ដោយ៖ ទូច សុខា | ថ្ងៃពុធ ទី22 កក្កដា 2015, 05:34 PM
http://vodhotnews.com
លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ
មន្រ្តីអង្គភាពប្រឆាំងអំពើពុករលួយនៅថ្ងៃពុធនេះបានស្នើឲ្យអ្នកយកព័ត៌មានដែលបានដឹងពីករណីជនរងគ្រោះចង់សូកប៉ាន់លើបញ្ហាអ្វីមួយ សហការជាមួយអង្គភាព ដើម្បីចូលរួមចំណែកការពារកុំឲ្យជនរងគ្រោះជាប់ទោសពីបទសូកប៉ាន់។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បានថ្លែងបែបនេះក្នុងកម្មវិធីប្រកាសជ័យលាភីការប្រកួតប្រជែងពានរង្វាន់អ្នកសារព័ត៌មានឆ្នើមសម្រាប់អត្ថបទរាយការណ៍ពីអំពើពុករលួយ។ លោកមានប្រសាសន៍ថាអ្នកសារព័ត៌មានបានរាយការណ៍ពីជនរងគ្រោះដែលបានយកប្រាក់ទៅសូកប៉ាន់មន្ត្រីរាជការណាម្នាក់ ដើម្បីឲ្យខ្លួន ឬឲ្យសមាជិកគ្រួសារ ដើម្បីបានរួចខ្លួនពីបញ្ហាអ្វីមួយ។ ប៉ុន្តែលោកថាករណីនេះអាចធ្វើឲ្យជនរងគ្រោះនោះជាប់ទោសបន្ថែមទៀត។
លោក ឱម យ៉ិនទៀង បន្ថែមថានៅពេលណាអ្នកសារព័ត៌មានជួបករណីជនរងគ្រោះផ្តល់សំណូកទៅមន្ត្រីរាជការណាមួយ ពួកគេត្រូវជួយណែនាំជនរងគ្រោះនោះឲ្យស្វែងរកកិច្ចអន្តរាគមន៍ពីអង្គភាពប្រឆាំងអំពើពុករលួយ។ លោកបញ្ជាក់ថាអង្គភាពប្រឆាំងអំពើពុករលួយមានវិធីសាស្រ្តក្នុងការប្រមូលភស្តុតាងពីអ្នកទទួលសំណូក។
លោក ឱម យ៉ិនទៀង បានថ្លែងថា៖ “ពីព្រោះយើងខ្ញុំមានវិធីសាស្រ្តដើម្បីទៅយកភស្តុតាង ឧបមាថាគាត់(មន្ត្រី)ទារ៥០០០(ដុល្លារ)ហើយគាត់ខំទៅរកលក់ដីលក់ស្រែលក់ចម្ការគាត់យកទៅឲ្យ ជាប់គុក ភស្តុតាងលក់ហ្នឹងហើយជាឆន្ទៈគាត់សូកគេ ហើយយើងខំសរសេរអាហ្នឹងថាឲ្យគេអាណិតគាត់ បែរជាយកខ្នោះដាក់ពីមុខផងដាក់ពីក្រោយផង”។
លោកឲ្យដឹងទៀតថាអង្គភាពងាយស្រួលស្វែងរកភស្តុតាងពីអ្នកសូកប៉ាន់ ប៉ុន្តែមិនងាយស្រួលរកពីអ្នកទទួលសំណូកនោះទេ ដោយលោកថាពួកគេមិនដែលនិយាយថាខ្លួនបានទទួលសំណូកនោះទេ។ លោកមានប្រសាសន៍ថា៖ “ហើយចៅក្រម ហើយមេធាវីនោះអត់ជាប់ទេ អូនឯងការពារគាត់រួចអស់ហើយ គាត់ប្រកែកអស់ហើយ មានភស្តុតាងអី អញ្ចឹងបានថាពេលដឹងភ្លាមគាត់មិនចាំបាច់ទៅលក់ដីលក់ស្រែ យើងខ្ញុំមានលុយ២ម៉ឺន ៥ម៉ឺន ១០ម៉ឺនដុល្លារអីយើងខ្ញុំមានលុយឲ្យគាត់ សម្រាប់គាត់យកទៅ ប៉ុន្តែពេលទៅគឺយើងខ្ញុំប្រមូលយកភស្តុតាង ហើយចាំរឿងហ្នឹងចេញហើយចាំអូនសរសេរចុះ អត់មានអីយឺតយ៉ាវទេរឿងហ្នឹង”។
ទោះយ៉ាងណា លោក ឱម យិនទៀង បញ្ជាក់ថាអ្នកផ្តល់សំណូកណាដែលធ្វើឡើងដោយរងការបង្ខំពីមន្ត្រីរាជការណាមួយនោះគឺមិនជាប់ទោសនោះទេ ហើយលោកថាបើមានករណីបែបនេះជនរងគ្រោះត្រូវរាយការណ៍មកអង្គភាពប្រឆាំងអំពើពុករលួយតាមរយៈលេខទូរស័ព្ទទាន់ហេតុការណ៍១២៨២។
នាយកប្រតិបត្តិអង្គការតម្លាភាពកម្ពុជា លោក ព្រាប កុល មានប្រសាសន៍ថាអ្នកផ្តល់សំណូកនិងអ្នកទទួលសំណូកគឺមានការជាប់ពាក់ព័ន្ធគ្នាយ៉ាងជិតស្និទ្ធ។ លោកបន្តថាជាទូទៅគេមើលឃើញថាបើគ្មានអ្នកផ្តល់សំណូក ក៏គ្មានអ្នកទទួលសំណូកដែរ។ ប៉ុន្តែលោកថាបើមើលទៅមួយជ្រុងទៀត ឃើញថាអ្នកផ្តល់ផ្តល់សំណូកទាំងអស់ក៏មិនចង់សូកប៉ាន់ទាំងអស់គ្នាដែរ។ លោកបញ្ជាក់ថាករណីសូកប៉ាន់នេះកើតឡើងដោយសារតែមានការដាក់សម្ពាធឲ្យផ្តល់សំណូក។
លោកមានប្រសាសន៍ថា៖ “អ្នកសូកហ្នឹងមិនមែនគាត់ចេះតែចង់សូកទេ ទាល់តែមានសម្ពាធឬក៏មានការទាមទារបង្ខំឲ្យគាត់សូកបានគាត់សូក…អ្នកដែលគាត់ធ្លាប់បានគេដាក់សម្ពាធឲ្យសូក ហាក់ដូចជាបង្កើតទម្លាប់ឲ្យខ្លួនឯងមួយត្រៀមខ្លួនឲ្យខ្លួនឯងសូក ពេលខ្លះគេមិនទាន់ទារផងឲ្យគេមុនដែរ អាហ្នឹងវាជាទម្លាប់”។
ប្រធានក្លិបអ្នកកាសែតកម្ពុជា លោក ប៉ែន បូណា មានប្រសាសន៍ថាការសរសេរប្រធានបទប្រឆាំងនឹងអំពើពុករលួយនេះ អ្នកសរសេរត្រូវមានជំនាញវិជ្ជាជីវៈខ្ពស់ក្នុងការស៊ើបអង្កេតនិងការសរសេរ។ លោកថាបើសិនជាសរសេរខុសឬអ្នកសរសេរមិនយល់នោះ វានឹងបង្កផលវិបាកដល់អ្នកសរសេរវិញ។ លោកបន្តថា៖ “ខ្ញុំសូមលើកទឹកចិត្តអ្នកសារព័ត៌មានទាំងអស់ចូលរួមសរសេរអត្ថបទទាក់ទងនឹងអំពើពុករលួយហ្នឹងឲ្យបានច្រើន ព្រោះយើងបានដឹងហើយថាអំពើពុករលួយហ្នឹងជាសង្គមមួយជំងឺរ៉ាំរ៉ៃមួយក្នុងសង្គមកយើង ក៏ដូចជាប្រទេសជាច្រើនលើពិភពលោកដែរ ប៉ុន្តែសង្គមយើងមានអំពើពុករលួយគួរឲ្យកត់សម្គាល់ អញ្ចឹងទេខ្ញុំលើកទឹកចិត្ត ប៉ុន្តែធ្វើយ៉ាងម៉េចយើងសរសេរដោយគោរពក្រមសីលធម៌វិជ្ជាជីវៈនិងយល់ឲ្យច្បាស់អំពីអំពើពុករលួយ ដើម្បីធ្វើឲ្យអត្ថបទយើងហ្នឹងមានតម្លៃ”។
បើតាមលោក ឱម យ៉ិនទៀង តាំងពីមានការបង្កើតអង្គភាពនេះមក មិនទាន់មានអ្នកផ្តល់សំណូកណាមួយជាប់ទោសនៅឡើយទេ ដោយលោកថាអង្គភាពនៅបន្តធ្វើការអប់រំប្រជាពលរដ្ឋឲ្យយល់ដឹងពីច្បាប់នេះនៅឡើយ។
ច្បាប់ព្រហ្មទណ្ឌថ្មី មាត្រា២៧៩ទាក់ទងបទសូកប៉ាន់ដល់និយោជិតចែងថាបុគ្គលណាដែលផ្តល់ជាអត្ថប្រយោជន៍ឬអំណោយដល់និយោជិត ដើម្បីធ្វើកិច្ចការអ្វីមួយឲ្យខ្លួន ដោយមិនបានឲ្យនិយោជកបានដឹង បុគ្គលនោះនឹងត្រូវផ្តន្ទាទោសដាក់ពន្ធនាគារពី៦ខែទៅ២ឆ្នាំនិងពិន័យជាប្រាក់ពី១លានរៀលទៅ៤លានរៀល។ មាត្រា២៨០ទាក់ទងបទស៊ីសំណូករបស់អភិបាលជាអាទិ៍ ចែងថា “…បុគ្គលដែលទទួលផលប្រយោជន៍ជាទ្រព្យសម្បត្តិ ឬការទាមទារ ឬបានសន្យាទទួលផលប្រយោជន៍នោះ ដោយបានទទួលការពឹងពាក់ខុសច្បាប់ បុគ្គលនោះត្រូវផ្តន្ទាទោសដាក់ពន្ធនាគារពី៥ឆ្នាំ ទៅ១០ឆ្នាំ”៕
សូមសរសេរមកកាន់លោក ទូច សុខា តាមរយៈ sokha@vodhotnews.com
That’s is a good step Mr.Om to acknowledge a collaboration from other sources such as media.
It should have been police /ministry of interior working closely with eradicating corruption. Now, you request the media to work for you. It means that there will be ramifications to codes of conduct and personal safety.
It should have been said that you allow the media to explore more into matter,and how to keep your organization informed.
Please stop seeing those victims of corruption as all bad guys. Many circumstances those only try to buy their way out. The top official who corrupts is to be scrutinized.
Corruption is systematic. Every department is to curb CORRUPTION primarily.
External expert may be sourced say from Hong Kong or China while China has been in the progress of clearing up Corruption. Other, it would be from Western country where it has more capacity of doing so.
With narrow minded, corruption will never get better.
Bear in mind that victims are the worst end of corruption.
Samneang