ដោយ៖​ ឃុត សុគន្ធនិងស៊ុន ណារិន​​ | ថ្ងៃសុក្រ ទី25 ធ្នូ 2015, 02:57 PM
http://vodhotnews.com

សមត្ថកិច្ច​ចុះបង្រ្កាបកម្មករនៅវាលស្រែ កាលពីថ្ងៃអង្គារ (រូបថតដោយ ជា សុបញ្ញា ប្រជា​ពលរដ្ឋ​អ្នក​សារព័ត៌មានរបស់វីអូឌី​​)

អ្នកបើក​រថយន្ត​ឲ្យ​កម្មករ ចំនួន​៦នាក់ដែលត្រូវចាប់ខ្លួន​កាលពីថ្ងៃ​ពុធ ត្រូវបានតុលាការ​ចោទប្រកាន់ពីបទដឹកនាំបាតុកម្ម​ ​ នាំ​ឲ្យ​មាន​ហិ​​ង្សា​បំផ្លិចបំផ្លាញទ្រព្យសម្បត្តិសាធារណៈ​និងឯកជន។​

មន្ត្រី​សម្រប​សម្រួល​នៃ​អង្គការ​សិទ្ធិ​មនុស្ស​លីកាដូប្រចាំ​ខេត្ត​ស្វាយរៀង លោក នុត បូពិណ្ណរ័ត្ន ប្រាប់វីអូឌី​​នៅព្រឹកថ្ងៃនេះ តុលាការ​បាន​សាកសួរ​អ្នក​បើក​រថយន្ត​ទាំង​៦នាក់នោះហើយ​សម្រេច​ចោទប្រកាន់ហិ​​ង្សា​បំផ្លិច​បំផ្លាញទ្រព្យសម្បត្តិសាធារណៈ​និងឯកជន ហើយ​សម្រេច​បញ្ជូន​ទៅឃុំខ្លួននៅពន្ធនាគារ។​ លោក​បន្ត​ថា​ការចាប់ខ្លួន​និង​ការ​ចោទប្រកាន់នេះ​អាច​នាំ​ឲ្យ​​ការតវ៉ារបស់កម្មករកាន់តែមាន​ភាព​តានតឹង។​ លោក​បន្ថែម​ថាលោក​នឹង​ហៅក្រុមគ្រួសារ ដើម្បីពិភាក្សារកមេធាវី​ជួយការពាររឿងនេះ។​

លោក​មានប្រសាសន៍ថា៖ "មានការចរចាជាមួយតំណាងមន្ទីរ តំណាងខេត្ត តំណាងសហជីពអីអស់ហើយ ស្រាប់តែមានការចាប់ខ្លួនបន្តទៀត អញ្ចឹងវាហាក់ដូចជាផ្ទុយទៅនឹងការចរចា អញ្ចឹងអាកម្តៅ​នឹងវាអាចនឹងឡើងវិញ"។

អ្នកនាង ស្រី មករា ដែលមានប្តី​ឈ្មោះ ពេន សម្បត្តិ អា​យុ​២៨ឆ្នាំ​ មានប្រសាសន៍ថាប្តី​​ត្រូវបានសមត្ថកិច្ចចា​​ប់ខ្លួន​កាលពីម៉ោង​១២ថ្ងៃ ថ្ងៃ​ពុធ។  អ្នកនាង​និយាយ​ថា​​អ្នក​បើក​រថយន្តម្នាក់ដែលត្រូវ​សមត្ថកិច្ច​ចាប់ខ្លួន បាន​ចោទថា​ប្តីរបស់អ្នកនាងជាប់ពាក់ព័ន្ធ​នឹង​ការ​គប់​រថយន្តរបស់សមត្ថកិច្ច។ អ្នកនាងចាត់ទុកករណីនេះ​ជា​រឿងអយុត្តិធម៌។ អ្នកនាងមានប្រសាសន៍ថា៖ "ការចោទប្រកាន់នឹងអយុត្តិធម៌ណាស់ ប្តីខ្ញុំមិនដឹងអីផង ព្រោះប្តីខ្ញុំនៅផ្ទះនិង​ពេលគេកូដកម្ម គេមិនឲ្យឡានទៅផង ហើយប្តីខ្ញុំនៅផ្ទះ…"។

អ្នកនាង​ ឡឹក ពុទ្ធី ត្រូវជាក្រុមគ្រួសារ​របស់អ្នក​បើករថយន្ត​ម្នាក់ ប្រាប់វីអូឌីថាបងជីដូនមួយរបស់អ្នកនាង ឈ្មោះ ​​ឡឹក វិចិត្រ អាយុ២៩ឆ្នាំ ត្រូវបានសមត្ថកិច្ច​ហៅទៅសាកសួរ​នៅម៉ោង​ប្រមាណ​១១ព្រឹក កាលពីថ្ងៃពុធ​។ អ្នកនាង​បន្តថា​ការ​ចោទប្រកាន់របស់តុលាការ​ជា​រឿងអយុត្តិធម៌​ចំពោះ​បងប្អូនជីដូនមួយ​របស់អ្នកនាង។​

មាត្រា៤១០នៃក្រមព្រហ្មទណ្ឌចែងថា​បទល្មើស​ធ្វើឲ្យខូចខាតដោយចេតនា បំផ្លិចបំផ្លាញធ្វើឲ្យទ្រុឌទ្រោមឬធ្វើឲ្យខូចខាតទ្រព្យរបស់អ្នកដទៃ ត្រូវផ្តន្ទាទោសដាក់ពន្ធ​នាគារពី៦ខែទៅ២ឆ្នាំនិងពិន័យជាប្រាក់ចន្លោះពី​១លានទៅ៤លានរៀល។

ហ្វេសប៊ុក​របស់ស្នងការដ្ឋាននគរបាលខេត្តស្វាយរៀង ឲ្យ​ដឹង​ថានៅព្រឹកថ្ងៃសុក្រនេះ កម្មករ​នៅតំបន់សេដ្ឋកិច្ចពិសេសក្រុងបាវិតបាន​ចូលធ្វើការ​ធម្មតាវិញ។​ ហ្វេសប៊ុក​បន្ត​ថា​កម្លាំងអន្តរាគមន៍ការពារបាតុកម្មរបស់ស្នងការដ្ឋាននគរបាលខេត្តបាន​ត្រៀមទប់ទល់និងបង្ក្រាប ប្រសិន​បើ​មាន​ការ​តវ៉ាបន្តទៀត។​

ប្រធានមន្ទីរការងារខេត្តស្វាយរៀងលោក ហាស ប៊ុនធី បាន​ហៅក្រុមអ្នកតវ៉ាជាកម្មករ​ទាំង​នោះថាជាកុបករ ដោយ​លោក​ថា​​ពួកគេ​​បានគប់ដុំថ្មទៅលើអគារ​រោងចក្រដែលគេកំពុងតែធ្វើការនិងមានការប្រើហិ​ង្សាគប់ដុំថ្ម​ធ្វើឲ្យបែក​កញ្ចក់​រថយន្ត​បាញ់ទឹករបស់អាជ្ញាធរផងដែរ។

​សមាគមរោងចក្រកាត់ដេរនៅកម្ពុជាបានចេញសេចក្តីថ្លែងការណ៍មួយ​ដោយថ្កោលទោសចំពោះហិង្សា​នេះនិង​អំពាវនាវ​ឲ្យ​រដ្ឋាភិបាល​ប្រើវិធានការ​ច្បាប់​ ដោយ​មិនមានការ​សម្របសម្រួល។​

កាលពីថ្ងៃអង្គារ សហជីពចំនួន៤ដែលមានមូលដ្ឋានប្រចាំខេត្តស្វាយរៀងបានចេញសេចក្តីថ្លែងការណ៍​រួមមួយ ដោយ​អំពាវនាវឲ្យកម្មករនៅតំបន់សេដ្ឋកិច្ចពិសេសក្រុងបាវិតដែលបានតវ៉ា​តាំងពីថ្ងៃទី​១៦ខែធ្នូ ចូលធ្វើការធម្មតាវិញ។ កម្មករ​បានបញ្ឈប់ការតវ៉ា​នៅថ្ងៃពុធនិងថ្ងៃព្រហស្បតិ៍នេះ។

សហជីពក៏អំពាវនាវ​ឲ្យ​តុលាការ​ដោះលែងកម្មករ​៤នាក់ដែលសមត្ថកិច្ច​ចាប់ខ្លួន​និងតុលាការ​ចោទប្រកាន់​ពី​បទ​បំផ្លិចបំផ្លាញទ្រព្យសម្បត្តិសាធារណៈនិងបញ្ជូនទៅឃុំខ្លួន​បណ្តោះអាសន្ន។​ អ្នកទាំងបួននាក់កំពុងជាប់ឃុំខ្លួន​បណ្តោះអាសន្ន​និង​មេធាវីកំពុង​រៀបចំ​ឯកសារ​ឲ្យ​នៅក្រៅឃុំបណ្តោះអាសន្ន។​

គួ​របញ្ជាក់ថាកម្មកររោងចក្របានតវ៉ាតាំងពីថ្ងៃទី១៦ខែធ្នូ ដើម្បីទាមទារឲ្យមានការដំឡើង​ប្រាក់ឈ្នួលបន្ថែ​ម​លើ​​ស​​ពី១៤​០​ដុល្លារ ដែលរដ្ឋាភិបាលបានប្រកាសកាលពីខែតុលា៕

សរសេរមកកាន់លោក ឃុត សុគន្ធ តាមរយៈsokun@vodhotnews.comនិងលោក ស៊ុន ណារិន តាមរយៈsun_narin@vodhotnews.com