ដោយ៖ ណាត សុភាព | ថ្ងៃចន្ទ ទី7 កញ្ញា 2015
http://vodhotnews.com
ស្តាប់សំឡេង៖ |
ចម្លងទុក |
ក្រសួងមហាផ្ទៃឲ្យដឹងថា សមត្ថកិច្ចកំពុងបន្តធ្វើការស្រាវជ្រាវចាប់ជនសង្ស័យ ដែលបង្កើតហ្វេសប៊ុកប្រើឈ្មោះមន្ត្រីរបស់ខ្លួន ដើម្បីទៅគំរាមសម្លាប់អនុប្រធានគណបក្សសង្គ្រោះជាតិ លោក កឹម សុខា កាលពីជិតពីរឆ្នាំមុន។
ការអះអាងនេះ ធ្វើឡើងបន្ទាប់ពីសមត្ថកិច្ចបានចាប់ខ្លួនបុរសម្នាក់កាលពីថ្ងៃទី៥ ខែកញ្ញានេះ ដោយសង្ស័យថា ជាអ្នកគំរាមតាមហ្វេសប៊ុក សម្លាប់ប្រធានក្រុមស្រាវជ្រាវកិច្ចការព្រំដែននៅរាជបណ្ឌិតសភាកម្ពុជាលោក សុខ ទូច។ ប៉ុន្តែអ្នកតាមដានបញ្ហានេះ បានចាត់ទុករដ្ឋាភិបាលកម្ពុជាថា អនុវត្តច្បាប់មានស្តង់ដាពីរ គឺអ្នកដែលគំរាមមន្ត្រីរដ្ឋាភិបាល សមត្ថកិច្ចចាប់ខ្លួនឆាប់បាន រីឯអ្នកដែលគំរាមសម្លាប់លោក កឹម សុខា ជិតពីរឆ្នាំហើយជនល្មើសនៅតែមិនចាប់បានទៀត។
អ្នកនាំពាក្យក្រសួងមហាផ្ទៃ លោក ខៀវ សុភ័គ មានប្រសាសន៍ថា អ្នកប្រើហ្វេសប៊ុក ឈ្មោះ ផែង វណ្ណៈ ដែលមានតួនាទីជាមន្ត្រីនៅអគ្គស្នងការនគរបាលជាតិនោះ ក្រសួងបានកោះហៅមកសាកសួររួចហើយ តែម្ចាស់គណនេយ្យហ្វេសប៊ុកអះអាងថា មានជនមិនស្គាល់លួចបង្កើតដោយប្រើឈ្មោះរបស់គាត់ ដើម្បីគំរាមសម្លាប់លោក កឹម សុខា កាលពីឆ្នាំ២០១៣។ ទោះយ៉ាងណា លោក ខៀវ សុភ័គ បញ្ជាក់ថា ក្រសួងមហាផ្ទៃកំពុងបន្តស្រាវជ្រាវចាប់អ្នកដែលបង្កើតហ្វេសប៊ុក ដែលលោកថាបន្លំធ្វើជាឈ្មោះ ផែង វណ្ណៈ មកផ្តន្ទាទោសឆាប់ៗនេះ ដូចករណីអ្នកគំរាមសម្លាប់លោក សុខ ទូច ដែរ។ លោកថា៖ "យើងនឹងធ្វើ យើងមិនគិតថានរណាៗ បក្សប្រឆាំង បក្សកាន់អំណាច បើសមត្ថកិច្ចជាសមត្ថកិច្ចរបស់ប្រជាពលរដ្ឋហ្នឹងទាំងមូលហ្នឹងឯង។ ពូយល់ថា មិនយូរមិនឆាប់ទេ ព្រោះស្អីក៏ដោយក្នុងពិភពលោកហ្នឹង គ្មានអ្វីជាអាថ៌កំបាំងដែលគេរកមិនឃើញ"។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ យល់ថា ចំណាត់ការរបស់សមត្ថកិច្ចរវាងករណីលោក សុខ ទូច និងករណីគំរាមសម្លាប់លោក កឹម សុខា ធ្វើឡើងមិនស្មើភាពគ្នា។ លោកស្នើទៅក្រសួងមហាផ្ទៃ ត្រូវធ្វើកិច្ចការនេះ ដោយឈរលើគោលការអព្យាក្រឹត និងមានតម្លាភាព។ លោកបញ្ជាក់ថា៖ "សូមឲ្យស៊ើបអង្កេតឲ្យមានតម្លាភាព និងកុំឲ្យមានការរើសអើង កុំឲ្យអ្នកនេះស៊ើបអង្កេតចាប់បានក្នុងរយៈពេលតែប៉ុន្មានថ្ងៃ អ្នកផ្សេងទៀតមានការគំរាមកំហែងដល់ថ្នាក់ដឹកនាំជាន់ខ្ពស់របស់គណបក្ស ហើយគាត់អត់មានការស៊ើបអង្កេត អត់មានការតាមដានមើលអ្វីទាំងអស់ ហើយនេះបង្ហាញឲ្យឃើញថា វាមានការរើសអើងផ្នែកនយោបាយ គាំទ្រឲ្យមានអំពើអយុត្តិធម៌នៅក្នុងសង្គម"។
ចំណែកមន្ត្រីនៅអគ្គស្នងការនគរបាលជាតិ លោក ផែង វណ្ណៈ អះអាងថា លោកមិនបារម្ភពីការចាប់ខ្លួនលោកនោះទេ ព្រោះលោកបានបំភ្លឺនៅក្រសួងមហាផ្ទៃរួចហើយ ដោយលោកអះអាងថា មានអ្នកលួចបង្កើតហ្វេសប៊ុកដាក់ឈ្មោះដូចលោក គំរាមសម្លាប់លោក កឹម សុខា ដើម្បីទម្លាក់កំហុសឲ្យលោកតែប៉ុណ្ណោះ។
ប្រធានផ្នែកស៊ើបអង្កេតនៃសមាគមការពារសិទ្ធិមនុស្សអាដហុក លោក នី ចរិយា ប្រៀបធៀបថា ការចាប់ខ្លួនអ្នកគំរាមសម្លាប់លោក សុខ ទូច បានលឿន។ រីឯការយឺតយ៉ាវរកមុខអ្នកគំរាមសម្លាប់លោក កឹម សុខា បានបង្ហាញថា នៅកម្ពុជាអ្នកកាន់អំណាចនិងអ្នកមានទ្រព្យ ត្រូវបានច្បាប់ការពារច្រើនជាងអ្នកទន់ខ្សោយ។ លោកថា៖ "សម្រាប់ខ្ញុំ ខ្ញុំយល់ថា អ្នកដែលមិនមែនជាក្រុមការពាររដ្ឋាភិបាល គឺថាអ្នកហ្នឹងមិនទទួលបានសេវាការពារសុវត្ថិភាពដូចអ្នកដែលនៅក្នុងជួររដ្ឋាភិបាលទេ។ បង្ហាញថា ប្រព័ន្ធយុត្តិធម៌យើងមានស្តង់ដាពីរ គឺសម្រាប់ការពារទៅលើអ្នកដែលមានទ្រព្យសម្បត្តិ អ្នកមាននិន្នាការខាងរដ្ឋាភិបាល ហើយនិងអ្នកដែលមិនមាននិន្នាការរដ្ឋាភិបាល គឺមិនទទួលបានសេវាការពារសន្តិសុខនោះទេ"។
លោក នី ចរិយា បន្តថា បើការអនុវត្តច្បាប់មានស្តង់ដាពីរបែបនេះ របាយការណ៍អន្តរជាតិនឹងចេញមករិះគន់ថា កម្ពុជានៅតែបន្តរំលោភសិទ្ធិមនុស្ស។
គួររំឭកថា កាលពីថ្ងៃទី២៩ សីហា ២០១៥ លោក សុខ ទូច បានអះអាងថាមានជនមិនស្គាល់មុខបានផ្ញើសារគំរាមសម្លាប់លោកទាំងលើបណ្តាញសង្គម និងតាមទូរស័ព្ទដៃ បន្ទាប់ពីលោកសកម្មរឿងផែនទីព្រំដែន។ ចំណែក លោក កឹម សុខា ត្រូវបានគេគំរាមសម្លាប់ នៅគ្រាគណបក្សប្រឆាំងនេះដឹកនាំបាតុកម្ម ក្រោយការបោះឆ្នោត។
ប៉ុន្តែករណីគំរាមសម្លាប់លោក សុខ ទូច បានមួយសប្តាហ៍ អគ្គស្នងការដ្ឋាននគរបាលជាតិបានចាប់ជនសង្ស័យលោក ផង់ សីហា វ័យ២៧ឆ្នាំ ដែលមានស្រុកកំណើត ក្នុងខេត្តព្រៃវែង ខណៈបុគ្គលនេះឆ្លងដែនពីប្រទេសថៃវិលចូលប្រទេសកម្ពុជាវិញ កាលពីថ្ងៃទី៥ ខែកញ្ញា ឆ្នាំ២០១៥៕
សូមសរសេរមកលោក ណាត សុភាព តាមរយៈ sopheap@vodhotnews.com
កាលពីថ្ងៃទី២៩ សីហា ២០១៥ លោក សុខ ទូច បានអះអាងថាមានជនមិនស្គាល់មុខបានផ្ញើសារគំរាមសម្លាប់លោកទាំងលើបណ្តាញសង្គម និងតាមទូរស័ព្ទដៃ បន្ទាប់ពីលោកសកម្មរឿងផែនទីព្រំដែន។ ចំណែក លោក កឹម សុខា ត្រូវបានគេគំរាមសម្លាប់ នៅគ្រាគណបក្សប្រឆាំងនេះដឹកនាំបាតុកម្ម ក្រោយការបោះឆ្នោត។សូមសមត្ថកិច្ចអនុវត្តច្បាប់ឲ្យស្មើភាពគ្នាផង៕
អា ផែង វណ្ណះអោយច្បាស់ក្រត…ទៅចាប់អ្នកផ្សេងជំនួស អាផែង វណ្ណះទៀតហើយ
ខ្ញុំសង្ឃឹមថានឹងមិនមានឃាតករសប្បនិម្មិត្តដូចករណីសំលាប់លោកជា វិជ្ជាទៅចុះ។
There is not any fake Pheng Vannak, there is only real Pheng Vannak. He exchanged so many You Tube chats. He always assures himself and his name. Why should the authorities look for another Pheng Vannak?
ផែង វណ្ណៈ គឺជាផែង វណ្ណៈ។ គ្មានអ្នណាមកបន្លំឈ្មោះទេ។ សូមកុំចាប់អ្នកផ្សេងមកជាប់គុកជំនួស។
បើនិយាយពីការរើសអើងបក្ខពួក រដ្ឋាភិបាលកាន់អំណាចក្នុងគណបក្សប្រជាជននេះហើយ
រើសអើងជាតិខ្មែរខ្លួនឯងខ្លាំងណាស់ បក្ខពួកមន្រ្តីបក្សប្រជាជនប្រព្រឹត្តិខុសច្បាប់ ចាប់មិនដែលបានមកផ្ដន់ទាទោសឡើយ ។