ដោយ៖ វង្ស សុម៉ាលីន | ថ្ងៃអង្គារ ទី11 សីហា 2015, 07:56 AM
http://vodhotnews.com
អ្នកនាង ម៉ៅ ស៊ីណាត កាលពីកន្លងទៅ (រូបភាព៖ វង្ស សុម៉ាលីន)
ខុសពីតារាសិល្បៈការិនីភាគច្រើន ដែលក្រោយលែងលះរមែងតោងទាមយកកូន ឲ្យស្ថិតក្រោមការគ្រប់គ្រងរបស់ខ្លួន អ្នកនាង ម៉ៅ ស៊ីណាត បែរជាបានប្រគល់កូនប្រុសឲ្យប្ដី ដោយសូម្បីតែលោក កា សាវុធ ជាអតីតស្វាមីមិនបានប្ដឹងយកកូនទៅវិញ។ អ្វីដែលគួរឲ្យភ្ញាក់ផ្អើល អ្នកនាងបានទាំងជំរុញឲ្យកូនចេញទៅរស់នៅតាមអតីតស្វាមីនៅលើទឹកដីសហរដ្ឋអាមេរិកក្នុងពេលដ៏ខ្លីថែមទៀតផង។
តារាចម្រៀងសំឡេងស្រដៀង ប៉ែន រ៉ន វ័យ៣៥ឆ្នាំរូបនេះនិយាយថា ភាពចម្រូងចម្រាស់រវាងអ្នកនាង និងមេធាវីលោក កា សាវុធ ជាស្វាមី បានកើតមានឡើងប្រមាណពីរបីឆ្នាំមកហើយ ដោយគ្រាន់តែស្ថានភាពប្រេះឆាគឺទើបតែកើតឡើងខ្លាំង ក្នុងពេលបុន្មានខែចុងក្រោយ។ អ្នកទាំងពីរបានចែកផ្លូវគ្នា ដោយអ្នកនាងចុះចេញពីផ្ទះវីឡាស្កឹមស្កៃដែលធ្លាប់រួមរស់នៅម្ដុំCamko City កាលពីពេលថ្មីៗ។ អ្នកនាងប្រាប់ថា កូនប្រុសរបស់ខ្លួនមិនបានចុះតាមអ្នកនាងនោះទេ ដោយនៅបន្តរស់នៅជាមួយលោក កា សាវុធ អតីតស្វាមីជាធម្មតា បើទោះជាស្វាមីមិនបានគំរាមប្ដឹងយកកូនផ្ដាច់មុខ។
អ្នកនាង ម៉ៅ ស៊ីណាត និយាយថា «ឥឡូវខ្ញុំចេញពីផ្ទះវីឡាហ្នឹងមកនៅផ្ទះផ្សេងហើយ ចំណែកកូនគឺនៅជាមួយគាត់(អតីតស្វាមី)។ រវាងខ្ញុំ និងគាត់អត់មានប្ដឹងផ្ដល់អីទេ ព្រោះកាលនៅជុំគ្នាយើងអត់ដែលនឹកនាធ្វើអេតាស៊ីវិល ខ្ញុំគិតថាបញ្ហាដែលយើងបែកគ្នាគឺរឿងអស់និស្ស័យតែម្ដង»។ អ្នកនាងថា មិនមានចម្រូងចម្រាស់រឿងទ្រព្យជាមួយស្វាមីនោះទេ ដោយសូម្បីរឿងកូន ក៏គ្មានរឿងប្រទាញប្រទង់គ្នាដែរមកទល់នៅផ្ទះរៀងខ្លួននេះ។ អ្នកនាងប្រាប់ថា ខ្លួនមិនបានធ្វើដូចអ្នកនាង ឈួន សុវណ្ណឆៃ អ្នកនាងយ៉ាន លីនដា ឬអ្នកនាងម៉េង កែវពេជ្ជតា កាលពីពេលលែងប្ដីនោះទេ ដោយសារតែអ្នកនាងយល់ច្បាស់ពីស្ថានភាពរបស់កូន និងលទ្ធភាពរបស់ខ្លួន។ អ្នកនាងថា មានតែជំរុញឲ្យកូនចេញទៅរស់នៅអាមេរិកតាមលោក កា សាវុធ ដែលនឹងចាកចេញពីកម្ពុជា ទៅកសាងជីវិតថ្មីនៅទីនោះ ក្នុងពេលដ៏ខ្លីនោះផង។
អ្នកនាង ម៉ៅ ស៊ីណាន និងស្វាមី កាលពីនៅរួមរស់ជាមួយគ្នា (រូបភាព៖ វង្ស សុម៉ាលីន)
អ្នកនាងនិយាយថា «ក្រោយពេលបែកគ្នា គាត់(អតីតស្វាមី) នឹងទៅនៅអាមេរិក ហើយខ្ញុំបានសុំឲ្យគាត់យកកូនទៅជាមួយដែរ ព្រោះខ្ញុំចង់ឲ្យកូនបានទៅរៀននៅទីនោះ ខ្ញុំអត់ឲ្យកូននៅស្រុកខ្មែរ វេទនាដូចខ្ញុំពីមុនទេ»។ អ្នកនាងប្រាប់ថា ជីវិតក្រលំបាកកាលពីអតីតកាល មុនក្លាយជាតារាសិល្បៈ និងមុនជួបលោក កា សាវុធ គឺជាអ្វីដែលអ្នកនាងត្រូវបញ្ចៀសដាច់ខាត មិនឲ្យកូនរស់នៅក្រោមបន្ទុករបស់ខ្លួន និងសុខចិត្តលះបង់កូនប្រុសឲ្យរស់នៅឆ្ងាយពីខ្លួន។ អ្នកនាងពោលថា «ម៉ៅ ស៊ីណាត ធ្លាប់ដើរបេះស្លឹកអំពិល បេះព្រលិតដើរលក់ឆ្អែតហើយ គឺអត់ឲ្យអ្នកណាសរសើរថាខ្ញុំសុខចិត្តយកកូនអីទេ សំខាន់ឲ្យគាត់(អតីតស្វាមី) នៅស្រឡាញ់កូន ចង់ជ្រោមជ្រែងកូន ឲ្យគាត់យកទៅ ខ្ញុំនឹងជំរុញ ព្រោះខ្ញុំដឹងថាកូនទៅតាមគាត់ទើបមានអនាគតវែងឆ្ងាយ ខ្ញុំអត់យកបញ្ហាលែងលះមកបង្អាក់គោលដៅរបស់កូនទេ»។
អ្នកនាងអះអាងថា មកទល់ពេលនេះ កូនប្រុសរបស់អ្នកនាង នៅតែបានឡើងចុះមកលេងអ្នកនាងជាធម្មតា បើទោះមិនបាននៅគេងឱបទ្រូងដូចកាលពីមុន។
អ្នកនាង ម៉ៅ ស៊ីណាត បដិសេធបើកកកាយរឿងទំនាស់ដែលបណ្ដាលឲ្យអ្នកនាង និងលោកមេធាវី កា សាវុធ ឈានដល់រឿងបែកគ្នា បន្ទាប់ពីរួមរស់ដោយគ្មានចំណងអាពាហ៍ពិពាហ៍កាលពីដើមឆ្នាំ២០០០។ អ្នកនាងប្រាប់ថា បញ្ហាស្វាមីមានថ្មី ឬអ្នកនាងមានអ្នកទី៣ មិនមែនជាដើមចមនោះទេ អ្វីដែលសំខាន់គឺផ្នត់គំនិតចាប់ផ្ដើមមិនចុះសម្រុងគ្នាប៉ុណ្ណោះ ដែលនិយាយឲ្យខ្លីគឺអ្នកនាងយល់ថា ជារឿងអស់និស្ស័យច្រើនជាង។ អ្នកនាងអះអាងថា នៅតែមានអារម្មណ៍សប្បាយចិត្តធម្មតា ដោយមិនបានកើតទុក្ខស្មុគស្មាញនោះទេ បន្ទាប់ពីឈានដល់បែកគ្នាជាមួយស្វាមីជាមន្ត្រីសម្បូរទ្រព្យនេះ ជាក់ស្ដែងអ្នកនាងថា ទើបនឹងបានទៅកែទម្រង់មុខឲ្យក្លាយជាអក្សរ V នៅ ហាងល្បីរបស់កូរ៉េនៅភ្នំពេញទៀតផងក្នុងប៉ុន្មានថ្ងៃនេះ។
អ្នកនាងនិយាយថា «សម្រាប់ខ្ញុំរបស់ដែលបាត់ហើយ ខ្ញុំអត់យំអត់ស្រែកអីទេ គឺធម្មតាព្រោះធ្វើម៉េចវាជាវាសនា បើខ្ញុំកើតទុក្ខ ឬស្មុគចិត្ត ខ្ញុំអត់សារភាពឲ្យដឹងរឿងគ្នា និងមិនទៅចំណាយលុយម៉ាសន្ធឹកទៅធ្វើមុខឲ្យចេញវីអញ្ចឹងទេ ព្រោះខ្ញុំអត់យករឿងហ្នឹងមកគិត»។ អ្នកនាងថា នឹងឡើងបង្ហើរសំនៀងយកប្រាក់ចិញ្ចឹមខ្លួន ប៉ុន្តែស្ថានភាពឡើងឆាក គឺលុះត្រាតែមុខបាត់ហើម បន្ទាប់ពីកែជាទម្រង់អក្សរវីនេះសិន ទើបអាចបង្ហាញខ្លួន។
នេះជាគូស្នេហ៍របស់តារាសិល្បៈមួយគូថ្មីទៀត ដែលបានបែកគ្នា បន្ទាប់ពីអ្នកនាង ម៉េង កែវពេជ្ជតា អ្នកនាងឈួន សុវណ្ណឆៃ អ្នកនាងយ៉ាន លីនដា និងអ្នកនាង ចន ច័ន្ទលក្ខិណា ដែលបានចែកផ្លូវជាមួយស្វាមីគ្នាធ្វើឲ្យកក្រើកពិភពសិល្បៈ៕
សូមសរសេរមកលោក វង្ស សុម៉ាលីន តាមរយៈ vongsomalin@yahoo.com
ស្តាយណាស់ចំណាយពេលអស់១៥ ឆ្នាំ !