ដោយ៖ យ៉ា រសាត់ | ថ្ងៃព្រហស្បតិ៍ ទី23 កក្កដា 2015
http://vodhotnews.com
យុវជនស្លៀកពាក់ឯកសណ្ឋានអ្នកទោស ដើម្បីតវ៉ាប្រឆាំងនឹងច្បាប់អង្គការ (រូបថតដោយក្រុមយុវជនមកពីសម្ព័ន្ធនិស្សិតបញ្ញាវ័ន្ដខ្មែរ)
ក្រុមយុវជនមកពីសម្ព័ន្ធនិស្សិតបញ្ញាវ័ន្ដខ្មែរ រួមនឹងយុវជនមកពីសមាគមផ្សេងទៀតមួយចំនួនគ្រោងនឹងតវ៉ានៅខាងមុខរដ្ឋសភានៅចុងសប្តាហ៍នេះប្រឆាំងនឹងច្បាប់អង្គការ ដោយពួកគេនឹងស្លៀកពាក់ឯកសណ្ឋានជាអ្នកទោស ភ្ជាប់ជាមួយច្រវ៉ាក់នៅលើដងខ្លួន។
ប្រធានក្រុមយុវជនសម្ព័ន្ធនិស្សិតបញ្ញាវ័ន្ដខ្មែរ លោក មួង សូនី បានប្រាប់វីអូឌី(VOD)ថានៅថ្ងៃអាទិត្យ ទី២៦ ខែកក្កដាខាងមុខនេះ យុវជនជិត១០០នាក់មកពីសមាគមប្រមាណ១០ផ្សេងគ្នានឹងប្រមូលផ្ដុំខាងមុខរដ្ឋសភា ដើម្បីតវ៉ាសុំឲ្យរដ្ឋាភិបាលកែប្រែមាត្រាមួយចំនួននៃច្បាប់ស្តីពីសមាគមនិងអង្គការក្រៅរដ្ឋាភិបាល។ លោកយល់ថាច្បាប់នេះនឹងបំបិទសិទ្ធិសេរីភាពពលរដ្ឋខ្មែរ។ លោកបន្ដថាក្នុងការតវ៉ានៅខាងមុខរដ្ឋសភា យុវជនប្រហែល២០នាក់នឹងស្លៀកពាក់ឯកសណ្ឋានអ្នកទោសរួមនឹងមានដាក់ច្រវ៉ាក់នៅតាមដងខ្លួនផងដែរ ដើម្បីបង្ហាញទៅកាន់រដ្ឋាភិបាលនិងប្រជាពលរដ្ឋទូទៅថានៅពេលមានច្បាប់នេះ ប្រជាពលរដ្ឋរស់នៅក្នុងប្រទេសកម្ពុជាទាំងអស់នឹងគ្មានសិទ្ធិសេរីភាព ប្រៀបបានទៅនឹងអ្នកទោសក្នុងមន្ទីរឃុំឃាំង។
លោក មួង សូនី មានប្រសាសន៍ថា៖ “ការពាក់អាវហ្នឹង គឺយើងចង់បញ្ជាក់ថាបើច្បាប់នឹងចេញមកហើយមានន័យថាប្រជាជនខ្មែរហ្នឹងគឺអត់ខុសពីអ្នកទោសអ្នកទោសដែលស្ថិតនៅលើដី១៨១ ០៣៥ វាខុសពីអ្នកដែលនៅព្រៃស គ្រាន់តែអ្នកនៅព្រៃសគេនៅចំនួន១០ហិកតា ហើយយើងនៅឯនេះវាចំនួន១៨១០៣៥មែន ប៉ុន្តែវាអត់សេរីភាព។ វាគ្រាន់តែយើងអាចដើរហើរបានអីជិះម៉ូតូបាន តែសិទ្ធិនយោបាយ សិទ្ធិបញ្ចេញមតិ សិទ្ធិនិយាយពីរឿងសិទ្ធិមនុស្ស នីតិរដ្ឋវាអត់មាន”។
យុវជនម្នាក់ដែលគ្រោងនឹងចូលរួមតវ៉ានិងស្លៀកពាក់ឯកសណ្ឋានអ្នកទោស លោក ណេង ពៅ បានលើកឡើងថាលោកយល់ថាច្បាប់គ្រប់គ្រងអង្គការនេះនឹងរឹតត្បិតសេរីភាពរបស់លោកក្នុងការនិយាយស្តី។ លោកប្រៀបធៀបករណីនេះដូចអ្នកទោសដែលត្រូវបានគេបិទមាត់ជិត។ លោកមានប្រសាសន៍ថា៖ “យើងនឹងនាំគ្នាពាក់អាវអ្នកទោសហ្នឹងហើយនិងដាក់ច្រវ៉ាក់ ហើយដើម្បីធ្វើការសម្ដែងមតិចំពោះច្បាប់គ្រប់គ្រងអង្គការសង្គមស៊ីវិលហ្នឹង ដោយសារតែយើងមើលឃើញច្បាប់ដែលគ្រប់គ្រងអង្គការសង្គមស៊ីវិលហ្នឹងវាមើលទៅវាបិទសិទ្ធិសេរីភាពពេក វាអត់ខុសអីពីអ្នកទោសនៅហ្នឹង អញ្ចឹងយើងជាប្រជាពលរដ្ឋ ហើយយុវជនខ្ញុំគិតថានឹងធ្វើបែបហ្នឹង ដើម្បីសម្ដែងទៅឲ្យសធារណជនគាត់បានដឹងពីច្បាប់ហ្នឹង”។
នាយិកាមជ្ឈមណ្ឌលសិទ្ធិមនុស្សកម្ពុជា លោកស្រី ចក់ សុភាព បានលើកឡើងថាច្បាប់គ្រប់គ្រងអង្គការនេះត្រូវបានតាក់តែងឡើងក្នុងលក្ខណៈចង្អៀតនិងមានការបំបិទសិទ្ធិសេរីភាពមូលដ្ឋានរបស់ប្រជាពលរដ្ឋក្នុងការចងក្រងគ្នាជាសមាគម។ លោកស្រីបន្ដថាចំណុចមួយចំនួននៃច្បាប់នោះក៏បានបំពានលើករដ្ឋធម្មនុញ្ញកម្ពុជានិងកតិកាសញ្ញាអន្ដរជាតិស្ដីពីសិទ្ធិពលរដ្ឋនិងសិទ្ធិនយោបាយផងដែរ។ លោកស្រីបន្ថែមថាលោកស្រីស្នើឲ្យបញ្ឈប់ការអនុម័តច្បាប់នេះនិងបើកឲ្យមានការពិគ្រោះគ្នារវាងរដ្ឋាភិបាលនិងអង្គការសង្គមស៊ីវិល ព្រមទាំងប្រជាពលរដ្ឋទូទៅ។
លោកស្រី ចក់ សុភាព មានប្រសាសន៍ថា៖ “ស្នើឲ្យមានការពិគ្រោះយោបល់ឲ្យបានស៊ីជម្រៅ និងមានអត្ថន័យជាមួយនឹងសង្គមស៊ីវិលដែលពាក់ព័ន្ធហ្នឹង ដើម្បីធានាថាបើសិនជាយើងចាំបាច់ត្រូវមានច្បាប់នេះហើយបំពេញទៅតាមនីតិរដ្ឋនៃប្រទេស គឺយើងគួរធ្វើការជាមួយគ្នាក្នុងការជជែក ហើយធ្វើយ៉ាងម៉េចឲ្យយើងទទួលបានច្បាប់មួយដែលគោរពទៅតាមបទដ្ឋានរដ្ឋធម្មនុញ្ញយើង ហើយនឹងគោលការណ៍សិទ្ធិមនុស្សអន្ដរជាតិ”។
(រូបថតដោយក្រុមយុវជនមកពីសម្ព័ន្ធនិស្សិតបញ្ញាវ័ន្ដខ្មែរ)
គួររំឭកថា កាលពីថ្ងៃទី១៣ ខែកក្កដានេះ សេចក្តីព្រាងច្បាប់គ្រប់គ្រងអង្គការត្រូវបានរដ្ឋសភាអនុម័តដែលមានតែតំណាងរាស្រ្តគណបក្សប្រជាជនកម្ពុជា៦៨រូប ដោយតំណាងរាស្រ្តគណបក្សប្រឆាំងធ្វើពហិការមិនចូលរួមអនុម័តច្បាប់មួយនេះ។ ព្រឹទ្ធសភានឹងបើកកិច្ចប្រជុំមួយនៅថ្ងៃសុក្រស្អែកនេះ ដើម្បីពិនិត្យនិងឲ្យយោបល់លើសេចក្តីព្រាងច្បាប់នេះ។
កន្លងទៅ អ្នករាយការណ៍ពិសេសអង្គការសហប្រជាជាតិទទួលបន្ទុកសិទ្ធិសេរីភាពក្នុងការជួបប្រជុំដោយសន្តិវិធីនិងសេរីភាពក្នុងការបង្កើតសមាគម លោកMaina Kiai បានអំពាវនាវឲ្យព្រឹទ្ធសភាបដិសេធចោលទាំងស្រុងនូវច្បាប់ស្តីពីសមាគមនិងអង្គការមិនមែនរដ្ឋាភិបាលនេះ ដោយចាត់ទុកថាច្បាប់នេះមិនស្របតាមគោលការណ៍សិទ្ធិមនុស្សលើសេរីភាពនៃការប្រមូលផ្តុំ។
សេចក្តីព្រាងច្បាប់ចុងក្រោយ ដែលរដ្ឋាភិបាលបានដាក់ទៅរដ្ឋសភា មាន៩ជំពូក និងមាន៣៩មាត្រា។ មាត្រា២៤នៃសេចក្តីព្រាងច្បាប់នេះបានចែងថា«អង្គការមិនមែនរដ្ឋាភិបាលក្នុងស្រុក អង្គការមិនមែនរដ្ឋាភិបាលបរទេស ឬសមាគមបរទេស ត្រូវប្រកាន់ជំហរអព្យាក្រឹតចំពោះគ្រប់គណបក្សនយោបាយនៅព្រះរាជាណាចក្រកម្ពុជា»។ មាត្រា១០នៃសេចក្តីព្រាងច្បាប់នេះចែងថា សមាគម និងអង្គការមិនមែនរដ្ឋាភិបាល ត្រូវជូនដំណឹងជាលាយលក្ខណ៍អក្សរអំពីព័ត៌មានរាល់គណនីដែលត្រូវ បើកសម្រាប់កិច្ចប្រតិបត្តិការរបស់ខ្លួននៅធនាគារក្នុង ព្រះរាជាណាចក្រកម្ពុជា។ មាត្រា២៥ចែងថាសមាគម និងអង្គការមិនមែនរដ្ឋាភិបាល ត្រូវផ្ញើបាយការណ៍បូកសរុបសកម្មភាពការងារ និងរបាយការណ៍ហិរញ្ញវត្ថុប្រចាំឆ្នាំទៅក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ។ មាត្រា២៥បន្តថាក្នុងករណីចំបាច់ ក្រសួងមហាផ្ទៃអាចស្នើសុំរបាយការណ៍ស្តីពីសកម្មភាព និងនយោបាយហិរញ្ញវត្ថុប្រចាំឆ្នាំរបស់សមាគម។
ករណីដែលសមាគម និងអង្គការមិនមែនរដ្ឋាភិបាល មិនអនុវត្តតាមមាត្រា១០ មាត្រា២៤ និងមាត្រា២៥ ក្រសួងមហាផ្ទៃត្រូវជូនដំណឹងជាលាយលក្ខណ៍អក្សរដោយទុករយៈពេលយ៉ាង យូរ៣០ថ្ងៃ ថ្ងៃនៃថ្ងៃធ្វើការ។ ករណីមិនអនុវត្តតាមក្រសួងនឹងជូនដំណឹងជាលាយលក្ខណ៍អក្សរផ្អាកសកម្មភាពបណ្តោះអាសន្ន រយៈពេលយ៉ាងយូរ៩០ថ្ងៃ។ ក្នុងករណីនៅតែមិនព្រមអនុវត្ត ក្រសួងមហាផ្ទៃត្រូវសម្រេចជាលាយលក្ខណ៍អក្សរលុបឈ្មោះចេញពីបញ្ជី៕
សរសេរមកកាន់លោក យ៉ា រសាត់ តាមរយៈ rorsart@vodhotnews.com
ច្បាប់ដែលរដ្ឋាភិបាលបង្កេីតនេះគឺមានប្រភពមកពីអាររន្ទះបាញ់យួននេះអែងដែលបព្ជាារឲ្យអាររដ្ឋាភិ
បាលនេះបង្កេីតឡេីងដេីម្បីកៀបសង្កត់អ្នកប្រឆាំងនិងអ្នកស្នេហាជាតិកំុឲ្យមានការរេីបំរាស់ដូចដែលវា
ធ្វេីដាក់បងប្អូននៅកម្ពុជាក្រេាមអព្ចាឹង។ដរាបណាអារកំពូជយួននៅមាននាេះវាមានបំនងចង់លេបទឹក
ដីខ្មែររហូត។
Just 100 people 1 2 stop NGOs law hahahaha…… No body stay in the society ouside law. If 1 2 to stay without law please go to live at forest with animals.