ដោយ ប្រាជ្ញ ចេវ
2017-03-29
RFA
ស្ដាប់ ឬ ទាញយកសំឡេង
អ្នកនយោបាយសិក្ខាសាលាស្ដីពីការបង្ហាញទ្រព្យសម្បត្តិជាសាធារណៈ នៅរាជធានីភ្នំពេញ កាលពីថ្ងៃទី២៩ ខែមីនា ឆ្នាំ២០១៧។ RFA/Brach Chev
អង្គការក្រៅរដ្ឋាភិបាលដែលធ្វើការងារពាក់ព័ន្ធនឹងអំពើពុករលួយមួយ ធ្វើសិក្ខាសាលាជំរុញឲ្យអ្នកនយោបាយ និងមន្ត្រីអង្គការសង្គមស៊ីវិលបង្ហាញទ្រព្យសម្បត្តិរបស់ខ្លួនជាសាធារណៈតាមប្រព័ន្ធអ៊ីនធឺណិត (Internet)។ សិក្ខាសាលាដែលមានអ្នកចូលរួមប្រមាណ ៥០នាក់ នៅថ្ងៃទី២៩ ខែមីនា ក៏មានអ្នកនយោបាយ ៥រូប មកពីមជ្ឈដ្ឋានផ្សេងៗគ្នា ស្ម័គ្រចិត្តបង្ហាញទ្រព្យសម្បត្តិរបស់ពួកគេផងដែរ។
អ្នកនយោបាយដែលបានបង្ហាញទ្រព្យសម្បត្តិជាសាធារណៈតាមប្រព័ន្ធអ៊ីនធឺណិត រួមមាន សមាជិកសភាគណបក្សសង្គ្រោះជាតិ លោក លិម គិមយ៉ា ប្រធានគណបក្សអំណាចខ្មែរលោក សួន សេរីរដ្ឋា អតីតបេក្ខជនតំណាងរាស្ត្រគណបក្សសង្គ្រោះជាតិ លោក សួង សុភ័ណ្ឌ សមាជិកគណបក្សប្រជាធិបតេយ្យមូលដ្ឋាន លោក ម៉ែន ឆេង និងយុវជនសកម្មកិច្ចការនយោបាយដែលនិយាយខ្លួនឯងថា ជាអនាគតនាយករដ្ឋមន្ត្រីលោក ប៊ិន យ៉ាន។
ប្រធានគណបក្សអំណាចខ្មែរ លោក សួន សេរីរដ្ឋា និយាយនៅក្នុងសិក្ខាសាលានោះថា ការប្រយុទ្ធប្រឆាំងអំពើពុករលួយត្រូវសម្អាតពីថ្នាក់លើមកក្រោម។ ក្នុងពេលនោះដែរ លោកក៏ថ្លែងរិះគន់ស្ថាប័នកាកបាទក្រហមដែលគ្រប់គ្រងដោយភរិយារបស់លោក ហ៊ុន សែន៖ «គឺក្រុមជំទាវៗនៅក្នុងកាកបាទក្រហមកម្ពុជា តែម្ដង អ៊ីចឹងបានខ្ញុំថា បើគណបក្សអំណាចខ្មែរឈ្នះឆ្នោតនឹងរំលាយកាកបាទក្រហមចោល ព្រោះកាកបាទក្រហមនេះ គឺក្រុមដែលដឹកនាំដោយជំទាវ គ្រាន់តែរៀបចំកម្មវិធីមើលសម្លៀកបំពាក់ មើលគ្រឿងអលង្ការចុះ ហើយបើម្នាក់ៗចំណាយបែបហ្នឹងទៅធ្វើកាកបាទក្រហមម៉េចបានបងប្អូន»។
ក្នុងចំណោមអ្នកនយោបាយដែលចុះឈ្មោះបង្ហាញទ្រព្យសម្បត្តិជាសាធារណៈ សមាជិកសភា មកពីគណបក្សសង្គ្រោះជាតិ លោក លិម គិមយ៉ា លើកឡើងថា អ្នកនយោបាយបើមិនហ៊ានប្រកាសទ្រព្យសម្បត្តិជាសាធារណៈមិនគួរធ្វើនយោបាយទេ។ អាស៊ីសេរី មិនទាន់អាចសុំការបំភ្លឺបញ្ជាក់បន្ថែមពីអ្នកនាំពាក្យគណបក្សសង្គ្រោះជាតិ លោក យឹម សុវណ្ណ នៅឡើយទេ។
ចំណែកអ្នកនាំពាក្យគណបក្សប្រជាជនកម្ពុជា លោក ឈឹម ផលរុណ មិនទាន់ឆ្លើយបំភ្លឺករណីបង្ហាញទ្រព្យសម្បត្តិជាសាធារណៈរបស់មន្ត្រីគណបក្សប្រជាជនកម្ពុជា នៅឡើយទេ ប៉ុន្តែលោកបែរចោទសួរថា តើអង្គការសង្គមស៊ីវិលនេះ ទទួលបានថវិកាមកពីណាដើម្បីធ្វើសកម្មភាពការងារ៖ «មានភាពក្លាហានហ៊ានបង្ហាញលុយខ្លួនឯងមកពីប្រទេសណាឲ្យទេ»។
តាមរបាយការណ៍របស់អង្គការគណនេយ្យភាពកម្ពុជា មានអ្នកនយោបាយ មន្ត្រីអង្គការសង្គមស៊ីវិលនៅកម្ពុជា ជាង ៤០រូប បានប្រកាសបង្ហាញទ្រព្យសម្បត្តិរបស់ខ្លួនតាមប្រព័ន្ធអ៊ីនធឺណិត។
ប្រធានអង្គការគណនេយ្យភាពកម្ពុជា លោក គុយ មាសសំណាង មានប្រសាសន៍ថា ដើម្បីឲ្យសង្គមស្អាតស្អំ អ្នកធ្វើការងារសង្គម សិស្សនិស្សិត រហូតដល់អ្នកនយោបាយត្រូវប្រកាសទ្រព្យសម្បត្តិរបស់ខ្លួនឲ្យសាធារណជនបានដឹង។ លោកឲ្យដឹងថា អ្នកដែលចង់ប្រកាសទ្រព្យសម្បត្តិអាចធ្វើបានតាមពីរទម្រង់ គឺអ្នកដែលបានប្រកាសទ្រព្យសម្បត្តិនៅអង្គភាពប្រឆាំងអំពើពុករលួយ ហើយឯកសារនោះយកទៅបង្ហោះនៅលើអ៊ីនធឺណិត និងការបំពេញបែបបទតាមប្រព័ន្ធអ៊ីនធឺណិត ដែលមានអាសយដ្ឋាន www.accountabilityinternational.org.au៖ «ខ្ញុំចាប់ផ្ដើមពីក្រោមទៅវិញ ពីប្រធានអង្គការ សិស្ស និស្សិត អ្នកនយោបាយតូចៗ ដែលគាត់គិតថា ចង់ឲ្យសង្គមយើងផ្លាស់ប្ដូរស្អាតស្អំ»។
របាយការណ៍សន្ទស្សន៍ការយល់ឃើញពីអំពើពុករលួយសម្រាប់ឆ្នាំ២០១៦ ចេញផ្សាយកាលពីដើមឆ្នាំ២០១៧ របស់អង្គការតម្លាភាពអន្តរជាតិ (Transparency International) រកឃើញថា កម្ពុជានៅតែស្ថិតក្នុងចំណោមប្រទេសដែលមានអំពើពុករលួយកម្រិតខ្ពស់នៅលើពិភពលោក។ របាយការណ៍ដដែលបង្ហាញថា កម្ពុជាទទួលបានពិន្ទុ ២១ ស្ថិតក្នុងលេខរៀងទី១៥៦ ក្នុងចំណោមប្រទេស១៧៦។ កម្ពុជាទទួលបានពិន្ទុ ២១ នេះ រយៈពេល ៣ឆ្នាំជាប់គ្នាមកហើយ។ យ៉ាងណាក៏ដោយចុះ របាយការណ៍ដែលបង្ហាញពីអំពើពុករលួយនេះ មិនទទួលបានការស្វាគមន៍ ឬទទួលស្គាល់ពីមន្ត្រីរដ្ឋាភិបាលកម្ពុជា ម្ដងណាឡើយ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
-
គណបក្សប្រឆាំងថាជំនួបរឿងលក្ខន្តិកៈគណបក្សជាមួយក្រសួងមហាផ្ទៃត្រូវបរាជ័យ
-
HRW៖ ក្រសួងមហាផ្ទៃកំពុងយាយីបក្សប្រឆាំងតាមយន្តការឆ្កួតលីលា
-
លោក ហ៊ុន សែន អំពាវនាវកុំឲ្យឈ្លោះនិងជេរប្រមាថគ្នាក្នុងរដូវបុណ្យចូលឆ្នាំ
-
គណៈរដ្ឋមន្ត្រីអនុម័តក្របខ័ណ្ឌគោលនយោបាយជាតិគាំពារសង្គម២០១៦-២០២៥
-
“ក្រសួងមហាផ្ទៃរក្សាជំហរមិនផ្ដល់សុពលភាពសមាជបក្សប្រឆាំងបើទោះជាមានការពិភាក្សាខាងមុខ”
-
បក្សប្រឆាំងសុំចរចាជាមួយក្រសួងមហាផ្ទៃរឿងក្រសួងចោទថាបក្សធ្វើខុសលក្ខន្តិកៈ
-
លោក ហ៊ុន សែន ផ្លាស់ប្ដូរការងារសំខាន់ៗរបស់លោក សុខ អាន ឲ្យនៅក្រោមក្រសួងជំនាញ
-
កម្ពុជាជាប់ចំណាត់ថ្នាក់លេខ១២៩នៅក្នុងរបាយការណ៍សុភមង្គលពិភពលោក
-
ការបារម្ភពីលទ្ធភាពដែលរដ្ឋាភិបាលអាចត្រៀមប្រើកម្លាំងយោធាពេលបោះឆ្នោត
This king dom is leaded by mafia dictator ‘ so how can all theses mafia groups show their belonging ?? they try to hide from the public since 1979 and they won’t show i believe’ because they knew that all money come from sucking from state or rob from people and they hide everywhere in the world so don’t expect them to show .cambodia should make the law’ is you wanted to be a politician you must show all property,money in the bank’ other wise not allowed .GOD bless all cambodian people’