ដោយ៖​ លី បេឡា​​ | ថ្ងៃអាទិត្យ ទី10 មករា 2016, 03:05 PM
http://vodhotnews.com

---

​គណបក្ស​ប្រជាធិបតេយ្យ​មូលដ្ឋាន​ ជា​បក្ស​ទើប​បង្កើតឡើង​ថ្មី​លើកឡើងថា មូលហេតុ​ចម្បង​នាំឲ្យ​បរាជ័យ​ក្នុង​អនុវត្ត​ច្បាប់​ចរាចរណ៍​ដោយសារ ខ្វះ​ការចូលរួម​ពី​ភាគី​ពាក់ព័ន្ធ​ក្នុង​ការអប់រំឲ្យបាន​ទូលំ​ទូលាយ​ដល់​សាធារណជន​។​

​សេចក្ដីថ្លែងការណ៍​ចេញផ្សាយ​នៅ​ថ្ងៃ​ទី​៩ ខែ​មករា​ ម្សិលមិញ​របស់​គណបក្ស​ប្រជាធិបតេយ្យមូលដ្ឋាន​ លើកឡើងថា ខ្វះ​ការចូលរួម​ពី​ភាគី​ពាក់ព័ន្ធ​ក្នុង​ការតាក់តែង​ច្បាប់ និងមិន​បាន​ផ្សព្វផ្សាយឲ្យ​ទូលាយ ជា​មូលហេតុ​ធ្វើឲ្យ​ការអនុវត្ត​ច្បាប់​ចរាចរណ៍​ថ្មី​បរាជ័យ​។ 

​នៅក្នុង​សេចក្ដីថ្លែងការណ៍​ដដែល ក៏​បាន​បង្ហាញ​អនុសាសន៍​មួយ​ចំនួន ដើម្បី​ជំរុញ​ឲ្យមាន​ការ អនុវត្ត​ច្បាប់​បានល្អ និង កាត់បន្ថយ​គ្រោះថ្នាក់​ចរាចរណ៍​។​ អនុសាសន៍​ទាំងនោះ​រួមមាន ការអនុវត្ត​ច្បាប់ ជា​ដំណាក់កាល ដោយ​មិន​ត្រូវ​អនុវត្ត​ទាំងស្រុង និង គំហុក​ឡើយ ការអប់រំ​ប្រជាពលរដ្ឋ​ឲ្យបាន​ទូលំទូលាយ​មុន​ចាប់ផ្ដើម​អនុវត្ត បញ្ចូល​ច្បាប់​ចរាចរណ៍​ក្នុង​គ្រឹះស្ថាន​អប់រំ​នានា ប្រាក់​ប្រមូលបាន​ពី​ការផាកពិន័យ​ដាក់ចូល​ក្នុង​ថវិកា​ជាតិ​ទាំងអស់​ និង​ផ្ដល់​ប្រាក់​ឧបត្ថម​និង​ប្រាក់ខែ​សមរម្យ​សម្រាប់ នគរបាល ចរាចរណ៍​បញ្ឈប់​ការឃាត់​រថយន្ត​ដឹក​ទំនិញ​យកលុយជាដើម​។​

​គណបក្ស​ប្រជាធិបតេយ្យ​មូលដ្ឋាន​ លើកឡើង​បែប​នេះ​បន្ទាប់​ពី​រដ្ឋាភិបាល​ធ្វើការ​រឹតបន្ដឹង​ខ្លាំង​ចំពោះ​ច្បាប់​ចរាចរណ៍​ផ្លូវគោក​ថ្មី នៅ​ដើមឆ្នាំ​២០១៦ រហូតដល់​មាន​ការរិះគន់​ច្រើន​ពី​ប្រជាពលរដ្ឋ​ហើយ មាន​ការបញ្ជាឲ្យ​មាន​កែតម្រូ​វ​នូវ​ចំណុច​មួយចំនួន​ជា​បន្តបន្ទាប់​៕​

សូម​សរសេរ​មកកាន់​លោក លី បេឡា តាមរយៈ  bela@vodhotnews.com