លោក កឹម សុខា និងមន្ត្រីមួយចំនួនទៀតកំពុងសួរសុខទុក្ខលោក គង់ សភា។ រូបថត ហ្វេសប៊ុក
Tue, 3 November 2015
មាស សុខជា
ភ្នំពេញប៉ុស្តិ៍
ភ្នំពេញៈ លោក សម រង្ស៊ី មេដឹកនាំគណបក្សប្រឆាំងនឹងមកដល់កម្ពុជាវិញនៅយប់នេះបន្ទាប់ពីឆៀងចូលសួរសុខទុក្ខតំណាងរាស្ត្រពីររូបដែលស្ថានភាពរបួសនៅតែធ្ងន់ធ្ងរហើយកំពុងបន្តសម្រាកព្យាបាលនៅទីក្រុងបាងកកខណៈដែលគណៈកម្មការស៊ើបអង្កេតមួយបង្កើតឡើងដោយក្រសួងមហាផ្ទៃនៅតែពុំទាន់អាចចាប់ខ្លួនជនសង្ស័យណាម្នាក់ដែលវ៉ៃដំទៅលើអ្នកតំណាងរាស្ត្រទាំងពីររូបនេះនៅឡើយ។
លោក យ៉ែម បុញ្ញឫទ្ធិ អ្នកនាំពាក្យគណបក្សសង្គ្រោះជាតិបានឲ្យដឹងកាលពីម្សិលមិញថាលោក សម រង្ស៊ី ប្រធានគណបក្សនឹងជិះយន្តហោះពីបារាំងទៅសួរសុខទុក្ខលោក ញ៉យ ចំរើន និងលោក គង់ សភា នៅថៃមុនពេលត្រឡប់មកកម្ពុជាវិញនៅថ្ងៃនេះនៅម៉ោង ៧ នឹង ៣០ នាទីយប់។ លោកបានឲ្យដឹងថាតំណាងរាស្រ្តទាំងនេះនៅតែស្ថិតក្នុងស្ថានការណ៍ធ្ងន់ធ្ងរបន្ទាប់ពីការវះកាត់។
លោក កឹម សុខា អនុប្រធានគណបក្សសង្គ្រោះជាតិដែលទើបតែត្រូវបានតំណាងរាស្ត្រឯកបក្សបោះឆ្នោតដកចេញពីអនុប្រធានទី ១ រដ្ឋសភាក៏បានសរសេរលើទំព័រហ្វេសប៊ុករបស់លោកកាលពីម្សិលមិញថាបើទោះបីជាតំណាងរាស្រ្តទាំងពីររូបបានវះកាត់រួចហើយក៏ដោយប៉ុន្តែជំងឺនៅតែធ្ងន់ធ្ងរ។ លោកបន្តថា៖ «តំណាងរាស្រ្តទាំងពីរត្រូវតែបន្តការព្យាបាលជំងឺនៅមន្ទីរពេទ្យទៀត»។
ទាក់ទងនឹងការស៊ើបអង្កេតរកជនដៃដល់ និងអ្នកនៅពីក្រោយការវ៉ៃអ្នកតំណាងរាស្ត្រទាំងនេះវិញលោក គៀត ច័ន្ទថារិទ្ធ អ្នកនាំពាក្យនគរបាលជាតិបានឲ្យដឹងកាលពីម្សិលមិញថាខណៈដែលនគរបាលកំពុងទទួលបានតម្រុយជាច្រើនដើម្បីចាប់ខ្លួនអ្នកវាយប្រហារគណៈកម្មការនេះក៏បានកោះអ្នកបើកបររថយន្តឲ្យលោក គង់ សភា មកធ្វើការសាកសួរម្តងទៀតដើម្បីទទួលបានព័ត៌មានបន្ថែមអំពីករណីអំពើហិង្សានេះ។
លោកបន្តថា នគរបាលបានទៅស្រាវជ្រាវ និងស៊ើបអង្កេតនៅកន្លែងកើតហេតុនៅរដ្ឋសភាតាមបច្ចេកទេស។
លោកថ្លែងថា៖ «យើងត្រូវការកិច្ចសហការ។ យើងក៏បានទទួលរូបថតពីហ្វេសប៊ុកហើយយើងមានរូបថតខ្លះផងដែរ។ យើងមានតម្រុយមួយចំនួនរួចហើយប៉ុន្តែយើងត្រូវប្រមូលភ័ស្តុតាងបន្ថែមទៀត»។
ទាក់ទងនឹងរូបថតនៃការវាយប្រហារត្រូវបានគេបង្ហោះតាមហ្វេសប៊ុកលោក ច័ន្ទថារិទ្ធ បានបញ្ជាក់ថារូបថតទាំងនោះមិនមែនជារូបថតស្របច្បាប់ទេដូច្នេះនគរបាលមានការពិបាកក្នុងការយករូបថតទាំងនោះមកធ្វើជាភ័ស្តុតាងប៉ុន្តែលោកអះអាងថាប្រសិនបើម្ចាស់រូបសហការផ្តល់រូបថតទាំងនោះទៅឲ្យនគរបាលវាងាយស្រួលសម្រាប់នគរបាលក្នុងការយករូបថតទាំងនោះធ្វើជាភ័ស្តុតាងដើម្បីចាប់ខ្លួនអ្នកវាយប្រហារ។
លោកបន្ថែមថា៖ «យើងសូមស្នើថាបើអ្នកមានរូបថតមកសហការនឹងយើង យើងអាចរកឃើញជនល្មើសឆាប់ៗ។ សរុបមកយើងមានតម្រុយមួយជំហានរួចហើយ»។
នៅពេលសួរថាតើគណៈកម្មការសង្ឃឹមថារកឃើញជនល្មើសឬអត់? នៅពេលមានរូបថតជាច្រើនបង្ហោះលើហ្វេសប៊ុកលោក ច័ន្ធថារិទ្ធ មិនបានបញ្ជាក់ពីលទ្ធភាពនៃការរកឃើញជនល្មើសទេដោយលោកលើកឡើងថាក្រៅពីរូបថតជាច្រើនដែលបង្ហោះនៅលើហ្វេសប៊ុកក្រុមស៊ើបអង្កតក៏មានឯកសារដទៃទៀតផងដែរ។
កាលពីម្សិលមិញលោក ផល ភក្តី អ្នកបើកបរឲ្យលោក គង់ សភា បានបដិសេធធ្វើអត្ថាធិប្បាយ។ ប៉ុន្តែលោក បុញ្ញឫទិ្ធ បានថ្លែងថាអ្នកបើកបរឲ្យលោក គង់ សភា ត្រូវបានកោះឲ្យទៅបំភ្លឺម្តងរួចហើយដូច្នេះមិនមានអ្វីត្រូវបំភ្លឺបន្ថែមទៀតទេ។
ទោះជាយ៉ាងណា លោក បុញ្ញឫទ្ធិ មិនបានអត្ថាធិប្បាយច្រើនអំពីការងារ និងតួនាទីរបស់គណៈកម្មការនេះទេដោយលើកឡើងថា បើមានតម្រុយជាច្រើនគណៈកម្មការអាចនឹងរកឃើញជនល្មើសឆាប់ៗ។
លោក ខៀវ សុភ័គ អ្នកនាំពាក្យក្រសួងមហាផ្ទៃបានឲ្យដឹងកាលពីថ្ងៃសុក្រថាអ្នកបើកបរម្នាក់របស់លោក គង់ សភា ត្រូវបានគណៈកម្មាការហៅមកសាកសួរលើកទីមួយកាលពីថ្ងៃទី ២៩ ខែតុលា។
អ្នកបើកបរបានប្រាប់ថា នៅថ្ងៃទី ២៦ តុលា លោកតំណាងរាស្ត្រ គង់ សភា បានចាកចេញពីកិច្ចប្រជុំរដ្ឋសភានៅម៉ោង ១២ និង ៣០ នាទីដែលឲ្យលោកមកទទួលនៅច្រកទ្វារសភាផ្នែកខាងត្បូង។ នៅពេលចាកចេញបានប្រមាណ ២០ ម៉ែត្រពីរបងសភាក៏មានមនុស្សប្រុសម្នាក់បានមកឈរកាក់រថយន្ត និងបានបើកទ្វារខាងស្តាំដោយសារមិនបានចាក់សោចាប់អូសកអាវលោក សភា ចេញពីរថយន្ត។ ក្រោយមកក៏មានមនុស្សប្រមាណ ១០ នាក់ផ្សេងទៀតមកវ៉ៃទាត់ធាក់តំណាងរាស្ត្រហើយលោកក៏បានលើកលោក សភា ដាក់ចូលក្នុងរថយន្តវិញ។
លោក សុភ័គ បញ្ជាក់ថា៖ «អ្នកបើកបរមិនបានចាំមុខអ្នកវ៉ៃនោះទេ។ សម្តេចក្រឡាហោម ស ខេង បានជំរុញឲ្យសមត្ថកិច្ចធ្វើការឲ្យលឿនដើម្បីវែកមុខជនប្រព្រឹត្តព្រោះនេះជាអំពើហិង្សាដែលបានថ្កោលទោសដោយរដ្ឋាភិបាលប្រជាជន និងជាភាពអាម៉ាស់មួយរបស់ជាតិ»៕ TK
រាយការណ៍បន្ថែមដោយ ឆាយ ច័ន្ទនីដា
The probe into the violence is testing the capability of the police. I wonder why the investigation committee does’t start the investigation with suspects in public facebook.