ដោយ៖ ស៊ុន ណារិន | ថ្ងៃព្រហស្បតិ៍ ទី13 សីហា 2015
http://vodhotnews.com
សមាគមគ្រូបង្រៀនកម្ពុជាឯករាជ្យ (CITA) បានអំពាវនាវឲ្យរដ្ឋមន្រ្តីក្រសួងអប់រំ លោក ហង់ ជួន ណារ៉ុន លុបចោលសេចក្តីណែនាំមួយដែលបានដាក់បម្រាមមិនឲ្យអង្គការនិងសមាគមណាមួយធ្វើសកម្មភាពនៅក្នុងគ្រឹះស្ថានអប់រំ ដោយពុំមានការអនុញ្ញាតពីក្រសួងនោះទេ។
សេចក្តីណែនាំរបស់ក្រសួងអប់រំ ចុះហត្ថលេខាដោយរដ្ឋមន្រ្តី លោក ហង់ ជួន ណារ៉ុន កាលពីថ្ងៃអង្គារ មានខ្លឹមសារថា កន្លងមកនៅតាមគ្រឹះស្ថានសិក្សាទាំងសាធារណៈ ទាំងឯកជន មានសមាគម អង្គការ បុគ្គលិកអប់រំនិងគ្រូបង្រៀនជាប់កិច្ចសន្យាមួយចំនួនបានធ្វើសកម្មភាព ដែលក្រសួងចាត់ទុកថាមិនប្រក្រតី ដោយបានផ្សព្វផ្សាយបោះឆ្នោតជ្រើសរើសថ្នាក់ដឹកនាំរបស់សមាគម ឬអង្គការទាំងនោះនឹង”ឃោសនាបំផុសគំនិតឲ្យបុគ្គលិកអប់រំចូលរួមសកម្មភាពនោះ”។ ក្រសួងក៏មិនអនុញ្ញាតឲ្យធ្វើសកម្មភាពនយោបាយនិងការឃោសនានយោបាយ ឲ្យគណបក្សនយោបាយណាមួយនៅក្នុងគ្រឹះស្ថានសិក្សាសាធារណៈឬស្ថាប័នអប់រំឡើយ ដែលស្របតាមមាត្រា៣៤នៃច្បាប់ស្តីពីការអប់រំ។
សេចក្តីថ្លែងការណ៍របស់សមាគមគ្រូបង្រៀន ចេញផ្សាយកាលពីថ្ងៃពុធឲ្យដឹងថា សេចក្តីណែនាំរបស់ក្រសួងអប់រំធ្វើឡើងក្នុងគោលបំណងបំបិទសិទ្ធិសេរីភាពរបស់គ្រូបង្រៀន និងរឹតត្បិតសេរីភាពរបស់សមាគមអង្គការនានា ដែលធ្វើការការពារនិងលើកស្ទួយសិទ្ធិរបស់គ្រូបង្រៀន និងពង្រឹងវិស័យអប់រំនៅកម្ពុជា។ សមាគមគ្រូបង្រៀនបានបញ្ជក់ថា៖ "សេចក្តីណែនាំនេះគឺផ្ទុយទៅនឹងច្បាប់ទាំងស្រុង រួមមានច្បាប់រដ្ឋធម្មនុញ្ញនៃព្រះរាជាណាចក្រកម្ពុជា ត្រង់មាត្រា៤២ ច្បាប់ស្តីពីការអប់រំត្រង់មាត្រា៣៧ និងច្បាប់ស្តីពីសហលក្ខន្តិកៈមន្រ្តីរាជការស៊ីវិលត្រង់មាត្រា៣៦”។
បើតាមសេចក្តីថ្លែងការណ៍ កន្លងមកសមាគមគ្រូបង្រៀនកម្ពុជាឯករាជ្យកត់សម្គាល់ឃើញថាក្រសួងអប់រំ តែងតែធ្វើសកម្មភាព ដើម្បីបម្រើឲ្យគណបក្សនយោបាយដោយផ្ទាល់ ដូចជាការកៀងគរលោកគ្រូអ្នកគ្រូឲ្យចូលជាសមាជិករបស់គណបក្សប្រជាជនកម្ពុជា គ្រប់នាយកគ្រឹះស្ថានសិក្សាសុទ្ធតែតម្រូវឲ្យមានតួនាទីក្នុងគណបក្សប្រជាជនកម្ពុជា។ សមាគមបន្តថាក្រសួងអប់រំបានកៀងគរសិស្ស និស្សិត ឲ្យចូលជាសមាជិករបស់ក្រុមយុវជននៃគណបក្សប្រជាជនកម្ពុជាថែមទៀតផង ដូចជាយុវជនកាកបាទក្រហម យុវជនកាយឫទ្ធិ យុវជនសហភាពសហព័ន្ធយុវជនកម្ពុជាជាដើម។
សេចក្តីថ្លែងការណ៍បញ្ជាក់បន្ថែមថា៖ "សមាគមគ្រូបង្រៀនកម្ពុជាឯករាជ្យ សូមអំពាវនាវឲ្យលោករដ្ឋមន្រ្តីពិចារណាឡើងវិញ និងត្រូវលុបចោលនូវសេចក្តីណែនាំបែបនេះ ដើម្បីលើកកម្ពស់សិទ្ធិសេរីភាពរបស់គ្រូបង្រៀននៅតាមគ្រឹះស្ថានសិក្សានានា ដែលជាកត្តាដ៏សំខាន់សម្រាប់ការរីកចម្រើននៃវិស័យអប់រំនៅកម្ពុជាយើង”។ សមាគមបន្តថា៖ "ជាងនេះទៅទៀត ដើម្បីធានាបាននូវអព្យាក្រឹត្យភាពរបស់គ្រឹះស្ថានសិក្សា ក្រសួងអប់រំជាពិសេសថ្នាក់ដឹកនាំក្រសួង មន្ទីរក៏ដូចជានាយកសាលាទាំងអស់ត្រូវតែបញ្ឈប់នូវសកម្មភាពទាំងឡាយណាដែលបម្រើដល់គណបក្សនយោបាយនៅតាមគ្រឹះស្ថានសិក្សាទូទៅ”។
ប្រធានស្តីទីសមាគមគ្រូបង្រៀនកម្ពុជាឯករាជ្យ លោកស្រី អ៊ុក ឆាយ៉ាវី មានប្រសាសន៍ថា កន្លងទៅរាល់ពេលជិតបោះឆ្នោត គណបក្សប្រជាជនកម្ពុជាតែងតែយកសាលារៀន ដើម្បីផ្សព្វផ្សាយគោលនយោបាយខ្លួនបាន។
វីអូឌី(VOD)មិនទាន់អាចសុំការឆ្លើយតបពីរដ្ឋមន្រ្តីក្រសួងអប់រំ លោក ហង់ ជួន ណារ៉ុន បាននៅឡើយទេ។
តំណាងសម្ព័ន្ធគណនេយ្យភាពសង្គមអាស៊ីបូព៌ា និងប៉ាស៊ីហ្វិកប្រចាំនៅកម្ពុជា លោក សន ជ័យ មានប្រសាសន៍ថា លោកបារម្ភពីការបកស្រាយលើពាក្យ ”សកម្មភាពនយោបាយ” សម្រាប់សង្គមស៊ីវិលដែលធ្វើសកម្មភាពនៅតាមគ្រឹះស្ថានអប់រំ។ លោកលើកជាឧទាហរណ៍ថា ការនិយាយរបស់សិស្ស ឬគ្រូពីការអប់រំមិនមានគុណភាព និងបញ្ហាទឹកភ្លៀងបង្កជាទឹកជំនន់ មិនមែនមានន័យថា ជាសកម្មភាពនយោបាយដែលសេចក្តីណែនាំសំដៅនោះទេ។ លោកបន្ថែមថា ក្រសួងត្រូវតែដាក់ពិន័យចំពោះថ្នាក់ដឹកនាំគ្រឹះស្ថានអប់រំណា ដែលប្រមូលសិស្សនិស្សិតឲ្យចូលជាសមាជិកគណបក្សនយោបាយ ឬតម្រូវឲ្យសិស្សឬគ្រូធ្វើជាសមាជិករបស់គណបក្សណាមួយ។
សេចក្តីណែនាំរបស់ក្រសួងអប់រំ ក៏បានលើកឡើងថា ករណីបុគ្គលិកអប់រំណាបំពានការណែនាំនេះ នឹងត្រូវពិន័យជាប្រាក់ចាប់ពី១លានរៀល ទៅ៥លានរៀល។ ចំណែកនីតិបុគ្គលឬអង្គភាពនោះ ត្រូវពិន័យជាប្រាក់ពី១០លានរៀល ទៅ២០លានរៀល៕
សរសេរមកកាន់លោក ស៊ុន ណារិន តាមរយៈsun_narin@vodhotnews.com
ពួកអាឆ្កួតអស់នេះពេលណាទេីបពួកវាងាប់អស់។អាងតែច្បាប់នៅលេីដៃពួកវាចង់ហាមអ្វីក៏បានដែរ។
រស់ដូចក្នុងគុគអត់ជព្ជាាំងអព្ចាឹងនេះមិនខុសពីសម័យខ្មែរក្រហមឡេីយ។ចុះមិនទៅហាមពួកកាប់
បំផ្លាញ់ព្រៃឈេីដែរទៅពួកអារលាយ។គួរឲ្យចង់សេីចណាស់អ្នកបង្កេីតច្បាប់ស្រុកស្មែរគ្មានសាច់ឈាម
ជាខ្មែរបន្តិចណាសាេះ។
មានកម្មវិធីប្រលងជើងឯកខាងជេរទេ? រង់ចាំទូរទស្សន៍ព្រះអាទិត្យរលូតចេញមក ប្រហែលចាប់ផ្តើមប្រកួតជេរហើយ!