ដោយ៖ ទូច សុខា | ថ្ងៃចន្ទ ទី7 កញ្ញា 2015
http://vodhotnews.com
បុគ្គលិកទូរគមនាគមន៍កម្ពុជាតវ៉ារឿងចោទប្រកាន់បាត់លុយជាង២០ម៉ឺនដុល្លារ
បុគ្គលិកទូរគមនាគមន៍កម្ពុជា នៅព្រឹកថ្ងៃចន្ទនេះតវ៉ាទាមទារឲ្យក្រុមប្រឹក្សាវិន័យរបស់ស្ថាប័នមួយនេះបើកការស៊ើបអង្កេតស៊ីជម្រៅមួយទៅលើករណីបាត់ថវិការបស់ស្ថាប័នជាង២០ម៉ឺនដុល្លារ ដែលបុគ្គលិកទាំងនោះអះអាងថាការបាត់បង់ថវិកានេះធ្វើឲ្យខាតដល់ប្រយោជន៍បុគ្គលិកធ្ងន់ធ្ងរ។
បុគ្គលិគ្គទូរគមនាគមន៍កម្ពុជាជាង៥០នាក់នៅព្រឹកនេះបានប្រមូលផ្តុំគ្នានៅបរិវេណទូរគមនាគមន៍កម្ពុជាដើម្បីបង្ហាញការមិនពេញចិត្តរបស់ខ្លួនចំពោះព័ត៌មានដែលពួកគាត់ទទួលបានថាមានបុគ្គលមួយចំនួនបានលួចកិបកេងថវិការបស់ស្ថាប័នជាង២០ម៉ឺនដុល្លារ។
តំណាងនិយោជិកទូរគមនាគមន៍កម្ពុជា លោក ទឹម ចាណ្ណារិទ្ធ មានប្រសាសន៍ថាបុគ្គលិកមិនសប្បាយចិត្តចំពោះព័ត៌មានដែលថាមានបុគ្គលក្នុងស្ថាប័នមួយនេះលួចកិបកេងថវិកា២៣ម៉ឺនដុល្លារនេះ។ លោកថាការបាត់បង់ថវិកាទាំងនេះជាការខាតបង់អត្ថប្រយោជន៍របស់បុគ្គលិកទាំងអស់គ្នា។ លោកបន្ថែមថា៖ "មានការចោទប្រកាន់ថាមានការលួចកិបកេងថវិការបស់ទ.ក (ទូរគមនាគមន៍កម្ពុជា)អ៊ីចឹងបងប្អូនរបស់យើងមិនមានការសប្បាយចិត្តទេឮថាមានការកិបកេងថវិការបស់ទ.ក ជាច្រើនម៉ឺន…ខាងបុគ្គលិកគាត់ខឹងសម្បារថាបាត់លុយប៉ុណ្ណឹង គឺបាត់ប្រាក់ចំណេញរបស់គាត់”។
បើតាមលោក ទឹម ចាណ្ណារិទ្ធ បុគ្គលិកចង់ឲ្យក្រុបប្រឹក្សាវិន័យស្វែងរកការពិតនិងអ្នកទទួលខុសត្រូវពីការបាត់បង់ថវិការបស់ទូរគមនាគមន៍កម្ពុជានេះ។
ប្រធានផ្នែកប្រមូលចំណូលនិងបំណុលនៃទូរគមនាគមន៍កម្ពុជាដែលរងការចោទប្រកាន់ថាបានធ្វើឲ្យបាត់ថវិកា២៣ម៉ឺនដុល្លារនេះ លោក សែម សំអាង មានប្រសាសន៍ថាលោកចង់ឲ្យក្រុមប្រឹក្សាវិន័យផ្តល់យុត្តិធម៌ដល់រួមលោក ដោយលោកចាត់ទុកថាការចោទប្រកាន់នេះជាអំពើអយុត្តិធម៌សម្រាប់រូបលោក។ លោកបន្តថារាល់ថវិកាដែលលោកប្រមូលបានពីអតិថិជន លោកបានប្រគល់ជូនថ្នាក់លើរបស់លោកទាំងអស់។ ទោះយ៉ាងណា លោកថាដោយសារតែនិតិវិធីនៃការប្រគល់ប្រាក់ដែលប្រមូលបានឲ្យទៅថ្នាក់លើរបស់ស្ថាប័ននេះមិនមានចេញជាឯកសារបញ្ជាក់ថាបានប្រគល់ឬទទួលប្រាក់ ទើបលោកថាត្រង់ចំណុចនេះហើយដែលលោកត្រូវរងការចោទប្រកាន់ថាបានធ្វើឲ្យបាត់ថវិកាទាំងនោះ។
។ ទោះយ៉ាងនេះក្តី លោកថាលោកមិនទាន់អាចបញ្ចេញឈ្មោះថ្នាក់លើដែលលោកប្រគល់ប្រាក់ឲ្យនោះបាននៅឡើយទេ។
លោក ខឹម តេងអឿន អនុប្រធាននាយកដ្ឋានហិរញ្ញកម្មទទួលបន្ទុកប្រមូលចំណូលនិងបំណុលដែលជាប់ពាក់ព័ន្ធនឹងការចោទប្រកាន់នេះ មានប្រសាសន៍ថាលោកបានដាក់ច្បាប់សម្រាកពីការងារតាំងពីខែកុម្ភៈ ឆ្នាំ២០១៥ ដោយលោកមានជំងឺ។ លោកថាលោកមិនបានដឹងពីករណីបាត់ប្រាក់២៣ម៉ឺនដុល្លារនេះនោះទេ។ លោកក៏បានបញ្ជាក់ដែរថាក្នុងស្ថាប័នទូរគមនាគមន៍កម្ពុជា ក៏ដូចជាស្ថាប័នដទៃទៀតដែរ នីតិវិធីនៃការប្រគល់និងទទួលប្រាក់ពីបុគ្គលម្នាក់ទៅបុគ្គលម្នាក់ គឺសុទ្ធតែមានលិខិតចុះហត្ថលេខានិងបោះត្រាដើម្បីបញ្ជាក់ថាបានទទួលឬប្រគល់ប្រាក់។
វីអូឌី(VOD)មិនទាន់អាចទាក់ទងអគ្គនាយកទូរគមនាគមន៍កម្ពុជា លោក ឡាយ ម៉ារីវ៉ូ ដើម្បីសុំការអត្ថាធិប្បាយលើបញ្ហានេះបាននៅឡើយទេ ដោយអ្នកតវ៉ាបានអះអាងថាកំពុងតែប្រជុំពិភាក្សាលើបញ្ហានេះ។
បើតាមបុគ្គលិកដែលបានចូលរួមក្នុងការទាមទារនេះ ទូរគមនាគមន៍កម្ពុជាជាស្ថាប័នស្វយ័តរបស់រដ្ឋដែលបម្រើសេវាទូរស័ព្ទ សេវាអ៊ីនធើណែតនិងសេវាឆ្លងកាត់ផ្សេងៗទៀត។ លោកថាបុគ្គលិកបម្រើការសរុបមានចំនួនជាង៤០០នាក់នៅភ្នំពេញនិងជាង២០០នាក់ទៀតបម្រើការនៅតាមបណ្តាខេត្ត។ ពួកគាត់អះអាងថាបុគ្គលិកធ្លាប់បានទទួលប្រាក់ខែទី១៦ កាលពីបួនឬប្រាំឆ្នាំមុន ប៉ុន្តែពួកគាត់បញ្ជាក់ថាពីបីឆ្នាំចុងក្រោយនេះពួកគាត់ស្ទើតែមិនបានប្រាក់ខែទី១៣ផង។ ពួកគាត់ថាការបាត់បង់ថវិកាទាំងនេះជាការខាតប្រយោជន៍ដ៏ធំរបស់បុគ្គលិក។
បើតាមបុគ្គលិកទាំងនោះ កន្លងមកទូរគមនាគមន៍កម្ពុជាធ្លាប់មានការបែកធ្លាយករណីពុករលួយនេះម្តងមកហើយក្នុងទំហំទឹកប្រាក់ជាង៣ម៉ឺនដុល្លារ តែពួកគាត់ថារឿងនេះក៏ត្រូវបានបញ្ចប់ទៅវិញបន្ទាប់ពីអ្នកពាក់ព័ន្ធយល់ព្រមសងប្រាក់ទាំងនោះទៅស្ថាប័នវិញ៕
សរសេរមកកាន់លោក ទូច សុខា តាមរយៈsokha@vodhotnew.com
So they know who stole the dough $$$$$$$$$$$$$$.
It is the very skill at workplace for ranking.
That’s how those in western countries can be taught! !!!!!.
It is time for RGC to punish them!!!!!!
I let you corrupt but pass me my share!!!! ” look after the boss. ”
Oops! !!!! Maybe they are CPP members!!!!!!!
Samneang
By the way, why can’t these workers file a complaint to sleepy Anti corruption Unit (SACU) ??????????.Not trust this organization? ????????
Samneang