ដោយ៖​ ពៅ មេត្តា​ | ថ្ងៃព្រហស្បតិ៍ ទី8 តុលា 2015, 02:47 PM
http://vodhotnews.com

លោក អ៊ុំ សំអាន តំណាង​មក​ពី​គណបក្ស​សង្គ្រោះជាតិ កាលពីពេល​កន្លងមក (រូបថត៖ ទេព សូនី)

​តំណាងរាស្ត្រ​គណបក្ស​សង្គ្រោះ​ជាតិ​ដែល​សកម្ម​ខាង​កិច្ចការ​ព្រំដែនបាន​ស្នើ​រដ្ឋាភិបាល​ឲ្យ​ខ្ចី​ផែនទីបោន​ពី​អង្គ ការសហប្រជាជាតិ​ម្តង​ទៀត ហើយ​សើរើ​បង្គោល​ព្រំដែន​ជាមួយ​វៀតណាម​ដែល​បោះ​បាន​ចំនួន​៨៣​ភាគរយ​ឡើងវិញ​។​

លោក អ៊ុំ សំអាន តំណាងរាស្ត្រ​គណបក្ស​សង្គ្រោះ​ជាតិ​ដែល​កំពុង​ស្ថិតនៅ​សហរដ្ឋអាមេរិក​ប្រាប់​វីអូឌី(VOD)នៅ​ព្រឹក​ថ្ងៃ​ព្រហស្បតិ៍​នេះថា​លោក​រកឃើញ​ផែន​បោន​ខ្នាត​១/១00.000 តម្កល់​នៅ​អង្គការសហប្រជាជាតិ"UN" (​បណ្ណា​ល័យDag Hammarskjold នៃ​UN) ដែល​លោក​ថា​ជា​​ផែនទី​ចែង​ក្នុង​មាត្រា​២​នៃ​រដ្ឋធម្មនុញ្ញ​កម្ពុជា​។ លោក​បញ្ជាក់ថាផែនទីបោន​ទាំងនេះបោះពុម្ព​​ដោយ​ក្រុម​ភូមិសាស្ត្រ​ឥណ្ឌូចិន​ឆ្នាំ​១៩៥២, ១៩៥៣​។ 

​លោក អ៊ុំ សំអាន ជំរុញ​ឲ្យ​រដ្ឋាភិបាល​ខ្ចី​ផែនទីបោន​ពី​អង្គការ​សហ​ប្រជាតិ​ម្តងទៀត ព្រោះ​លោក​ថាកាលពី​លើក​មុន​មន្ត្រី​រដ្ឋាភិបាល​សុំ​ខ្ចី​ផែនទីបោន​ពី​អង្គការសហប្រជាជាតិ តែ​បែរជា​យក​ផែនទីUTMផ្ទៀងផ្ទាត់​ទៅវិញ​។ ជាមួយ​គ្នា​លោក អ៊ុំ សំអាន ក៏​ជំរុញ​ឲ្យ​សើរើ​បង្គោល​ព្រំដែន​កម្ពុជា​វៀតណាម ដែល​បាន​បោះ​ហើយ​៨៣​ភាគរយ​វិញ។ លោក​មាន​ប្រសាសន៍ថា​​៖ “​ប្រសិន​ជា​បោះ​(​បង្គោល​ព្រំដែន​)​ទៅតាម​ផែនទី ដែល​មាន​ត្រា​វៀតណាម​នោះ ប្រាកដ​ជា​ប្រជាពលរដ្ឋ​នៅតាម​ជាយដែន ប្រាកដ​ជា​ស្រែកយំ​បាត់​ដីស្រែ​ចម្ការ​របស់​គាត់​ហើយ ព្រោះ​ផែនទី​ហ្នឹង​ជា​ផែនទី​មិន​ត្រឹមត្រូវ ដូច្នេះ​ផែនទី​ដែល​ត្រឹមត្រូវគឺជា​ផែនទី​នៅ​អង្គការ​សហប្រជាជាតិ​ហ្នឹង​ឯង ហើយ​រដ្ឋាភិបាល​អត់​មាន​ផែនទី​ផ្លូវ​ការ អត់​មាន​ផែនទី​មានចែង​ក្នុង​មាត្រា​២​នៃ​រដ្ឋធម្មនុញ្ញ អត់​មាន​ផែនទី​តម្កល់​នៅUNផង​ហើយ​ទៅ​បោះបង្គោល​ដល់​ទៅ​៨៣​ភាគរយ បោះ​ហ្នឹង​ត្រូវតែ​សើរើ​វិញ​នៅពេលដែល​បាន​ផែនទី​ផ្លូវការ​ពី​អង្គការសហប្រជាជាតិ​”​។​

ប្រធាន​គណៈកម្មាធិការ​ព្រំដែន​កម្ពុជា លោក វ៉ា គឹមហុង មិន​អត្ថាធិប្បាយ​ទេ ដោយ​ប្រាប់ថា​ជាប់​ប្រជុំ ចំណែក​លោក​ស្រី កុយ ពិសី ជា​អនុប្រធាន​គណៈកម្មាធិកា​រ​នេះ​មិន​លើក​ទូរស័ព្ទ​។ 

ចំណែក​លោក សុខ ទូច ប្រធាន​ក្រុម​ស្រាវជ្រាវ​កិច្ចការ​ព្រំដែន​នៅ​រាជបណ្ឌិតសភា​កម្ពុជាស្នើ​ឲ្យ​លោក អ៊ុំ សំអាន ចុះ​ពិនិត្យ​ព្រំដែន​ដោយ​ផ្ទាល់​មុន​ស្នើ​ឲ្យមាន​ការសើរើ​ការបោះបង្គោល​ព្រំដែន។ លោក​មាន​ប្រសាសន៍​ថា​​៖ “​មិនបាច់​ទៅ​សើរើ​ទេ យើង​ចុះ​ពិនិត្យ​ទៅ យក​អី​ទៅ​ពិនិត្យ​ដែល​គាត់​ថា​អង្គការ​សហប្រជាជាតិដែល​តម្កល់​ហ្នឹង​ទៅ​ត្រួតពិនិត្យ​ទៅ​។ ខ្ញុំ​គ្រាន់​ជម្រាបជូន មក​ដល់​ហ្នឹង​យើង​អាច​ធ្វើ​សេចក្តី​សន្និដ្ឋានបានថាឲ្យ​គាត់​យក​ទៅ ហើយ​ខុស​ត្រង់​ណា​អី​ត្រង់ណា អ្វី​ដែល​គាត់​និយាយ​ពី​មុន​ហ្នឹង ខ្ញុំ​បាន​ទៅដល់​ហើយគឺ​គាត់​និយាយ​ខុស​ទាំង​ស្រុង ព្រែក​ប៊ីញ​ថាញ់ គាត់​ថា​ព្រែក​ប៊ីញ​យេ ឬ​គាត់​ថា​ព្រែក​វិញ​តេ ហើយ​គាត់​ថា​បាត់​ដី​អី​នោះ គឺ​គាត់​និយាយ​ខុស​ទាំង​អស់​”​។​

លោក សុខ ទូច ហៅ​ការអះអាង​របស់​លោក អ៊ុំ សំអាន​ថា​រកឃើញ​ផែនទីបោន​នោះគ្រាន់តែ​ជា​ការ​ធ្វើ​សកម្ម​ភាព​​ជា​លក្ខណៈ​នយោបាយ។ លោក​មានប្រសាសន៍ថា​​៖ “​គ្រាន់​ជា​នីតិវិធី​សុំទាន​ដើម្បី​ដាស់​ឲ្យគេ​ចាប់អារម្មណ៍​ទៅលើ​គាត់​តែ​ប៉ុណ្ណឹង​ទេ ព្រោះ​គាត់​សំងំ​នៅ​បរទេស អ៊ីចឹង​គាត់​ទៅ​ហ្នឹង​ដើម្បី​គេច​បញ្ហា គាត់​ទៅ​ដេក​លក់ គាត់​ដាក់​(​ការស្នើ​)​អ៊ីចឹង​ដើម្បី​ឲ្យ​កម្រើក​អារម្មណ៍​អ្នកនយោបាយ​។ ជា​អ្នកនយោបាយ​គេ​ត្រូវ​អ៊ីចឹង​ហើយ​”​។​

ក្រោយ​ការផ្ទៀងផ្ទាត់​ផែនទីរវាង​កម្ពុជា​ជាមួយ​ផែនទី​តម្កល់ទុក​នៅ​អង្គការសហប្រជាជាតិនិងបារាំង​មក លោកនាយក​រដ្ឋមន្ត្រី ហ៊ុន សែន បាន​បញ្ជា​ឲ្យ​មន្ត្រី​នៅ​ក្រោមបង្គាប់​បន្ត​បោះបង្គោល​ព្រំដែន​ជាមួយ​វៀតណាមនិង​ព្រមាន​​ចាត់​វិធានការ​ចំពោះ​អ្នក​រិះគន់​បញ្ហា​ព្រំដែនដែល​ថា​ប្រើប្រាស់​ផែនទី​ក្លែងក្លាយ​។​

ការបោះបង្គោល​ព្រំដែន​កម្ពុជានិង​វៀតណាម​បាន​ធ្វើឡើងកាលពី​ឆ្នាំ​២០០៦​។ ក្នុង​បណ្តោយ​ព្រំដែន​កម្ពុជានិង​វៀតណាមប្រវែង​១២៧០​គីឡូម៉ែត្រ ប្រទេស​ទាំង​ពីរ​បាន​កំណត់​ថាត្រូវ​បោះបង្គោល​ព្រំដែន​ចំនួន​៣៧៥​បង្គោល​។ របាយការណ៍​ដែល​គណៈកម្មាធិការ​ព្រំដែន​កម្ពុជា​បង្ហាញ​នៅ​ពាក់កណ្តាល​ឆ្នាំ​២០១៥​នេះ បង្គោល​ព្រំដែន​នៃ​ប្រទេស​ទាំង​ពីរ​ទើប​បោះ​បាន​ចំនួន​៨៣​ភាគរយ​៕

សូម​សរសេរ​មក​លោក ពៅ មេត្តា តាមរយៈ minpov@vodhotnews.com