តារាសម្ដែង ទឹម រដ្ឋា និង សូដា នីតា។ វុទ្ធី
Fri, 25 December 2015
ស៊ូ វុទ្ធី
ភ្នំពេញប៉ុស្តិ៍
ភ្នំពេញ: ពញ្ញាក់ភាពទាក់ទាញ ទាំងភ្ញាក់ផ្អើលពីក្បួនដង្ហែស៊ីក្លូចំនួន ១៩ គ្រឿងជុំវិញផ្សារធំថ្មី ធ្វើជាជំនិះសម្រាប់តារាសម្តែងប្រុសស្រី និងមានតារាសម្តែងជនជាតិស្បែកខ្មៅ ក្នុងដៃម្នាក់ៗសុទ្ឌតែមានកាន់បង្ហាញស្លាកភាពយន្ដរឿង «អាកុក អាច្រវា» ដែលត្រូវបានធ្វើការសម្ពោធចាក់បញ្ចាំងផ្លូវការនៅនឹងមុខផ្សារសុរិយា។
អាកុក អាច្រវា ជាវណ្ណកម្មទី ២ របស់ផលិតកម្មមាតុចក្រហ្វីម បន្ទាប់ពីរឿង «អាព្រឿងងាប់ហើយ» សហការផលិតជាមួយផលិតកម្មមហាហង្ស។ ក្នុងសំនៀងស្រដៀងនឹងពាក្យ អាគុក អាច្រវាក់ ភាពយន្ដដុំ «អាកុក អាច្រវា» ក៏ជាភាពយន្ដមួយជាប់ក្នុងមហោស្រពភាពយន្ដអន្ដរជាតិលើកទី ៦ ក្នុងចំណោម ៨ រឿងរបស់ភាពយន្ដខ្មែរ។
តារាសម្ដែង ទូច ស្រីលកល្ខណ៍ និង ទឹម រដ្ឋា ជិះស៊ីក្លូផ្សព្វផ្សាយរឿង អាកុក អាច្រវា។ វុទ្ធី
ពីស្នាមញញឹមសាទរនិងវណ្ណកម្មរបស់ខ្លួន សម្ពោធចាក់បញ្ចាំង ក្រោយជាប់ក្នុងមហោស្រពភាពយន្ដ និងរំលេចពីក្បួនដង្ហែស៊ីក្លូ ដែលជារូបភាពបង្ហាញពីការអភិរក្សនោះ លោក ហ៊ុយ យ៉ាឡេង បានអះអាងថា៖ «អាកុក អាច្រវា»មិនត្រឹមតែជារឿងបែបកំប្លែងនោះទេ ថែមទាំងបង្កប់ន័យអប់រំ ទៅកាន់អ្នកទស្សនា ដើម្បីឲ្យក្មេងៗ យល់ពីគុណតម្លៃរបស់ឪពុកម្តាយទៀតផង»។
ចាងហ្វាងវ័យក្មេងរូបនេះថ្លែងថា៖ «ពិសេសទៀតនោះ នៅក្នុងថ្ងៃសម្ពោធនេះដែរ ខ្ញុំក៏បានរៀបចំស៊ីក្លូយ៉ាងច្រើន ដើម្បីឲ្យតារាល្បីៗ និងក្រុមការងារ បានឡើងជិះ ជុំវិញផ្សារថ្មី ហើយលើសនេះក្នុងឱកាសចាក់បញ្ចាំងរឿង«អាកុក អាច្រវា» រយៈពេល ៥ ថ្ងៃនេះ ក៏មានដាក់តាំងស៊ីក្លូ នៅមុខរោងភាពយន្ដ សុរិយា ផ្លាទីនីមផងដែរ»។
ក្រុមគ្រួសារខាងស្វាមីមកអបអរថ្ងៃសម្ពោធរឿងសម្ដែងដោយអ្នកនាង ទូច ស្រីលក្ខណ៍។ វុទ្ធី
ជាមួយនឹងសកម្មភាពដង្ហែស៊ីក្លូជុំវិញផ្សារថ្មី ទាក់ទាញចំណាប់អារម្មណ៍មហាជន អមដោយវត្តមានតារាសម្តែងល្បីៗជិះដង្ហែនោះ នៅលើឆាកពិធីសម្ភោធរឿង «អាកុក អាច្រវា» នៅខាងមុខផ្សារសុរិយា តារាសម្តែងលេងសក់ លោក វី ជីវ័ន្ដ ក៏បានទាញយកការភ្ញាក់ផ្អើលបន្ថែម ជាមួយការបកស្រាយបទចម្រៀងសម័យដើម បទ «ជិះស៊ីក្លូ» រៀបរាប់ពីដំណើរកម្សាន្ដជុំវិញផ្សារថ្មី។
ខណៈតារាចម្រៀងថ្មី មែកធាងរបស់ផលិតកម្មហង្សមាស លោក វង្ស មុន្នីរតនា ក៏បានផ្ដល់កិត្តិយសឡើងបកស្រាយបទចម្រៀង ស៊ូឃ្លាត ទាញការចាប់អារម្មណ៍ មហាជនមកសម្រុកចូលទស្សនាយ៉ាងណែនណាន់តាន់តាប់។
«អាកុក អាច្រវា» នឹងចាប់ផ្តើមចាក់បញ្ចាំងពីថ្ងៃទី ២៤ ខែធ្នូទៅ គ្រប់រោងភាពយន្ដទំនើបៗ ដូចជា Platinum លេជេន និង Major Cineplex ៕
>. រដ្ឋាភិបាល ខ្មែរ ត្រូវលើកស្ទួយ ស៊ីក្លូ ដែលជា កេរ្ត៍ តំណែល ខ្មែរ អោយបាន គង់វង្ស !