀបចំខ្លួន ដើម្បីទម្លាក់កំហុស ដាក់គណបក្សប្រឆាំង។ លោកថាល្បិចបែបនេះអាជ្ញាធររដ្ឋាភិបាលធ្លាប់ធ្វើឡើងដដែលៗ។ ចំណែកបញ្ហាព្រំដែន លោកថា រដ្ឋាភិបាលខ្លួនឯងក៏បានទទួលស្គាល់ថា វៀតណាមពិតជារំលោភបូរណភាពទឹកដីខ្មែរមែន។ លោកថា៖ “អ្នកដែលមានកាំបិត មានពូថៅនោះជាក្រុមរបស់គេទេ ហើយខ្ញុំក៏ចាប់បានក្រុមហ្នឹង មានទាំងញញួរ មានពន្លៀក មានដំបង ខ្ញុំបានថតទាំងវីដេអូទៀត។ នេះគឺជាក្រុមតែមួយ នៅពេលដែលខ្ញុំចាប់បាន វានាំគ្នារត់ វារត់ចោលទាំងម៉ូតូទៀត” ។
អធិការនគរបាលស្រុកកំពង់រោទិ៍ លោក ហែម សាមុត អះអាងថា ក្រុមការងារលោកពិតជាដកបានកាំបិតមួយពីក្រុមអ្នកហែក្បួនចុះពិនិត្យព្រំដែន ប៉ុន្តែលោកថា សមត្ថកិច្ចមិនបានដឹងឈ្មោះ ឬឃាត់ខ្លួនបុគ្គលដែលរងការចោទថា បានកាន់កាំបិទនោះទេ។
ពលរដ្ឋមួយរូបនៅក្នុងឃុំត្នោត ស្រុកកំពង់រោទិ៍ លោក សំ គ្រី អះអាងថា អ្នកភូមិមានសេចក្តីរីករាយ ពេលឃើញព្រះសង្ឃ និងពលរដ្ឋច្រើនរយនាក់ ចុះពិនិត្យព្រំដែននេះ។ លោកថាតាមរយៈការចុះពិនិត្យនេះ ធ្វើឲ្យអ្នកភូមិខ្មែរមានសង្ឃឹមឡើងវិញ ថាបានធ្វើស្រែនៅជាប់ព្រំដែនដូចពីមុន និងទប់ស្កាត់ការគំរាមកំហែងពីអាជ្ញាធរវៀតណាម។ លោកថា៖ "អត់ភ័យទេៗ មានតែជួយអបអរសាទរទៀត" ។
មន្ត្រីសម្របសម្រួលអង្គការលីកាដូប្រចាំ ខេត្តស្វាយរៀង លោក នុត បូព៌ណ្ណរ័ត្ន ដែលតាមដានករណីនេះ អះអាងផ្ទុយពីអាជ្ញាធរខេត្ត ដោយលោកអះអាងថា តាមការអង្កេត ពលរដ្ឋបានចេញមកអបអរសាទរដំណើរមកដល់របស់ក្រុមអ្នកចុះពិនិត្យព្រំដែន។ លោកថាអ្វីដែលលោកបារម្ភនោះ អាជ្ញាធរទេដែលរៀបចំឲ្យកម្លាំងសមត្ថកិច្ចស្លៀកពាក់ស៊ីវិល ដៃកាន់ដំបង អមដោយកម្លាំងទ័ព មានអាវុធស្វ័យប្រវត្តិនៅដៃច្រោងច្រាងទៅវិញទេ។ លោកថា៖ “ការដែលធ្វើដំណើរតាមផ្លូវ ខ្ញុំសង្កេតមើលប្រជាពលរដ្ឋ គាត់លើកដៃគាំទ្រទះដៃ អត់មាននរណាមកភ័យខ្លាចពួកគាត់ផង ហើយខ្ញុំឃើញអ្នកដែលភ័យខ្លាចដែលខ្ញុំសម្លឹងឃើញ គឺសមត្ថកិច្ចហ្នឹងវិញទេ ដែលជាអ្នកភ័យខ្លាច” ។
ទោះជាយ៉ាងណា សេចក្តីប្រកាសព័ត៌មានរបស់សាលាខេត្តស្វាយរៀង បានទទួលស្គាល់ថា ការចុះទៅពិនិត្យព្រំដែននៅថ្ងៃទី១៩ ខែកក្កដានោះ គ្មានផ្ទុះហិង្សានោះទេ។ ប៉ុន្តែសាលាខេត្តនេះបានចាត់ទុកថា ក្រុមអ្នកចុះទៅពិនិត្យបង្គោលព្រំដែន ដែលដឹកនាំដោយតំណាងរាស្ត្រគណបក្សសង្គ្រោះជាតិ លោក រៀល ខេមរិន្ទ្រ នោះមិនបានគោរពតាមស្មារតីនៃកិច្ចប្រជុំមុនពេលចុះទៅដល់៕
សូមសរសេរមកលោក ញឹម សុខន តាមរយៈ sokhorn@vodhotnews.com
ចោទទៅលោកម្ចាស់ ចោទទៅ ចោទអោយច្រើនៗ ចាប់អោយអស់ៗ អាណត្តិក្រោយធ្លាក់ឆ្នោត
លោកម្ចាស់លែងបានចោទ លែងបានចាប់ទៀតហើយ ខំឡើងលោកម្ចាស់
អាជ្ញាធរ សាលាខេត្ត ស្វាយរៀង ឈ្មោះ អី ចេញឈ្មោះមក អោយប្រជាពលរដ្ឋខ្មែរ ស្គាល់ មុខ
បុគ្គលដែលនិយាយ គ្មានការពិត តើ សាលាខេត្តស្វាយរៀង ខួរក្បាល ជាស្អី ជា សត្វ ឬ ?