ដោយ៖ ទូច សុខា | ថ្ងៃអង្គារ ទី11 សីហា 2015
http://vodhotnews.com
តំណាងរាស្រ្តគណបក្សសង្រ្គោះជាតិ លោក រៀល ខេមរិន្ទ្រ កាលពីកន្លងទៅ (រូបថតដោយ ទេព សូនី)
អង្គភាពប្រឆាំងអំពើពុករលួយបានចេញលិខិតមួយច្បាប់ទៅតំណាងរាស្រ្តគណបក្សសង្រ្គោះជាតិ លោក រៀល ខេមរិន្ទ្រ ឲ្យបកស្រាយករណីការចោទប្រកាន់ថាលោកបានកេងប្រវ័ញ្ចប្រាក់មួយចំនួន ពេលរៀបចំដំណើរទៅពិនិត្យព្រំដែនកម្ពុជាវៀតណាមកាលពីកន្លងទៅ។
លិខិតដែលចុះហត្ថលេខាដោយប្រធានអង្គភាពប្រឆាំងអំពើពុករលួយ លោក ឱម យ៉ិនទៀង កាលពីថ្ងៃទី៣១ខែកក្កដា ឲ្យដឹងថាអង្គភាពបានទទួលពាក្យប្តឹងចំនួន៣ ដែលពាក្យបណ្តឹងទី១លើទឹកប្រាក់១៥០០០ដុល្លារអាមេរិក ទីពីរទឹកប្រាក់២០០០០ដុល្លារ និងទី៣ប្រាក់២០០០០ដុល្លារ។ អង្គភាពប្រឆាំងអំពើពុករលួយបន្តថាបើតាមពាក្យប្តឹង ទឹកប្រាក់ទាំងនេះ លោក រៀល ខេមរិន្ទ្រ បានយកទៅរៀបចំដំណើរទៅមើលបង្គោលព្រំដែនក្នុងខេត្តស្វាយរៀង។ អង្គភាពបញ្ជាក់ថាតាមពាក្យប្តឹង ទឹកប្រាក់ភាគច្រើននៃថវិកាសរុប៥៥០០០ដុល្លារនេះត្រូវបានលោក រៀល ខេមរិន្រ្ទ កេងប្រវ័ញ្ចយក។
លោក ឱម យ៉ិនទៀង ប្រាប់វីអូឌី(VOD)នៅថ្ងៃអង្គារនេះថាលិខិតនេះធ្វើឡើងដើម្បីឲ្យលោក រៀល ខេមរិន្ទ្រ បំភ្លឺទាក់ទងនឹងពាក្យប្តឹងដែលអង្គភាពទទួលបាន។ លោកថាបើសិនជាការបំភ្លឺរបស់តំណាងរាស្រ្តនេះមានហេតុផលត្រឹមត្រូវ លោកនឹងជូនដំណឹងទៅកាន់អ្នកប្តឹងវិញថាករណីនេះមិនដូចការចោទប្រកាន់នោះទេ។ លោកបន្ថែមថា៖ “ខ្ញុំមាននីតិវិធីសម្រាប់ដោះស្រាយពាក្យបណ្តឹង បើគេឆ្លើយមកសមហេតុសមផល យើងជម្រាបទៅម្ចាស់បណ្តឹងវិញថាអញ្ចេះៗទេ។ គេមានបញ្ជីស្នាមរបស់គេ ឧទាហរណ៍ ហើយបើម្ចាស់បណ្តឹងគេមានស្អីទៀតអាហ្នឹងគេបន្តទៀត”។
លោក ឱម យ៉ិនទៀង បញ្ជាក់ថាអង្គភាពមានសមត្ថកិច្ចចាត់វិធានការពាក្យបណ្តឹងទាក់ទងនឹងតំណាងរាស្រ្តរបស់គណបក្សសង្គ្រោះជាតិ លោក រៀលខេមរិន្ទ្រ ដោយលោកថាការអនុវត្តនេះស្របទៅតាមច្បាប់ប្រឆាំងអំពើពុករលួយ។ លោកបញ្ជាក់ថាអ្នកដែលទទួលអាណត្តិពីការបោះឆ្នោតគឺស្ថិតក្នុងសមត្ថកិច្ចរបស់អង្គភាព។
ច្បាប់ប្រឆាំងអំពើពុករលួយចែងថាអង្គភាពអាចដោះស្រាយបញ្ហាពុករលួយទាំងឡាយណាដែលពាក់ព័ន្ធនឹងសមាជិកព្រឹទ្ធសភា រដ្ឋសភា ក្រុមប្រឹក្សារាជធានី ក្រុមប្រឹក្សាខេត្ត ក្រុមប្រឹក្សាក្រុង ក្រុមប្រឹក្សាស្រុក ក្រុមប្រឹក្សាខណ្ឌ និងសមាជិកក្រុមប្រឹក្សាឃុំ សង្កាត់ ព្រមទាំងពលរដ្ឋដែលទទួលអាណត្តិសាធារណៈដោយការបោះឆ្នោត ដើម្បីបំពេញមុខងារសាធារណៈដទៃទៀត។
វីអូឌី(VOD)មិនទាន់អាចសុំការបញ្ជាក់ពីលោក រៀល ខេមរិន្ទ្រ ដែលកំពុងស្នាក់នៅក្រៅប្រទេសបាននៅ ឡើយទេ។ ទោះយ៉ាងណា អ្នកនាំពាក្យគណបក្សសង្គ្រោះជាតិ លោ អ៊ូ ច័ន្ទឫទ្ធិ មានប្រសាសន៍ថាគណបក្សសង្គ្រោះជាតិមិនទាន់បានទទួលលិខិតនេះនៅឡើយ។ លោកចាត់ទុកលិខិតរបស់អង្គភាពប្រឆាំងអំពើពុករលួយមកកាន់តំណាងរាស្រ្តជារឿងចម្លែកមួយ។ លោកបន្ថែមថា៖ “អ៊ីចឹងគេរៃអង្គាសធ្វើបុណ្យកឋិន ធ្វើអីសព្វយ៉ាង តើអង្គភាពមានបានពិនិត្យទេ បើសិនការរៃអង្គាសទៅពិនិត្យព្រំដែនត្រូវការសួរនាំ ដើម្បីចង់ដឹងឬធ្វើការចោទប្រកាន់នោះបាទ អ៊ីចឹងខ្ញុំយល់ថាជារឿងមួយចម្លែកបំផុតចំពោះករណីនេះបាទ”។
នាយកប្រតិបត្តិអង្គការតម្លាភាពកម្ពុជា លោក ព្រាប កុល មានប្រសាសន៍ថាជាគោលការណ៍អង្គភាពប្រឆាំងអំពើពុករលួយមានសមត្ថកិច្ចពិនិត្យលើករណីពុករលួយក្នុងវិស័យរដ្ឋនិងឯកជនទូទាំងប្រទេស នៅពេលមានពាក្យបណ្តឹងឬសេចក្តីរាយការណ៍ពីអំពើពុករលួយ។ លោកបន្ថែមថា៖ “តែបើសិនជាបទល្មើសហ្នឹងជាបទល្មើសពុករលួយ ទោះបីជាក្នុងករណីស្ថាប័នឯកជនក៏ដោយ ក៏អង្គភាពអាចចាត់ការឬស៊ើបអង្កេតបានដែរ បើសិនជាមានពាក្យបណ្តឹងទៅអង្គភាពមានអង្គហេតុនិងភ័ស្តុតាង អាហ្នឹងវាស្ថិតក្នុងដែនសមត្ថកិច្ចរបស់អង្គភាពដែរបាទ”។
គួរបញ្ជាក់ថា លោក រៀល ខេមរិន្ទ្រ ធ្លាប់ដឹកនាំប្រជាពលរដ្ឋចុះទៅពិនិត្យមើលបង្គោលព្រំដែនលេខ២០២ និង២០៣ ក្នុងខេត្តស្វាយរៀងចំនួន២ដងរួចមកហើយ។ កាលពីថ្ងៃទី២៨ ខែមិថុនា ឆ្នាំ២១០៥ តំណាងរាស្ត្របក្សសង្គ្រោះជាតិបានដឹកនាំប្រជាពលរដ្ឋចុះពិនិត្យព្រំដែនក្នុងខេត្តស្វាយរៀង ប៉ុន្តែការចុះត្រួតពិនិត្យនេះបណ្តាលឲ្យមានហិង្សា ហើយប្រជាពលរដ្ឋទាំងសងខាងរងរបួស។ កាលពីថ្ងៃចន្ទ ថ្នាក់ដឹកនំាគណបក្សប្រជាជនកម្ពុជានិងគណបក្សសង្រ្គោះជាតិបានជួបគ្នាដោយឯកភាពថានឹងសហការគ្នា ដើម្បីឈានទៅរកដំណោះស្រាយបញ្ហាព្រំដែនរួមគ្នាជាមួយប្រទេសជិតខាង៕
សរសេរមកកាន់ លោក ទូច សុខា តាមរយៈsokha@vodhotnews.com
ហាស!ហាស!ហា ! មុករបរកសុីអត់ដើមរបស់តំណាងរាស្ត្របក្សcnrp រៀល ខេមរិន្រ្ទ រកប្រាក់បានយា៉ងច្រើនគ្រាន់តែដើរបោកសមាជិកខ្លួនបានរហូតទៅដល់ ៥,៥០០០ដុល្លា ពួកល្ងង់ cnrp ងាយស្រួលនិងបោកមែន ? គ្រាន់តែបានកំរៃភ្លាម រៀល ខេមរិន្រ្ួ ដាក់មេផាយរត់ទៅបរទេសបាត់ ដូចមេវានាយបញ្ញើក្អែក សម រង្សី ដែរ ?