ដោយ៖ ចក់ ចំរើន និងហ៊ុន សិរីវឌ្ឍន៍ | ថ្ងៃចន្ទ ទី2 វិច្ឆិកា 2015, 05:35 PM
http://vodhotnews.com
មនុស្ស៥នាក់ បានរងរបួសស្រាលកាលពីថ្ងៃអាទិត្យ ដោយសារការបាញ់កាំជ្រួចអបអរសាទរពិធីបុណ្យអុំទូកប្រចាំខេត្តស្វាយរៀង សាចទៅចំទីកន្លែងដែលជនរងគ្រោះស្នាក់នៅ។
លោក រៀម គៀង ចៅសង្កាត់ពោធិតាហោ ប្រាប់វីអូឌី(VOD)នៅថ្ងៃចន្ទនេះថាហេតុការណ៍នោះបានកើតឡើងនៅវេលាម៉ោងប្រមាណជា៧យប់ ក្នុងភូមិក្បាលស្ពាន សង្កាត់ពោធិតាហោ ក្រុងស្វាយរៀង ដោយសារគ្រាប់កំជ្រួចបាញ់មិនផ្ទុះ ហើយហោះទៅប៉ះចំកន្លែងដែលជនរងគ្រោះស្នាក់នៅ។ លោកបន្តថាអ្នកដែលរងរបួសទាំងអស់នោះសុទ្ធតែជាកីឡាករអ៊ុំទូកដែលមកពីខេត្តសៀមរាបនិងមានអាយុចាប់ពី៣០ដល់៥០ឆ្នាំ។ លោកបន្ថែមថាបច្ចុប្បន្ននេះកីឡាករដែលរងរបួសទាំងនោះត្រូវបានព្យាបាលនិងត្រឡប់ទៅផ្ទះវិញអស់ហើយ។
វីអូឌីបានព្យាយាមទាក់ទងស្នងការខេត្តស្វាយរៀង លោក កឹង ឃន តែលោកថាលោករវល់ប្រជុំ មិនអាចនិយាយបានពីបញ្ហានេះ។
គួរបញ្ជាក់ថាកាលពីថ្ងៃទី២៩ខែតុលា ឆ្នាំ២០១៤ យុវជនម្នាក់បានស្លាប់និងប៉ុន្មាននាក់ទៀតរងរបួសដោយសារឧបទ្ទវហេតុនៃការបាញ់កាំជ្រួចខុសបច្ចេកទេស ពេលអបអរសាទរការគ្រងរាជ្យរបស់ព្រះមហាក្សត្រដែលធ្វើឡើងនៅរាជធានីភ្នំពេញ៕
សរសេរមកកាន់លោក ចក់ ចំរើន តាមរយៈchomroeurn561@gmail.comនិងលោក ហ៊ុន សិរីវឌ្ឍន៍ តាមរយៈhunsirivadh@gmail.com
កាលណានិយាយពីរឿងគ្រឿថ្នាក់ដោយសារកាំជ្រួច គឺគេត្រូវរំលឹករឿងគ្រោះថ្នាក់កាលពីឆ្នាំ ចាស់កន្លងមកនៅមាត់ទន្លេត្រើយខាងកើត។
នេះគឺជាការធ្វេសប្រហែសរបស់ក្រុមប្រតិបត្តិការតែម្តង។
តើអង្គភាពឬ ក៏រដ្ឋត្រូវធ្វើយ៉ាងណាជាមួយអ្នករងគ្រោះទាំងនោះ? ឬក៏គ្រាន់តែមានជាអំណោយបន្តិចបន្តួច ហើយតម្រូវឲ្យអ្នករងគ្រោះអរគុណឯកឧត្តមអភិបាលខេត្ត ឬ ក៏ក្រុមកាកបាទក្រហម?
មិនមែនទេ គឺសំណងដ៏សក្តិសម។
ប្រយ័ត្នទៅ នេះគេហៅថាជាធាតុផ្សំពីកំហុសដែលនឹងនាំឲ្យខេត្តស្វាយរៀងអាចបាត់ ២ កៅអីតំណាងរាស្ត្រ ទៀត បើមិនគិតគូរ!!