ដោយ៖​ ណាត សុភាព​​ | ថ្ងៃព្រហស្បតិ៍ ទី23 កក្កដា 2015
http://vodhotnews.com

អ្នក​នាំពាក្យ​សាលាក្តីខ្មែរក្រហម លោក ​នេត្រ​ ភក្រ្តា (រូបថត​ដោយ​ ទេព សូនី​)

>

សាលាក្តីខ្មែរ​ក្រហមប្រកាស​ថាស្ថាប័ន​នេះ​កំពុង​ជួបបញ្ហា​ខ្វះ​រាប់លាន​ដុល្លារសម្រាប់បើក​ឲ្យ​បុគ្គលិកចំនួន​​៦ខែក្នុងឆ្នាំ២០១៥នេះ ខណៈសំណុំរឿង​០០២វគ្គ២នឹង​បើកសវនាការនៅថ្ងៃ២៧ ​ខែកក្កដា ឆ្នាំ២០១៥ខាង​មុខ​។

ក្នុង​សន្និសីទនៅថ្ងៃនេះ អ្នក​នាំពាក្យ​សាលាក្តីខ្មែរក្រហម លោក ​នេត្រ​ ភក្រ្តា ថ្លែង​ថាកញ្ចប់​ថវិកា​សម្រាប់​បុគ្គលិក​របស់អង្គជំនុំជម្រះវិសាមញ្ញក្នុង​តុលាការ​កម្ពុជា​ (អ.វ.ត.ក) បាន​អស់ត្រឹមពាក់កណ្តាល​ឆ្នាំ​២០១៥នេះ។ លោកថាដើម្បី​ឲ្យ​(អ.វ.ត.ក) ​​ដំណើរ​ការ​ទៅ​មុខបានចំនួន​៦ខែទៀត សាលាក្តីកូន​កាត់​​នេះត្រូវការ​ជំនួយបន្ថែម​ពីសហគមន៍អន្តរជាតិចំនួន២លាន៥សែនដុល្លារបន្ថែម​។​

ទោះយ៉ាង​ណា លោក​ នេត្រ​ ភក្រ្តា អះអាងថាសហភាពអឺ​រ៉ុបបាន​សន្យាផ្តល់ជំនួយ​ដល់​សាលាក្តី​ខ្មែរក្រហម​២លាន​៥សែនដុល្លារ សម្រាប់​បើក​ប្រាក់ខែឲ្យ​បុគ្គលិក​ចំនួន​៦ខែក្នុង​ឆ្នាំ​២០១៥ខាង​មុខ​នេះ។

ប្រធានកម្ម​វិធី​សាលាក្តី​ខ្មែរក្រហមនៃ​សមាគមអាដហុកលោក ឡាត់ គី យល់ថាបញ្ហាវិបត្តិ​ថវិកានេះ ដោយសារតែសាលាក្តីកូននេះធ្វើការដោយមិនទាន់បានផ្តល់យុត្តិធម៌ពិតប្រាកដដែល​ម្ចាស់​ជំនួយ​​អាចជឿទុកចិត្តបាន។

កាលពីខែមេសាឆ្នាំ២០១៥ សាលាក្តីខ្មែរក្រហមធ្លាប់ចេញ​សេចក្តីប្រកាស​ព័ត៌មានថាខ្លួនត្រូវការថវិកា សរុបមានចំនួន៣៣,៨លាន​ដុល្លារសហរដ្ឋអាមេរិកដែលក្នុងនោះ២៧,១លានដុល្លារសម្រាប់​ភាគីអន្តរជាតិ និង៦,៧លានដុល្លារសម្រាប់​ភាគីជាតិ៕

សរសេរមកកាន់លោក ណាត សុភាព តាមរយៈsopheap@vodhotnews.com