ឈើត្រូវបានគេដឹកចេញពីតំបន់អភិរក្សសត្វព្រៃភ្នំឱរ៉ាល់កាលពីពេលថ្មីៗនេះ។ រូបថត អង្គភាពប្រឆាំងអំពើពុករលួយ
Thu, 11 February 2016
ផាក់ ស៊ាងលី
ភ្នំពេញប៉ុស្តិ៍
កំពង់ស្ពឺៈ អង្គការសង្គមស៊ីវិលមួយបានរកឃើញឈើប្រណីតជាង ១០ ម៉ែត្រគុបនៅដែនជម្រកសត្វព្រៃភ្នំឱរ៉ាល់ហើយអ្នកអារឈើបានប្រាប់ថាពួកគេបានបង់ប្រាក់ឲ្យមន្ត្រីបរិស្ថានក្នុងមួយខែៗជាង ២ ពាន់ដុល្លារក្នុងម៉ាស៊ីនរ៉ៃអារច្រៀកឈើចំនួន ៧ គ្រឿង។
បុគ្គលិកអង្គការប្រឆាំងអំពើពុករលួយទប់ស្កាត់ការបំផ្លាញធនធានធម្មជាតិ និងការពារសិទ្ធិពលរដ្ឋចំនួន ៨ នាក់បានក្លែងខ្លួនធ្វើជាអ្នករកទិញឈើនៅដែនជម្រកសត្វព្រៃ ភ្នំឱរ៉ាល់ ហើយបានចូលទៅតំបន់ព្រំប្រទល់រវាងខេត្តកំពង់ស្ពឺ និងពោធិ៍សាត់កាលពីថ្ងៃអង្គារ។
លោក ជា ហ៊ាន ប្រធានអង្គការ និងជាអ្នកដឹកនាំការចុះស៊ើបអង្កេតនេះបានប្រាប់ ភ្នំពេញ ប៉ុស្តិ៍ កាលពីម្សិលមិញថា ក្រុមការងាររបស់លោកបានរកឃើញឈើប្រណីត និងប្រភេទលេខ ១ សរុបជាង ១០ ម៉ែត្រគុប និងរោងម៉ាស៊ីនរ៉ៃអារច្រៀកឈើចំនួន ៧ កន្លែងនៅត្រង់ចំណុចច្រេសច្រងាំជ្រុំ និងអូរទឹកក្រហម។
លោកជឿជាក់ថា មានឈើរាប់សិបម៉ែត្រគុបផ្សេងទៀតនៅក្នុងព្រៃជ្រៅ និងឆ្លងកាត់អូរដែលពួកលោកមិនទាន់អាចចូលទៅដល់។
លោកបញ្ជាក់ថា៖ «ឈើទាំងនោះត្រូវបានគេកាប់នៅក្នុងដែនជម្រកសត្វព្រៃរួចហើយគេអារច្រៀកដោយម៉ាស៊ីនរ៉ៃ ចំនួន ៧ និងដាក់គរនៅកន្លែងផ្សេងគ្នាពាសពេញព្រៃដែលប៉ាន់ស្មានទៅគឺជាង ១០ ម៉ែត្រគុប។ ឈើប្រណីតគឺគេដឹកទៅលក់នៅវៀតណាមតែគេដឹកចេញមិនទាន់ពេលរដ្ឋាភិបាលប្រកាសបិទ»។
លោក ជា ហ៊ាន បន្តថាឈើប្រណីតនោះរួមមានឈើធ្នង់ហើយក្រៅពីនោះមានប្រភេទឈើ សុក្រំ រាជកុល ផ្ចឹក រាំង និងឈើទាលដែលត្រូវបានគេអារច្រៀកជាគ្រឿងផ្ទះដូចជាក្តារបន្ទះ និង សសរសម្រាប់លក់ក្នុងស្រុក។
លោកថា រោងម៉ាស៊ីនរ៉ៃអារច្រៀកឈើទាំងនោះត្រូវបានគេដាក់នៅចម្ងាយចន្លោះពី ៣០០ ទៅ ៤០០ ម៉ែត្រពីគ្នាហើយនៅទីតាំងទាំងនោះលោកបានឃើញអ្នកអារច្រៀកឈើចំនួន ៦ នាក់។
លោកបានធ្វើជារកទិញឈើពីពួកគេហើយឈើមួយម៉ែត្រគុបគេលក់ចេញនៅកន្លែងនោះតម្លៃចំនួន ៨ ម៉ឺនរៀល និង បើដឹកចុះទៅដល់ក្រោមវិញគឺ ១ លានរៀល។ ពួកគេក៏បានប្រាប់ផងដែរថាសកម្មភាពអារច្រៀកឈើរបស់ពួកគេបានសម្រាកមួយរយៈ បន្ទាប់ពីក្រុមការងារការពារ និងអភិរក្សធម្មជាតិរបស់ក្រសួងបរិស្ថាន និងអង្គការជាដៃគូមួយបានចុះទៅត្រួតពិនិត្យនៅតំបន់នោះ កាលពីខែមុន។ ក្រុមនេះថា ពួកគេអាចធ្វើសកម្មភាពកាប់ និងអារច្រៀកឈើលក់បែបនោះបានគឺដោយសារតែមានការបង់លុយប្រចាំខែឲ្យមន្ត្រីបរិស្ថានចំនួន ៣០០ ដុល្លារក្នុងម៉ាស៊ីនរ៉ៃមួយគ្រឿង។
លោក ជា ហ៊ាន ថ្លែងថា៖ «អ្នករកស៊ីបទល្មើសហ្នឹងបានប្រាប់ខ្ញុំថាគាត់បង់ខែឲ្យពួកដែនជម្រក និងបរិស្ថាន ម៉ាខែ ៣០០ ដុល្លារក្នុងម៉ាស៊ីនរ៉ៃ ១ គ្រឿង។ ខ្ញុំធ្វើជាសុំឲ្យចុះថ្លៃឈើតែគេថាចុះមិនបានទេព្រោះខាងបរិស្ថានយកច្រើនពេក។ មានបរិស្ថានផងប៉េអឹមផងអ៊ីចឹងបើចុះមិនអាចរួចថ្លៃបង់បានទេ»។
លោក ជា ហ៊ាន បានឲ្យដឹងទៀតថា ក្រៅពីបង់ប្រចាំខែថ្លៃដាក់ម៉ាស៊ីនរ៉ៃនោះអ្នកដឹកឈើចេញក៏ត្រូវបង់ឲ្យមន្ត្រីអនុរក្សបរិស្ថាន និងអាជ្ញាធរពាក់ព័ន្ធនៅកុងត្រូលតាមផ្លូវប្រមាណជា ១០ កន្លែងទៀតផងដែរហើយបើគ្មានការបង់ប្រាក់គឺដឹកចេញមិនរួចនោះទេ។
បទល្មើសព្រៃឈើនៅដែនជម្រកសត្វព្រៃភ្នំឱរ៉ាល់ដែលស្ថិតក្រោមការគ្រប់គ្រងរបស់ក្រសួងបរិស្ថានបានកើតមានឡើងជាច្រើនឆ្នាំមកហើយ ហើយ អង្គការក្រៅរដ្ឋាភិបាលមួយនេះក៏ធ្លាប់បានស្រង់ឈ្មោះ និងប្តឹងមន្ត្រីបរិស្ថាននៅដែនជម្រកសត្វព្រៃ និងមន្ត្រីអាជ្ញាធរពាក់ព័ន្ធផ្សេងៗទៀតផងដែរ។
របាយការណ៍មួយដែល ភ្នំពេញ ប៉ុស្តិ៍ ទទួលបានបានឲ្យដឹងថា ក្រុមការងាររបស់អគ្គនាយកដ្ឋានរដ្ឋបាលការពារ និង អភិរក្សធម្មជាតិនៃក្រសួងបរិស្ថានបានដឹកនាំមន្ត្រីអនុរក្សនៅដែនជម្រកសត្វព្រៃភ្នំឱរ៉ាល់ក្នុងខេត្ត ពោធិ៍សាត់ និងកំពង់ស្ពឺ ដើម្បីចុះបង្ក្រាបបទល្មើសព្រៃឈើ។ ជាលទ្ធផល ក្រុមការងារបានធ្វើការរឹបអូសរថយន្តកែច្នៃចំនួន ២ គ្រឿង ម៉ូតូ ២ គ្រឿង ឈើប្រណីតមួយចំនួនជើងម៉ាស៊ីនរ៉ៃ ចំនួន ៣ ពីរោងអារច្រៀកឈើចំនួន ៣ កន្លែងផ្សេងៗគ្នា។
លោក ជា ហ៊ាន បានរិះគន់ចំណាត់ការរបស់ក្រុមការងាររបស់ក្រសួងបរិស្ថាននោះថា៖ «គេទទួលបានផលប្រយោជន៍ពីបទល្មើស។ គេប្រាប់មុនឲ្យរុះរើចេញ។ ក្រោយរុះរើចេញអស់ពេលកម្លាំងទៅដល់មានតែម៉ាស៊ីនខូច និងឈើចាស់ៗដុតកម្ទេចចោលដើម្បីធ្វើរបាយការណ៍ជូនរដ្ឋាភិបាល។ ក្នុងចំណោម ៧ រោងម៉ាស៊ីនរ៉ៃនោះគេបង្ក្រាបតែ ៣ កន្លែងទេ។ ទុក ៤ កន្លែងធ្វើឆ្នាំងបាយគេ»។
ទោះយ៉ាងណា លោក សឹង ប៊ុនហេន នាយរងដែនជម្រកសត្វព្រៃភ្នំឱរ៉ាល់បានបដិសេធការចោទប្រកាន់ទាំងនោះដោយអះអាងថា លោកមិនបានដឹងពីការប្រព្រឹត្តបទល្មើសព្រៃឈើនៅកន្លែងនោះទេហើយក្រុមអនុរក្សបរិស្ថានក៏មិនបានទទួលសំណូក ដើម្បីបើកដៃឲ្យមានការកាប់ឈើនោះដែរ។
លោក ប៊ុនហេន បាននិយាយនៅមុនពេលផ្តាច់ខ្សែទូរស័ព្ទថា៖ «រឿងហ្នឹងខ្ញុំអត់ដឹងច្បាស់ដែរ។ អត់មាន [បង់លុយ បង់កាក់] ទេ។ អត់មានទេ។ អ្នកលួចកាប់ចេះតែលួចកាប់។ អត់មានពាក់ព័ន្ធនឹងកម្លាំងសមត្ថកិច្ចទេ»។
ខ្សែវីដេអូឃ្លីបរយៈពេល ៣៧ វិនាទីដែលភ្នំពេញប៉ុស្ដិ៍ទទួលបានពីលោក ជា ហ៊ាន បានបង្ហាញពីទីតាំងរោងម៉ាស៊ីនរ៉ៃមួយកន្លែងក្នុងចំណោម ៧ កន្លែងនោះដែលមានឈើជាច្រើនគំនរ និងខ្លះទៀតនៅរាយប៉ាយ។ ក្រៅពីនោះក៏ឃើញមានម៉ាស៊ីនរ៉ៃដ៏ធំមួយដែលមនុស្សប្រុសពីរនាក់កំពុងតែប្រើប្រាស់អារច្រៀកឈើ។
លោក ជា ហ៊ាន កំពុងតែធ្វើរបាយការណ៍ពីលទ្ធផលដែលក្រុមការងារលោកចុះអង្កេតនោះហើយនឹងដាក់ទៅក្រសួងបរិស្ថាននៅសប្តាហ៍នេះ។
លោក ហេង គួន និងលោក នៅ ណាក់ ប្រធាន និងអនុប្រធានមន្ទីរបរិស្ថានខេត្តកំពង់ស្ពឺមិនអាចទាក់ទងសុំអត្ថាធិប្បាយបានទេ។
ចំណែកឯលោក សៅ សុភាព អ្នកនាំពាក្យក្រសួងបរិស្ថានក៏មិនអាចទាក់ទងបានដែរកាលពីម្សិលមិញ។ ទោះយ៉ាងណា របាយការណ៍របស់ក្រសួងបរិស្ថានដែល ភ្នំពេញ ប៉ុស្តិ៍ ទទួលបានបានឲ្យដឹងថារយៈកាលកន្លងមកតែងតែមានជនល្មើសលបលួចប្រព្រឹត្តបទល្មើសតាមគ្រប់រូបភាពនៅក្នុងតំបន់ការពារធម្មជាតិ ដែនជម្រកសត្វព្រៃក៏ដូចជានៅក្នុងឧទ្យានជាតិផ្សេងៗដែរនៅ ខណៈពេលដែលមន្ត្រីអគ្គនាយកដ្ឋាន នាយកដ្ឋានជំនាញ មន្ទីរបរិស្ថាន រួមនឹងមន្ត្រីឧទ្យានុរក្សតែងខិតខំប្រឹងប្រែង និង ចុះធ្វើប្រតិបត្តិការបង្ក្រាបបទល្មើសទាំងនោះជាប់ជាប្រចាំហើយបើទោះបីជាកំពុងតែជួបប្រទះនឹងបញ្ហាប្រឈមមួយចំនួនក៏ដោយ៕
why do they wonder too much just think every thing was come from ANGKA KHANG LEIR