ដោយ លោក ពៅ មេត្តា | ថ្ងៃពុធ ទី១៩ ខែតុលា ឆ្នាំ២០១៦
http://vodhotnews.com
ការចុះបញ្ជីឈ្មោះបោះឆ្នោតពលរដ្ឋ (រូបភាពពីហ្វេសប៊ុក គ.ជ.ប)
គណបក្សសង្គ្រោះជាតិស្នើឲ្យគណៈកម្មាធិការជាតិរៀបចំការបោះឆ្នោត (គ.ជ.ប) អន្តរាគមន៍សម្រួលឲ្យពលរដ្ឋខ្មែរដែលកំពុងធ្វើការនៅក្នុងប្រទេសថៃ អាចចុះឈ្មោះបោះឆ្នោតបាននៅតាមខេត្តជាប់ព្រំដែនកម្ពុជា-ថៃ។
លិខិតគណបក្សសង្រ្គោះជាតិចុះថ្ងៃទី១៨ខែតុលាផ្ញើទៅប្រធាន គ.ជ.ប បានលើកឡើងថា ស្ទើររាល់ថ្ងៃហើយពិសេសចុងសប្តាហ៍ ពលរដ្ឋខ្មែរដែលកំពុងធ្វើការងារនៅក្នុងប្រទេសថៃបាននាំគ្នាមកចុះឈ្មោះបោះឆ្នោតតាមការអំពាវនាវរបស់ គ.ជ.ប រដ្ឋាភិបាលនិងគណបក្សនយោបាយនានា។
គណបក្សសង្គ្រោះជាតិលើកឡើងថា ដោយសារពលករមិនសូវមានលុយនិងពេលវេលាខ្លី ទើបពួកគេសុំចុះឈ្មោះនៅត្រឹមខេត្តរបស់កម្ពុជាជាប់ព្រំដែនថៃ ប៉ុន្តែអាជ្ញាធរនៅតាមឃុំសង្កាត់មិនព្រម។
អ្នកនាំពាក្យ គ.ជ.ប លោក ហង្ស ពុទ្ធា មានប្រសាសន៍ថា គ.ជ.ប បានទទួលសំណើនោះហើយ តែតាមច្បាប់មិនអនុញ្ញាតទេ។ ទោះយ៉ាងណាលោកបញ្ជាក់ថា ពេលនេះមន្ត្រីពាក់ព័ន្ធកំពុងពិភាក្សាស្វែងរកដំណោះស្រាយ៖ «បើពិនិត្យលើច្បាប់និងនីតិវិធីដែលបានចែងនៅពេលកន្លងមកគឺមិនអនុញ្ញាតទេ។ ប៉ុន្តែទោះយ៉ាងណា គ ជ ប ទទួលយកគ្រប់អនុសាសន៍ពីគ្រប់ភាគីពាក់ព័ន្ធ ហើយ គ.ជ.ប កំពុងពិភាក្សា លទ្ធផលយ៉ាងណានឹងឆ្លើយតបនៅពេលក្រោយ»។
នាយកប្រតិបត្តិអង្គការនិចហ្វ្រិក លោក សំ គន្ធាមី មានប្រសាសន៍ថា តាមច្បាប់ពលករទាំងនោះមិនអាចចុះឈ្មោះបានទេ ដោយសារមិនមានការបញ្ជាក់លំនៅឋានចុងក្រោយ។ ប៉ុន្តែលោកថា គ.ជ.ប គួរជួយសម្រួលធ្វើករណីនេះ ជាករណីលើកលែង ដើម្បីឲ្យពលករទាំងនេះបានចុះឈ្មោះបោះឆ្នោតនិងបានបោះឆ្នោត ខណៈពួកគេមានអត្តសញ្ញាណប័ណ្ណហើយ៖ «គ.ជ.ប គួរតែមានការលើកលែងសម្រាប់ក្រុមហ្នឹង គឺក្រុមពលករយើងសំដៅលើក្រុមពលករ ព្រោះយើងចង់ឲ្យពលករចុះឈ្មោះបានគ្រប់គ្នា ហើយទោះមិនបានគ្រប់គ្នាក៏ដោយឲ្យអ្នកមកហ្នឹងបានចុះ។ ធ្វើនីតិវិធីបន្ថែមទៅផ្តល់លទ្ធភាពឲ្យអាជ្ញាធរជួយធ្វើលិខិតបញ្ជាក់លំនៅ ដើម្បីឲ្យគាត់យកទៅចុះឈ្មោះបោះឆ្នោតបាន»។
ការស្នើឡើងរបស់គណបក្សសង្គ្រោះជាតិនៅពេលនេះ បន្ទាប់ពីពលករខ្មែរធ្វើការនៅថៃប្រមាណ៦០០នាក់ បានសុំចុះឈ្មោះនៅក្នុងខេត្តបាត់ដំបងនិងខេត្តបន្ទាយមានជ័យកាលពីថ្ងៃទី៩និងថ្ងៃទី១៦ខែតុលា ប៉ុន្តែអាជ្ញាធរឃុំមិនព្រមចុះឲ្យដោយសារពលរដ្ឋទាំងនោះមិនមានឯកសារបញ្ជាក់លំនៅឋាននៅក្នុងដែនដីនោះ។
គ.ជ.ប ចាប់ផ្តើមចុះឈ្មោះបោះឆ្នោតក្នុងបញ្ជីថ្មីដែលត្រូវឲ្យពលរដ្ឋចុះឈ្មោះថ្មីទាំងអស់គ្នាចាប់ពីថ្ងៃទី១ខែកញ្ញា ដល់ថ្ងៃទី២៩ខែវិច្ឆិកាឆ្នាំ២០១៦៕
It is a sensible proposal to allow them for their right to vote as prescribed by constitution.
And also reduce their time for traveling and the cost as well.
After all, they have worked abroad as to support their family while government has not come up with any other better plan creating job opportunity in Cambodia.