ដោយ លោក បូ សាវី | ថ្ងៃចន្ទ ទី១៤ ខែមីនា ឆ្នាំ២០១៦ | ម៉ោង 4:24 PM
http://vodhotnews.com
សមាគមការពារសិទ្ធិមនុស្សអាដហុកនៅខេត្ដព្រះវិហារឲ្យដឹងថាអាជ្ញាធរស្រុកសង្គមថ្មីហាមឃាត់មន្រ្តីអង្គការនេះមិនឲ្យផ្សព្វផ្សាយច្បាប់ស្ដីពីសិទ្ធិមនុស្សដល់ប្រជាសហគមន៍ដោយអះអាងថាគ្មានច្បាប់អនុញ្ញាតពីអាជ្ញាធរខេត្ត។
អ្នកសម្របសម្រួលសមាគមការពារសិទ្ធិមនុស្សអាដហុកខេត្ដព្រះវិហារលោក ឡោ ចាន់ ប្រាប់វីអូឌីថានៅម៉ោង១០ព្រឹកថ្ងៃចន្ទនេះ សមត្ថកិច្ចពីររូបនៅឃុំសុចបានហាមឃាត់ប្រជាពលរដ្ឋនិងមន្រ្តីសមាគមអាដហុកមិនឲ្យធ្វើពិធីផ្សព្វផ្សាយច្បាប់ស្ដីពីសិទ្ធិមនុស្សដល់ប្រជាសហគមន៍ដោយសមត្ថកិច្ចប្រាប់ថាគ្មានច្បាប់អនុញ្ញាតពីអភិបាលស្រុកសង្គមថ្មីលោក រស់ ហេង។ លោកហៅការរារាំងនេះថាជាទង្វើខុសច្បាប់។លោកបន្ដថា៖ “ចឹងហើយអាជ្ញាធរស្រុកដែលមានអភិបាលស្រុកសង្គមថ្មីគាត់មានការភ័យខ្លាចយ៉ាងខ្លាំងឲ្យតែមានអង្គការសង្គមស៊ីវិល អង្គការអាដហុកមិនថាអង្គការណាទេចូលក្នុងភូមិឃុំសង្គមថ្មីរបស់លោក លោកតែងបញ្ជាការទៅអាជ្ញាធរមូលដ្ឋានមិនអោយសហការជាមួយអង្គការព្រោះខ្លាចប្រជាពលរដ្ឋគាត់ចេះដឹងពីសិទ្ធិក៏ដូចជាផ្លូវច្បាប់មួយចំនួនទៅគាត់បញ្ចេញសិទ្ធិទៅចឹងធ្វើឲ្យខាតប្រយោជន៍របស់គាត់”។
លោក ឡោ ចាន់ បន្ថែមថាតាមការសង្កេតកន្លងមកអភិបាលស្រុកសង្គមថ្មីលោក រស់ ហេង តែងហាមឃាត់សង្គមស៊ីវិលមិនឲ្យចូលផ្សព្វផ្សាយច្បាប់ដល់ប្រជាសហគមន៍ដោយលោកថាអភិបាលស្រុករូបនោះខ្លាចពលរដ្ឋមានចំណេះដឹងនិងហ៊ានធ្វើការតវ៉ាជាមួយអាជ្ញាធរ។
ឆ្លើយតបភ្លាមៗពីករណីនេះអភិបាលស្រុកសង្គមថ្មីលោក រស់ ហេង មានប្រសាសន៍ថាការហាមឃាត់នេះដោយសារមន្រ្តីអង្គការនោះធ្វើសកម្មភាពដោយគ្មានលិខិតអនុញ្ញាតចេញអាជ្ញាធរខេត្ដ។ លោកមានប្រសាសន៍ថា៖ ”ចង់មកផ្សព្វផ្សាយឬធ្វើសកម្មភាពអីនៅក្នុងស្រុកហ្នឹងគួរតែដាក់លិខិតទៅរដ្ឋបាលសាលាខេត្ដហើយដាក់កម្មវិធីទៅជាមួយទៅ ឃុំនេះភូមិនេះថ្ងៃនេះគោលបំណងធ្វើអីចឹងហើយខេត្ដគេទទួលបានលិខិតគេចេញសជណមួយបើយើងមានគោលដៅនៅស្រុកណាគេចេញនៅស្រុកហ្នឹងហើយទាល់មានលិខិតបញ្ជាក់ពីសាលាខេត្ដ”។
ប៉ុន្ដែអ្នកសម្របសម្រួលនៃសមាគមអាដហុកលោក ឡោ ចាន់ អះអាងថាលោកមានច្បាប់អនុញ្ញតឲ្យធ្វើសកម្មភាពផ្សព្វផ្សាយច្បាប់ដល់ប្រជាសហគមន៍និងធ្វើវេទិកានៅតាមភូមិឃុំដែលបានអនុញ្ញាតពីអភិបាលខេត្ដព្រះវិហារលោក អ៊ុំ ម៉ារ៉ា។
មន្ដ្រីសិទ្ធិមនុស្សរូបនោះព្រមានប្ដឹងអភិបាលស្រុកលោក រស់ ហេង ទៅតុលាការបើនៅតែរារាំងមិនឲ្យអង្គការសង្គមស៊ីវិលធ្វើសកម្មភាពផ្សព្វផ្សាយច្បាប់នៅក្នុងស្រុកសង្គមថ្មី។
ច្បាប់រដ្ឋធម្មនុញ្ញមាត្រា៤១ចែងថាប្រជាពលរដ្ឋខ្មែរគ្រប់រូបមានសិទ្ធិសេរីភាពខាងបញ្ចេញមតិទទួលព័ត៌មាននិងផ្ដល់ព័ត៌មាន។ ប៉ុន្តែមាត្រាដដែលនេះចែងថាជនណាក៏ដោយមិនអាចឆ្លៀតប្រើសិទ្ធិនេះរំលោភនាំឲ្យប៉ះពាល់ដល់កិតិ្ដយសដល់អ្នកដទៃទំនៀមទម្លាប់ល្អរបស់សង្គម សណ្ដាប់ធ្នាប់សាធារណៈ និងសន្ដិសុខជាតិបានឡើយ៕
ចៅហ្វាយស្រុក ” អារសាច់ជូនខ្លា ទើបនៅស្រុកបាន ” ឬ សម័យអភិបាលស្រុក= អ្នកគ្បគ្រងស្រុកអោយជឿនលឿន????????។
លោករស់ ហេង អភិបាលស្រុកសង្គមថ្មី លោកហួន លី, លោកគឹម វិចិត្រ, លោកគៀត គឹមតុល
អភិបាលរងស្រុកសង្គមថ្មី និងលោកសៀប កែវជីវ៉ា នាយករដ្ឋបាល បាននាំគ្នាលក់ដី(៣,៤ម៉ែត្រ គុណ
១៥ម៉ែត្រ)ក្នុង១ប្លង់ តម្លៃ១២៥០០ដុល្លា ចំនួន៥ប្លង់ ដែលជាដីរបស់រដ្ឋយកលុយដាក់ហោប៉ាវរបស់ខ្លួន
អោយឈ្មោះឈិន ប៉ាង, លោកហាវ ប៊ុនឡុង, លោកសោម វ៉ាន់ហេន, បងស្រីសោម វឿន និងលោក
សៀប រ៉ាវី បានរហូតដល់៦២៥០០ដុល្លា គេខ្លាចប្រជាពលរដ្ឋប្តឹងវាដាក់គុក ទើបវាមិនអោយអង្គការ
សង្គមស៊ីវិលផ្សព្វផ្សាយច្បាប់ដល់ប្រជាជន ព្រោះទើសក្បាលវា។