អតិថិជនមកទិញបន្លែសរីរាង្គដែលមានដាក់លក់នៅហេបភី ហ្វាម។ វុទ្ធី
Tue, 3 November 2015
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: ដោយមើលឃើញចំពោះបញ្ហាសុខភាពចំណីអាហារប្រចាំថ្ងៃ កាន់តែបង្កផលប៉ះពាល់បន្តិចម្ដងៗ ដល់សុខភាពអ្នកបរិភោគ និងធ្វើឲ្យប្រឈមនឹងជំងឺផ្សេងៗ ដែលបណ្តាលមកពីការទទួលទានបន្លែ សាច់ ផ្លែឈើគ្មានប្រភពច្បាស់លាស់ និងគ្មានការត្រួតពិនិត្យត្រឹមត្រូវនោះ ហេបភី ហ្វាម ក៏ចូលខ្លួនមកបម្រើសេវាទទួលទានប្រចាំថ្ងៃដើម្បីរក្សាសុខភាពលោកអ្នកជាមួយផលិតផលកសិកម្មធម្មជាតិខ្មែរសុទ្ធសាធ។
ជាមួយនឹងការរំលេចខ្លួនលើទីតាំងថ្មី នៅខាងកើតស្តុបបូកគោ ហេបភី ហ្វាម ជាស្ដង់លក់បន្លែ ត្រី និងសាច់ ដែលមានប្រភពអាហារប្រសូតចេញពីដៃ និងគំនិតតស៊ូបង្កបង្កើនរបស់កសិកម្មខ្មែរមកពីខេត្តកំពត តាកែវ កំពង់ស្ពឺ ព្រៃវែង និងស្វាយរៀង ប្រើជីធម្មជាតិ គ្មានជាតិគីមីនោះ អ្នកគ្រប់គ្រងហេបភី ហ្វាម បានលើកឡើងក្នុងមោទនភាពថា៖ «ហេបភី ហ្វាម ជាសភាវៈដែលទ្រទ្រង់សរីរាង្គកាយរបស់មនុស្សយើង ឲ្យមានរាងកាយមាំមួន សុខភាពល្អ ប្រាជ្ញាវាងវៃជាមួយនឹងការទទួលទានប្រភេទអាហារ ប្រកបដោយអនាម័យ និងផ្ដល់ប្រភពច្បាស់លាស់ពីបន្លែធម្មជាតិ ដែលហេបភី ហ្វាម ប្រមូលពីដៃប្រជាកសិករនៅតាមបណ្តាខេត្តជាដៃគូ»។
បង្ហាញពីគោលបំណងចូលរួមចែករំលែកនូវការទទួលខុសត្រូវក្នុងសង្គម និងដើម្បីបញ្ចៀសពីភាពប្រឈមនៃសុខភាពមនុស្សដែលញាំញីដោយសារធាតុគីមីពីបន្លែ ត្រី សាច់ មិនមានប្រភពច្បាស់លាស់ ហេបភី ហ្វាម បានអះអាងថា ខ្លួនមានប្រភពបន្លែ និងត្រី និងសាច់ច្បាស់លាស់ចេញពីដៃប្រជាកសិករពិតៗ មានអនាម័យ សុក្រឹតភាព សេវាកម្មល្អ ដែលសុទ្ធជាផលិតផលក្នុងស្រុកមានតម្លៃសមរម្យ។
ជាមួយគ្នានោះដែរ អ្នកគ្រប់គ្រង ហេបភី ហ្វាម បានបញ្ជាក់ថា៖ «ដើម្បីសម្រេចនូវគោលការណ៍បម្រើសេវាសុខភាពដ៏ប្រពៃនេះ ហេបភី ហ្វាម ដ្បិតតែដើម្បីប្រាក់ចំណេញមែន តែចំណេញនោះ បានខិតខំព្យាយាមបំផុតដើម្បីនាំយកផលិតផលធម្មជាតិជូនប្រជាជនកម្ពុជា។ ហេបភី ហ្វាម ឲ្យបុគ្គលិកចុះទៅប្រមូលទិញផលិតផលកសិកម្មធម្មជាតិទាំងនេះដល់ទីកន្លែង បើទោះបីជាឆ្ងាយនៅដល់កំពត ឬក៏ស្វាយរៀងក៏ដោយ»។
យ៉ាងណាមិញ ហេបភី ហ្វាម មិនមែនបម្រើតែលសេវាកម្មម្ហូប បន្លែ ត្រី និងសាច់នោះទេ ប៉ុន្ដែខ្លួនក៏មានលក់នូវផលិតផលដែលច្នៃចេញពីធម្មជាតិដទៃទៀត ដូចជា តែម្រុំ តែធម្មជាតិ និងផលិតផលច្នៃពីដៃកសិករជាច្រើនទៀតផងដែរ។
លើសពីការឲ្យតម្លៃផលិតផលចេញពីដៃកូនខ្មែរនោះ អ្នកគ្រប់គ្រង ហេបភី ហ្វាម ប្រាប់ថា៖ «លើកស្ទួយ និងឲ្យតម្លៃផលិតផលក្នុងស្រុកមានប្រភពច្បាស់លាស់ និងលើកកម្ពស់ជំនាញវិជ្ជាជីវៈនៃវិស័យកសិកម្ម ដែលទាក់ទងទៅនឹងការដាំដុះ និងចិញ្ចឹមសត្វដោយលក្ខណៈធម្មជាតិផងដែរ»។
បន្ថែមការលើកឡើងនោះ ហេបភី ហ្វាម ដែលតែងតែអះអាងអំពីក្ដីបារម្ភចំពោះសុខភាពប្រជាជនខ្មែរក្នុងការទិញផលិតផលនាំចូលមិនច្បាស់លាស់ បញ្ជាក់ថា៖ «ហេបភី ហ្វាម លេចរូបរាងនេះក៏ជាការបង្កើនឱកាសរកប្រាក់ចំណូលសម្រាប់កសិករនៅតាមជនបទទៀតផង»៕
Thank you