ដោយ៖ ឈុន វួចលាង | ថ្ងៃពុធ ទី2 កញ្ញា 2015
http://vodhotnews.com
ស្តាប់សំឡេង៖ |
ចម្លងទុក |
ប្រជាពលរដ្ឋតវ៉ានៅមុខសាលាដំបូងខេត្តកោះកុងកាលពីពេលកន្លងមក (រូបថត៖ អ៊ិត សូធឿត)
ក្រុមអ្នកតវ៉ាឲ្យតុលាការដោះលែងយុវជនចលនាមាតាធម្មជាតិ៣នាក់ នៅខេត្តកោះកុងបានរំសាយការដង្ហែក្បួនបណ្តោះអាសន្នក្រោយពីសាលាក្រុងខេមរភូមិន្ទ បានចេញបម្រាមមិនឲ្យមានការជួបជុំតវ៉ា ដោយចោទថាធ្វើឲ្យប៉ះពាល់ដល់សណ្តាប់ធ្នាប់សាធារណៈ។
សាលាក្រុងខេមរភូមិន្ទបានដាក់កំហិតដល់ក្រុមប្រជាពលរដ្ឋឲ្យបញ្ឈប់រាល់សកម្មភាពតវ៉ា នៅម៉ោង៥ល្ងាចថ្ងៃទី២ ខែកញ្ញានេះ ដោយព្រមានថានឹងចាត់ការតាមវិធានការច្បាប់។
សកម្មជននៃក្រុមចលនាមាតាធម្មជាតិមួយរូប លោក សន ចាន់ដារ៉ា បានឲ្យដឹងថា ក្រោយពីមានបម្រាមមិនឲ្យមានការតវ៉ានោះ ក៏មានក្រុមអ្នកតវ៉ាមួយក្រុមផ្សេងទៀត បានតវ៉ាប្រឆាំងនឹងក្រុមពួកគាត់ ដែលតវ៉ាឲ្យមានការដោះលែងយុវជនបរិស្ថានទាំង៣នាក់។ លោកអះអាងថា ក្រុមអ្នកតវ៉ាទាំងនោះត្រូវបានអាជ្ញាធរជួលមកឲ្យប្រឆាំងនឹងសកម្មជនបរិស្ថាន។ លោកថា៖ “អាជ្ញាធរបានជួលប្រជាជនមកបាតុកម្មប្រឆាំងនឹងពួកយើងវិញ ដោយលើកហេតុផលថា បាតុកម្មតវ៉ាមិនគោរពច្បាប់ និងប៉ះពាល់ដល់ជីវភាពរស់នៅប្រចាំថ្ងៃ មានន័យថា ពួកយើងរាល់ថ្ងៃហ្នឹងកំពុងតែមិនគោរពច្បាប់ ហើយប៉ះពាល់ដល់ការរកស៊ីគេនៅក្នុងផ្សារនៅក្នុងខេត្តហ្នឹង”។
VOD មិនអាចទាក់ទងអភិបាលខេត្តកោះកុង លោក ប៊ុន លើត បាននៅឡើយ។
អ្នកសម្របសម្រួលអង្គការសិទ្ធិមនុស្សលីកាដូប្រចាំ ខេត្តកោះកុង លោក អ៊ិន គង់ចិត្រ ថ្លែងថា ការចេញបម្រាមជាថ្មីទៀតរបស់អាជ្ញាធរលោកយល់ឃើញថា ជាចេតនាក្នុងការបំបិទសិទ្ធិសេរីភាពរបស់ប្រជាពលរដ្ឋសំដែងមតិ។ លោកថា៖ “ឃើញថា នេះជាចេតនាមួយដើម្បីបំបិទសេរីភាពរបស់ប្រជាពលរដ្ឋដែលគាត់សម្តែងមតិ។ ការពិតគាត់មានគ្នាមិនច្រើនទេ ប៉ុន្តែពួកគាត់កន្លងមកច្រើនគោរពសណ្តាប់ធ្នាប់ គោរពច្បាប់ចរាចរណ៍ ហើយគាត់រស់នៅក៏មានអនាម័យស្អាតបាតដែរ មិនរំខានទៅភ្ញៀវទេសចរណ៍អីទេ”។
គួរំឭកផងដែរថា ការតវ៉ាឲ្យមានការដោះលែងសកម្មជនចលនាមាតាធម្មជាតិទាំង៣នាក់នោះ មានរយៈពេលជិតកន្លះមកហើយ។ យុវជនទាំង៣នាក់ត្រូវបានអាជ្ញាធរខ្មែរចាប់ខ្លួន បន្ទាប់ពីពួកគេតវ៉ាប្រឆាំងនឹងក្រុមហ៊ុនបូមខ្សាច់របស់វៀតណាម ដែលពួកគេអះអាងថាធ្វើខូចបរិស្ថាន និងប៉ះពាល់ដល់ការប្រកបរបរនេសាទរបស់ពលរដ្ឋខ្មែរ៕
សូមសរសេរមកកញ្ញា ឈុន វួចលាង តាមរយៈ chhun.vouchleang@yahoo.com
ពួកអាក្បត់ជាតិ ទៅជាប្រើប្រាស់សិទ្ឋតវ៉ាដោយអហិង្សាថាខុសច្បាប់ ចុះពួកហែងចាប់គេដោយគ្រាន់តែហាមមិនអោយយួនបូមខ្សាច់ហែងចាប់គេដាក់គុក តើនោះត្រូវច្បាប់មែនទេ?