ដោយ៖ អុិត សូធឿត | ថ្ងៃអង្គារ ទី5 មករា 2016, 04:59 PM
http://vodhotnews.com
មន្ត្រីជំនាញនៃនាយកដ្ឋានដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូន បញ្ជាក់ថា ប្រជាពលរដ្ឋមិនត្រូវបានតម្រូវឲ្យចូលរៀនបើកបរម៉ូតូនោះទេ តែត្រូវឆ្លងកាត់ការប្រឡង ដើម្បីទទួលបានប័ណ្ណបើកបរម៉ូតូ។
អនុប្រធាននាយកដ្ឋានដឹកជញ្ជូនផ្លូវគោកនៃក្រសួងសាធារណការ និងដឹកជញ្ជូនលោក សូ ពីសី ប្រាប់វីអូឌី(VOD)នៅរសៀលថ្ងៃអង្គារនេះថា កាលពីព្រឹកមិញនេះ ក្រុមមន្ត្រីជំនាញរបស់ក្រសួងបានជួបប្រជុំគ្នាដើម្បីពិភាក្សាពីការសម្រួលដំណើរការនៃការផ្ដល់ប័ណ្ណបើកបរម៉ូតូដល់ប្រជាពលរដ្ឋ។ លោកថា ក្រោយកិច្ចប្រជុំ ក្រុមការងារបានរៀបចំជាសេចក្ដីព្រាងប្រកាសមួយដែលលោកថានឹងត្រូវដាក់ជូនរដ្ឋមន្ត្រីចុះហត្ថលេខាក្នុងពេលឆាប់ៗ។
លោក សូ ពីសី ឲ្យថា បើតាមសេចក្ដីព្រាងនោះ ក្រសួងនិងមន្ទីរសាធារណការ ស្ថាប័នពាក់ព័ន្ធមួយចំនួននឹងបើកវគ្គបង្រៀនច្បាប់និងផ្លាកសញ្ញាចរាចរណ៍ដល់ប្រជាពលរដ្ឋដោយឥតគិតថ្លៃ តែពុំមានបង្រៀនកាន់ដៃចង្កូតនោះទេ ហើយរៀបចំការប្រឡងនៅរសៀលថ្ងៃដដែល។ ទោះយ៉ាងណា លោកថាប្រជាពលរដ្ឋក៏អាចរៀនច្បាប់ និងផ្លាកចរាចរណ៍ដោយខ្លួនឯងបាន តែត្រូវទៅប្រឡងដើម្បីបានប័ណ្ណបើកបរសម្រាប់ម៉ូតូតូចដែលមានកម្លាំង១២៥សេសេចុះ។ ចំណែកប័ណ្ណបើកបរម៉ូតូធំដែលមានកម្លាំងលើសពី១២៥សេសេ គឺត្រូវមានវិញ្ញាបនបត្របញ្ជាក់ការសិក្សាពីសាលាពីការរៀនបើកបរ និងឆ្លងកាត់ការប្រឡង។
លោកមាន ប្រសាសន៍៖ “ប្រកាសមួយដាច់ដោយឡែកសម្រាប់ការប្រឡងយកប័ណ្ណបើកបរម៉ូតូហ្នឹងណា គឺមានការរៀន រៀនទ្រឹស្ដី និងប្រឡងដៃចង្កូតអីធម្មតា ក៏ប៉ុន្តែប្រសិនបើគាត់រៀនម៉ូតូប្រភេទ ក១ ក្រោម១២៥សេសេចុះហ្នឹងគឺមិនបាច់ចូលសាលាទេ ហើយមកប្រឡងតែម្ដង… បើគាត់រៀនដោយខ្លួនឯងក៏បានដែរ ឲ្យតែប្រឡងជាប់… ហើយយើងបានបន្ធូរដែរ ក្នុងប្រកាសហ្នឹង សេចក្ដីព្រាងប្រកាសព្រោះអីឯកឧត្ដមរដ្ឋមន្ត្រីគាត់អត់ទាន់ស៊ីញ៉េទេប្រកាសហ្នឹង យើងព្រាងទេណា គឺពីមុនយើងប្រឡងម៉ូតូទ្រឹស្ដី យើង[មាន] ៤០សំណួរ ឥឡូវយើងបានបន្ថយត្រឹម១៥សំណួរទេ”។
លោក សូ ពីសី អះអាងដែរថា ក្រសួង និងមន្ទីរសាធារណការនឹងចុះទៅរៀបចំវគ្គបណ្ដុះបណ្ដាល និងការប្រឡងយកប័ណ្ណបើកបរដល់មូលដ្ឋានផងដែរ។
ការលើកឡើងនេះស្របពេលដែលលោកនាយករដ្ឋមន្ត្រី ហ៊ុន សែន បានប្រកាសនៅក្នុងពិធីសម្ពោធដាក់ឲ្យប្រើប្រាស់ជាផ្លូវការស្ពានអាកាសតិចណូ ឬ “ស្ពានអាកាស៥មករា” នៅព្រឹកនេះថា ប្រជាពលរដ្ឋអាចទៅធ្វើប័ណ្ណបើកបរម៉ូតូបានដោយពុំចាំបាច់រៀនបើកបរម៉ូតូនោះទេ ដោយលោកអះអាងថា គ្រប់គ្នាចេះបើកម៉ូតូស្រាប់ហើយ។ ទោះយ៉ាងណា លោកនាយករដ្ឋមន្ត្រីបានបញ្ជាឲ្យសាខារបស់ក្រសួងសាធារណការនិងដឹកជញ្ជូននៅគ្រប់ទីកន្លែងបង្រៀនប្រជាពលរដ្ឋពីច្បាប់ចរាចរណ៍ដោយធ្វើការផ្សព្វផ្សាយឲ្យបានទូលំទូលាយ។
លោកមានប្រសាសន៍ថា៖ “ហើយក៏មិនចាំបាច់ទៅរៀនបើកបរម៉ូតូទេ ត្រឹមតែអាម៉ូតូ! … ទៅបើកស្អី ធ្វើឲ្យតែម្ដងទៅ! តែយើងត្រូវធ្វើអី? ក្រសួងសាធារណការនិងដឹកជញ្ជូន ដែលមាននៅគ្រប់ទីកន្លែង ត្រូវខិតខំបង្រៀនបងប្អូនពីច្បាប់ចរាចរណ៍។ មិនមែនបង្រៀនបើកបរទេ បង្រៀនពីច្បាប់ចរាចរណ៍វិញ ដើម្បីឲ្យដឹងថាមុនពេលបត់គេត្រូវធ្វើម៉េច អាផ្លូវណាទៅយ៉ាងម៉េច ផ្លូវណាទៅយ៉ាងម៉េច ហើយបើអាចធ្វើបានផលិតស្ពតទៅ ចាក់តាមទូរទស្សន៍ បង្រៀនតាមទូរទស្សន៍”។
លោកនាយករដ្ឋមន្ត្រីក៏បានប្រកាសបញ្ចុះតម្លៃក្នុងការធ្វើប័ណ្ណបើកបរម៉ូតូផងដែរ។ លោកថ្លែងថា ម៉ូតូត្រូវបានបែងចែកជាពីរប្រភេទគឺកម្លាំងចាប់ពី៤៩សេសេដល់១២៥សេសេ ដែលលោកថាមានប្រមាណ៩៥%នៃម៉ូតូសរុបនៅក្នុងប្រទេសកម្ពុជា និងប្រភេទកម្លាំងចាប់ពី១២៦សេសេឡើងទៅដែលលោកថាមានប្រមាណ៥%។ លោកបន្តថាតម្លៃសម្រាប់ធ្វើប័ណ្ណបើកបរម៉ូតូប្រភេទទី១ត្រូវបានកាត់បន្ថយពី៦០០០០រៀលមក២៥០០០រៀល និងពុំចាំបាច់មានការពិនិត្យសុខភាពនោះទេ។
លោក ហ៊ុន សែន បន្តទៀតថា ចំណែកប័ណ្ណបើកបរម៉ូតូធំដែលមានកម្លាំងលើសពី១២៦សេសេត្រូវបន្ថយពីតម្លៃ៦០០០០រៀលមកនៅ៤០០០០រៀលនិងត្រូវឆ្លងកាត់ការត្រួតពិនិត្យសុខភាពដែលត្រូវបង់ថ្លៃសេវា១០០០០រៀល។ លោក ហ៊ុន សែន ឲ្យដឹងទៀតថា ការប្រឡងឡើងវិញគឺមិនតម្រូវឲ្យបង់ថ្លៃសេវានោះទេ។
បើតាមលោកនាយករដ្ឋមន្ត្រី បច្ចុប្បន្ន កម្ពុជាមានម៉ូតូចំនួន២ ៧១៤ ១៩៣ គ្រឿង តែអ្នកដែលមានប័ណ្ណបើកបរមានតែ១៥៧៣៥១នាក់ប៉ុណ្ណោះ គឺស្មើនឹង៥,៨ភាគរយ៕
អានអត្ថបទ៖ នាយករដ្ឋមន្ត្រីប្រកាសថា ពលរដ្ឋអាចធ្វើប័ណ្ណបើកបរម៉ូតូបានដោយពុំចាំបាច់រៀនបើកបរនោះទេ
សរសេរមកលោក អុិត សូធឿត តាមរយៈ sothoeuth@vodhotnews.com
សូមគាំទ្រទាំងស្រុងនូវវិធានការណ៏នេះ។
ពត៌មាននិងច្បាប់ស្តីពីការបើកបរ និងការរៀនបើកបរត្រូវផ្តល់ជាមុនៗនឹងពង្រឹងច្បាប់បើកបរ ពិសេសទៅទៀត មន្ត្រីៗត្រូវអនុវត្តិច្បាប់មុនគេ ចៀសវាង “អំណាចនៅលើច្បាប់” និងផ្តល់នូវប្រសិទ្ធិភាពនៃអនុវត្តិច្បាប់។
>. រៀន រៀនៗៗៗៗៗ រៀន ច្បាប់ ចរាចរ ទាំងអស់គ្នា អោយចេះ និង គោរពច្បាប់ ចរាចរទាំងអស់គ្នា !
>> . បើ មានក្រដាស់ ប័ណ្ណបើកបរ មិន យល់ដឹង ចេះច្បាប់ ចរាចរ គ្រោះថ្នាក់នៅតែមាន
ស្លាប់ របួស ដដែល !