ដោយ៖​ ពៅ មេត្តា​ | ថ្ងៃពុធ ទី6 មករា 2016, 08:11 PM
http://vodhotnews.com

---

លោកនាយករដ្ឋមន្ត្រី សម្រេចមិនតម្រូវឲ្យអ្នកបើកបរម៉ូតូមានកម្លាំងត្រឹម១២៥សេសេចុះក្រោម មានប័ណ្ណបើកបរទេ ដោយលោកបញ្ជាក់ថាជួយកាត់បន្ថយការចំណាយថវិកា និងការលំបាក របស់ប្រជាពលរដ្ឋ។​

លោកនាយករដ្ឋមន្ត្រីហ៊ុន សែន សរសេរនៅលើហ្វេសបុករបស់លោកនៅល្ងាចនេះថា ការសម្រេចនេះគឺធ្វើឡើងក្រោយពេលលោកបានពិភាក្សាជាមួយលោក​ ស ខេង រដ្ឋមន្ត្រី ក្រសួង មហាផ្ទៃ។ ទោះយ៉ាងណា លោកនាយករដ្ឋមន្ត្រីបានអំពាវនាវឲ្យប្រជាពលរដ្ឋត្រូវ បើក បរគោរពច្បាប់ចរាចរណ៍​​។​

លោក​សរសេរ​ថា​៖ “ក្រោយពីបានតាមដានស្តាប់នូវមតិយោបល់ សំណូមពរ និងសំណើរបស់បងប្អូនជនរួមជាតិ ជាពិសេស យុវជននិងសិស្សានុសិស្សទាក់ទងនិងតម្លៃនៃការធ្វើប័ណ្ណបើកបរម៉ូតូ ហើយក្រោយពីខ្ញុំបានពិភាក្សាជាមួយ សម្តេចក្រឡាហោម ស ខេង ឧបនាយករដ្ឋមន្រ្តី រដ្ឋមន្រ្តីក្រសួងមហាផ្ទៃ រដ្ឋមន្រ្តីក្រសួងសេដ្ឋកិច្ច និងហិរញ្ញវត្ថុ និងរដ្ឋមន្រ្តីក្រសួងសាធារណការនិងដឹកជញ្ជូន គឺខ្ញុំបានសម្រេចបញ្ឈប់មិនចាំបាច់អោយមានប័ណ្ណបើកបរចំពោះម៉ូតូចាប់ពីកម្លាំង 125 CC ចុះក្រោម ចាប់ពីពេលនេះតទៅ”។

លោក​នាយក​រដ្ឋមន្ត្រី ហ៊ុន សែន សរសេរទៀតថាលោក​នឹងស្នើទៅអង្គនីតិបញ្ញត្តិដើម្បីធ្វើវិសោធន:កម្មលើបទបញ្ញត្តិនៃ​ច្បាប់ចរាចរណ៍​ផ្លូវគោក​នេះ​មួយ​ចំនួន​ផងដែរ។

តាមរបាយការណ៍របស់ក្រសួងសាធារណៈការ និង ដឹកជញ្ជូនគឺបច្ចុប្បន្ននៅទូទាំងប្រទេស មាន ម៉ូតូមានជាង២លាន ៧សែនគ្រឿង ប៉ុន្តែអ្នកមានប័ណ្ណបើកបរមាន តែប្រមាណ១សែន ៥ម៉ឺននាក់តែប៉ុណ្ណោះ។​ ការប្រកាសមិនតម្រូវឲ្យអ្នកបើកបរម៉ូតូមានប័ណ្ណបើកបរនេះ បន្ទាប់ ច្បាប់ ចរាចរណ៍ថ្មីត្រៀមផាកពិន័យលើអ្នកអ្នកបើកបរម៉ូតូគ្រប់ប្រភេទ ដែលមិនមានប័ណ្ណ បើកបរនៅឆ្នាំ២០១៦នេះ​ តែគម្រោងមានការរិះគន់ច្រើនពីប្រជាពលរដ្ឋ៕​

សូម​សរសេរ​មក​កាន់​លោក ពៅ មេត្តា​ តាមរយៈ minpov@vodhotnews.com