សោភ័ណ្ឌឡារី នាំក្រុមយុវជនចុះមើលបង្គោលព្រំដែន។ ហ្វេសប៊ុក ឡារី
Wed, 22 July 2015
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: វិវាទបញ្ហាបង្គោលព្រំដែនកម្ពុជាវៀតណាម កំពុងក្លាយជាព្រិត្តិការណ៍ក្តៅក្នុងបរិបទនយោបាយនៅកម្ពុជា។
ភាពសស្រោកសស្រាំពីក្រុមយុវជនចលនាបក្សសង្គ្រោះជាតិក៏បានបង្ហាញសកម្មភាពពុះកញ្ជ្រោលផងដែរ។ ប៉ុន្តែអ្វីដែលកាន់តែភ្ញាក់ផ្អើលតារាសម្តែង សោភ័ណ្ឌ ឡារី បានក្លាយជាមនុស្សម្នាក់សំខាន់ក្នុងចលនាសូម្បីជំនួបអង្គប្រជុំជាមួយថ្នាក់ខេត្ត ក៏តារារូបនេះមានវត្តមានជួសតំណាងរាស្ដ្របក្សសង្គ្រោះជាតិដែរ។
ទង្វើនេះនាំឲ្យមជ្ឈដ្ឋាននានាចោទសួរថា តើ សោភ័ណ្ឌ ឡារី ពេលនេះមានឋានៈអ្វីក្នុងបក្សសង្គ្រោះជាតិ?
កាលពីថ្ងៃទី ១៥ ខែកក្កដា ក្នុងកិច្ចប្រជុំជាមួយអាជ្ញាធរខេត្តស្វាយរៀង ដែលស្នើដោយលោក រៀល ខេមរិន្ទ្រ តំណាងរាស្រ្តបក្សសង្គ្រោះជាតិ ដើម្បីចុះមើល និងពិនិត្យបង្គោលព្រំដែនកម្ពុជាវៀតណាម លេខ ២០២ និង ២០៣ នៅក្នុងភូមិធ្លក ឃុំត្នោត ស្រុកកំពង់រោទ៍ ខេត្តស្វាយរៀង។
វត្តមានតារាសម្តែងមានកំណើតនៅទឹកដីខេត្តព្រៃវែង លោក សោភ័ណ្ឌ ឡារី ដឹកនាំអង្គប្រជុំធំមួយ តំណាងឲ្យលោក រៀល ខេមរិន្ទ្រ ទៅវិញ។ ដូចគ្នានោះ ក្នុងដំណើរចុះពិនិត្យបង្គោលព្រំដែនថ្ងៃទី ១៩ ខែកក្កដា វត្តមានលោក សោភ័ណ្ឌ ឡារី ក៏បានក្លាយជាមនុស្សសំខាន់នាំមុខផងដែរ។
បកស្រាយចម្ងល់មហាជនតាមរយៈភ្នំពេញប៉ុស្តិ៍ តារាសម្តែងឃ្លាតឆ្ងាយទីផ្សារសិល្បៈដោយសារការចូលប្រឡូកនយោបាយប្រឆាំងនឹងរដ្ឋាភិបាល លោក សោភ័ណ្ឌ ឡារីផ្តើមដោយសម្ដីលាន់មាត់ថា៖ «គ្មានអ្វីភ្ញាក់ផ្អើលទេបង។ ខ្ញុំគ្មានឋានៈអ្វីក្នុងបក្សសង្គ្រោះជាតិទេ។ ខ្ញុំនៅតែជាតារាសិល្បៈធម្មតាហ្នឹង»។
សោភ័ណ្ឌឡារី នាំក្រុមយុវជនចុះមើលបង្គោលព្រំដែន។ ហ្វេសប៊ុក ឡារី
ឡារីថា៖ «ខ្ញុំគ្រាន់តែជាមនុស្សសាមញ្ញម្នាក់ដែលធ្វើការជាមួយក្រុមយុវជនបក្សសង្គ្រោះជាតិ នៅមណ្ឌលខេត្តកំពង់ចាម។ មិនមានតួនាទី ឬក៏ឋានៈអីនៅក្នុងបក្សឡើយ»។
តារាសម្តែងដែលមានឈ្មោះដើម សោភ័ណ្ឌ រិទ្ធី និងធ្លាប់ហែលឆ្លងជីវិតកម្សត់ៗជាច្រើនអន្លើសូម្បីតែសុំទានក៏ធ្លាប់ជួបនោះ និងងាកមកភ្ជាប់ខ្លួននឹងឆាកនយោបាយក្រោយមានឈ្មោះល្បីគួរសមលើវិថីសិល្បៈរូបនេះ បានបញ្ជាក់ថា៖ «អ្វីដែលខ្ញុំធ្វើក្នុងជំនួបចរចាជាមួយនឹងអាជ្ញាធរស្វាយរៀង តំណាងឲ្យឯកឧត្តម រៀល ខេមរិន្ទ្រនោះ ខ្ញុំមិនមានឋានៈខ្ពង់ខ្ពស់ជួសមុខអ្នកតំណាងរាស្រ្តទេ។ តែពេលនេះដោយសារខ្ញុំជាអ្នកដឹកនាំក្រុមយុវជនទៅពិនិត្យបង្គោលព្រំដែន ចាំបាច់ត្រូវមានខ្ញុំចូលប្រជុំ»។
តារាសម្តែងរូបសង្ហា សោភ័ណ្ឌ ឡារី បានដឹកដៃនារីជំនួញវ័យក្មេង ទើបបញ្ចប់ការសិក្សានៅអូស្រ្តាលី ឈ្មោះ ណង ចាន់រ៉ុង ចូលរោងការកាលពីថ្ងៃទី ១៧ ខែមេសា ឆ្នាំ ២០១៥ ដែលភ្ញៀវចូលរួមភាគច្រើនជាមន្រ្តីធំៗមកពីបក្សសង្គ្រោះជាតិ។ មហាជនកាន់តែចង់ដឹងពីជីវិតប្រឡូកក្នុងឆាកនយោបាយក្រោយជីវិតអាពាហ៍ពិពាហ៍។
ឡារី ប្រាប់ថា៖ «គ្មានអ្វីខុសប្លែកទេ ប្រពន្ធខ្ញុំគាត់ដឹងថា ខ្ញុំជាមនុស្សបែបណា ហើយគាត់ជាមនុស្សមិនចូលចិត្តភាពអយុត្តិធម៌សង្គមនេះដែរ។ ប៉ុន្តែគាត់ក៏បារម្ភពីសុវតិ្ថភាពប្តីដែរសព្វថ្ងៃ»។
ដោយទម្លាយពីក្តីបារម្ភចំពោះវត្តមានប្តីចូលជ្រៅក្នុងឆាកនយោបាយ ប្រឆាំងនឹងរដ្ឋាភិបាលលោក ឡារី បញ្ជាក់ថា៖ «អ្វីដែលខ្ញុំធ្វើសព្វថ្ងៃនេះ គ្រាន់តែក្នុងនាមជាកូនខ្មែរ និងជាយុវជនស្នេហាជាតិមួយរូបប៉ុណ្ណោះ។ ខ្ញុំគ្មានប្រាថ្នាចង់ធ្វើជាអ្នកធំអីទេ សូមឲ្យតែបងប្អូនបានសុខ ប្រទេសជាតិគង់វង្ស ប៉ុណ្ណឹងបានហើយ»៕
ថ្ងៃណារៀបអាពាហ៍ពិពាហ៍?
សប្បាយណាស់ បានរៀបការជាមួយកូនអ្នកមានទ្រព្យសម្បត្តិ ដើម្បីមានឡានជិះ និងយកលុយ ធ្វើនយោបាយបោកប្រាសរាស្ត្រ ឲ្យបានតំណាងរាស្ត្រ។
អានេះគេហៅជាស្អីទៅវិញ?
ដឹងដែរ ដឹងថា ដើម្បីធ្វការអីបានសម្រេច គេត្រូវការលុយ។
ថាមិនត្រូវការបុណ្យសក្តិ ទេ។ យើងចាំតែមើលទេ ព្រោះយើងមិនទាន់ស្លាប់ទេ ណា។
ជឿបងទៅអាប្អូន គ្មាននរណាម្នាក់មិនស្រឡាញលុយ មិនស្រឡាញ់បុណ្យសក្តិ ទេ។ បើថាមិនត្រូវការនោះ គឺច្រឡំហើយ។ សុំកុំដើរបោកប្រាសរាស្ត្រ ណា៎អាប្អូន។
មនុស្សណា បើកាលណាធ្វើអ្វីមួយហើយ គឺតែងតែចង់បានផល។ បើយ៉ាងហោច ក៏ឲ្យគេសរសើរដែរ។
តែកុំភ្លេចពាក្ដែលឯងនិយាយពីថ្ងៃមុនថា ឪពុកក្មេករបស់ឯងត្រៀមខ្លួនជួយកូនឲ្បានឡើងតំណាងរាស្ត្រ។
ប្យ័ត្នបន្តិច ប្រយ័ត្នតែរាល់ការចង់បានរបស់ឯង ក្លាយជាអំពើបំផ្លាញផលប្រយោជន៍របស់ឪក្មេកឯង។ ត្រូវមើលផងថា ឪក្មេកឯងនេះ មានទ្រព្យដោយសារអី។
គិតថា ឪក្មេកឯងកំពុងសង្ឃឹមលើឯងថា នឹងអាចជួយរកផល ឬក៏អាចជួយការពារផលប្រយោជន៍នៃមុខរបររបស់គាត់ ហើយ។
កុំធ្វើឲ្យគាត់ខកចិត្ត!
ផ្តាំតែមួយម៉ាត់ថា បើប្រឹងប៉ុណ្ណេះហើយ សុំកុំនិយាយថា មិនចង់បានបុណ្យសក្តិ !
វាមិនដែលនណាម្នាក់ធ្វើការអោយគេទទេៗបើមិនចង់បានផលប្រយោជនោៈ,
ទោះជាកើតធំដោយសារជួយប្រជារាស្រ្តបានសុខក៏វាប្រសើរជាងកើតធំដោយសារធ្វើអោយរាស្រ្តវេទនាខ្ញុំគាំទ្របង ឡារី រហូត។។