ដោយ រាជ វិញ្ញូ
2017-08-14
RFA
ប្រធានស្ដីទីគណបក្សអំណាចខ្មែរ លោក សួង សុភ័ណ្ឌ ថ្លែងប្រាប់អ្នកកាសែតនៅក្បែរទីស្នាក់ការកណ្ដាលគណបក្ស ស្ថិតនៅខណ្ឌទួលគោក រាជធានីភ្នំពេញ កាលពីថ្ងៃទី១៥ សីហា ឆ្នាំ២០១៧។ Photo: RFA
ប្រធានស្ដីទីគណបក្សអំណាចខ្មែរ លោក សួង សុភ័ណ្ឌ ចាត់ទុកវិធានការជាបន្តបន្ទាប់របស់តុលាការក្រុងភ្នំពេញ មកលើអតីតប្រធានគណបក្ស គឺលោក សួន សេរីរដ្ឋា ថាជាការលាបពណ៌ដោយសាររឿងនយោបាយ។ ការចាត់ទុកនេះ ធ្វើឡើងស្របពេលតុលាការ បានចេញដីកាឱ្យកងកម្លាំងសមត្ថកិច្ចចម្រុះ ចុះទៅឆែកឆេរផ្ទាល់នៅទីស្នាក់ការកណ្ដាលគណបក្សអំណាចខ្មែរ នៅថ្ងៃទី១៥ ខែសីហា បន្ទាប់ពីសង្ស័យថា លោក សួន សេរីរដ្ឋា មានការជាប់ពាក់ព័ន្ធនឹងក្រុមរណសិរ្សរំដោះជាតិ ដែលជាក្រុមចង់ផ្ដួលរំលំរដ្ឋាភិបាលលោក ហ៊ុន សែន។
ស្របពេលតុលាការសម្រេចឃុំខ្លួនជាបណ្ដោះអាសន្ននៅពន្ធនាគារព្រៃស ពីបទចោទប្រកាន់មួយចំនួនដោយសារធ្វើឱ្យប៉ះពាល់កងទ័ព អតីតប្រធានគណបក្សអំណាចខ្មែរ លោក សួន សេរីរដ្ឋា ក៏ត្រូវបានតុលាការបន្តស៊ើបអង្កេតពីបទសង្ស័យមួយករណីទៀត ថាមានការជាប់ពាក់ព័ន្ធជាមួយក្រុមរណសិរ្សរំដោះជាតិខ្មែររបស់លោក សម សេរី នៅក្រៅប្រទេស ដែលជាក្រុមចង់ផ្ដួលរំលំរដ្ឋាភិបាលរបស់លោក ហ៊ុន សែន សព្វថ្ងៃនេះ។
នៅព្រឹកថ្ងៃទី១៥ ខែសីហា ព្រះរាជអាជ្ញារងអមសាលាដំបូងរាជធានីភ្នំពេញ លោក សៀង សុខ បានដឹកនាំកម្លាំងប្រឆាំងភេរវកម្ម និងឧក្រិដ្ឋកម្មឆ្លងដែន និងកងកម្លាំងចម្រុះព្រោងព្រាតមួយចំនួនទៀតដែលមានគ្នាពី ៥០ ទៅ ៦០នាក់ ដោយខ្លះប្រដាប់ដោយអាវុធវែងខ្លីផង ចុះទៅឆែកឆេរផ្ទាល់នៅក្នុងទីស្នាក់ការកណ្ដាលគណបក្សអំណាចខ្មែរ ស្ថិតក្នុងខណ្ឌទួលគោក រាជធានីភ្នំពេញ ដើម្បីស្វែងរកភស្ដុតាងខ្លះៗ។ ការប្រើប្រាស់ពេលវេលាចុះឆែកឆេរអស់រយៈពេលប្រហែល ៥ម៉ោងនេះ ធ្វើឡើងស្របពេលគណបក្សអំណាចខ្មែរ កំពុងរៀបចំធ្វើសន្និសីទកាសែតជាមួយអ្នកសារព័ត៌មាន ដើម្បីបកស្រាយទៅនឹងចំណាត់ការតុលាការមកលើអតីតប្រធានគណបក្សរបស់ខ្លួន។
ថ្វីត្បិតប្រតិបត្តិការចុះឆែកឆេរធ្វើឡើងដោយសេរីនៅខាងក្នុងទីស្នាក់ការគណបក្ស រីឯសន្និសីទកាសែតប្ដូរមកធ្វើនៅខាងក្រៅក្បែរទីស្នាក់ការគណបក្ស ក៏មន្ត្រីសមត្ថកិច្ចខ្លះបានរំខាន និងបណ្ដេញឱ្យទៅធ្វើនៅលើទីតាំងមួយ ដែលស្ថិតឆ្ងាយពីទីស្នាក់ការបក្សប្រហែលជិត ១០០ម៉ែត្រ ដោយលើកហេតុផលថា ទុកពេលឱ្យព្រះរាជអាជ្ញាធរ និងសមត្ថកិច្ចជំនាញ បើកប្រតិបត្តិការឆែកឆេរនៅខាងក្នុង។
ថ្លែងទាំងមិនពេញចិត្តចំពោះការរារាំងមិនឱ្យធ្វើសន្និសីទកាសែតនៅក្បែរទីស្នាក់ការគណបក្សដោយស្រួលនោះ ប្រធានស្ដីទីគណបក្សអំណាចខ្មែរ លោក សួង សុភ័ណ្ឌ បានអះអាងថា លោក សួន សេរីរដ្ឋា ពុំបានសហការ ឬចាប់ដៃជាមួយលោក សម សេរី ប្រធានរណសិរ្សរំដោះជាតិខ្មែរ និងជានាយករដ្ឋមន្ត្រីនិរទេសឡើយ។ លោកក៏ស្នើឱ្យតុលាការត្រូវស្វែងរកអំណះអំណាងឱ្យបានត្រឹមត្រូវ និងមិនត្រូវសំអាងតែលិខិតមួយច្បាប់របស់លោក សម សេរី នោះទេ។
ទោះជាយ៉ាងណា លោក សួង សុភ័ណ្ឌ ចាត់ទុករឿងរ៉ាវដែលកើតលើលោក សួន សេរីរដ្ឋា ថាជាការលាបពណ៌៖ «ប៉ុន្តែគ្រាន់តែកិច្ចសហប្រតិបត្តិការ ពាក់ព័ន្ធនឹងនយោបាយក្ដី និងការងារអីក្ដី វាមិនមានជាមួយគ្នា ប៉ុន្តែអស់លោកមានឈាមជ័រជាខ្មែរ។ ខ្ញុំក៏ធ្លាប់និយាយជាមួយលោក សម សេរី អ៊ីចឹងនរណាក៏ដោយ ឱ្យតែទៅការពារក្ដីឱ្យ ឌុច (កាំង ហ្កេកអ៊ាវ ហៅ ឌុជ) សុទ្ធតែក្បត់ជាតិ»។
នៅក្រោយការឆែកឆេរបញ្ចប់ទៅ គេឃើញកម្លាំងសមត្ថកិច្ចបានប្រមូលឯកសារ កុំព្យូទ័រមួយចំនួននៅក្នុងទីស្នាក់ការគណបក្សអំណាចខ្មែរ ដាក់ចូលទៅក្នុងរថយន្ត ដោយមិនបានបញ្ជាក់ថា ទទួលបានលទ្ធផលពីការឆែកឆេរនោះឡើយ។ ចំណែកព្រះរាជអាជ្ញារងអមសាលាដំបូងរាជធានីភ្នំពេញ លោក សៀង សុខ ក៏បានព្យាយាមដើរសម្រុកទៅកាន់រថយន្តយ៉ាងលឿន និងមិនខ្ចីឆ្លើយសំណួររបស់អ្នកកាសែត ដោយបញ្ជាក់យ៉ាងខ្លីថា ទុកឱ្យសមត្ថកិច្ចធ្វើការ។
ជុំវិញករណីសង្ស័យថ្មីមកលើលោក សួន សេរីរដ្ឋា នេះ បានកើតឡើងបន្ទាប់ពីតុលាការទើបសម្រេចចោទប្រកាន់លោកចំនួន ៣បទល្មើសកាលពីថ្ងៃទី១៤ ខែសីហា ដូចជាបទញុះញង់កុំឱ្យយោធិនស្ដាប់បង្គាប់ បទធ្វើឱ្យខូចទឹកចិត្ត និងបទញុះញង់ឱ្យប្រព្រឹត្តបទឧក្រិដ្ឋជាអាទិ៍ នៃក្រមព្រហ្មទណ្ឌ បន្ទាប់ពីលោក សួន សេរីរដ្ឋា បញ្ចេញមតិតាមហ្វេកប៊ុក (Facebook) របស់លោកថា “មេទ័ពចោរត្រូវឡើងបុណ្យសក្ដិ ប្រមូលលុយកាក់សប្បាយជាមួយស្រីញី រីឯកងទ័ពត្រូវស្លាប់យ៉ាងវេទនា ប្រសិនបើកម្ពុជា ត្រូវផ្ទុះសង្គ្រាមជាមួយប្រទេសឡាវ មែននោះ”។ រដ្ឋាភិបាលចាត់ទុកការលើកឡើងនេះថា មិនមែនជាសិទ្ធិបញ្ចេញមតិឡើយ តែគឺជាការប្រមាថ និងញុះញង់ធ្វើឱ្យមានការបែកបាក់ក្នុងជួរកងទ័ព។
ប៉ុន្តែលោក សួង សុភ័ណ្ឌ បានបកស្រាយថា បន្ទាប់ពីមានការលើកឡើងរបស់លោក សួន សេរីរដ្ឋា នេះមក គឺពុំបានឃើញថា ធ្វើឱ្យខូចប្រយោជន៍ជាតិ និងប្រយោជន៍កងទ័ពឡើយ។ ផ្ទុយទៅវិញ ប្រសិនបើនៅតែចោទប្រកាន់មកលើលោក សួន សេរីរដ្ឋា លោក សួង សុភ័ណ្ឌ ក៏ស្នើឱ្យតុលាការត្រូវចាត់ការលើការប្រមាថរបស់លោក ហ៊ុន សែន ដែលព្រមានផ្ទុះសង្គ្រាមបើចាញ់ឆ្នោត ការប្រមាថរបស់រដ្ឋមន្ត្រីក្រសួងការពារជាតិ លោក ទៀ បាញ់ ព្រមានវាយបំបែកធ្មេញ និងការប្រមាថរបស់រដ្ឋមន្ត្រីក្រសួងសង្គមកិច្ច អតីតយុទ្ធជន និងយុវនីតិសម្បទា លោក វង សូត ព្រមានប្រើគល់ឫស្សីវាយជនណាតវ៉ាលទ្ធផលឆ្នោត ព្រោះលោកថា ករណីទាំងនេះមិនខុសគ្នានឹងករណីរបស់លោក សួន សេរីរដ្ឋា ឡើយ។
ក្រៅពីការចុះឆែកឆេរឯទីស្នាក់ការគណបក្សអំណាចខ្មែរ ដោយឡែក អង្គរក្សរបស់លោក សួន សេរីរដ្ឋា មួយរូប ឈ្មោះ ម៉ុម សួង ត្រូវបាននគរបាលព្រហ្មទណ្ឌកម្រិតធ្ងន់ បញ្ជូនខ្លួនមកតុលាការដើម្បីសាកសួរករណីរក្សាអាវុធខុសច្បាប់ ព្រមទាំងមានការធ្វើតេស្ដទឹកនោមរកសារធាតុគ្រឿងញៀនផងដែរ។
បើទោះជាប្រឈមនឹងការព្រមានពីថ្នាក់ដឹកកំពូលក្ដី លោក សួង សុភ័ណ្ឌ ដែលទើបចុះចូលជាមួយគណបក្សរបស់លោក សួន សេរីរដ្ឋា កាលពីប៉ុន្មានថ្ងៃមុននេះ បានអះអាងថា នឹងមិនមានផ្លូវច្បាប់ណាមួយអាចរំលាយគណបក្សនេះបានឡើយ ព្រោះលោក សួន សេរីរដ្ឋា បានលាលែង និងបានផ្ទេរសិទ្ធិឱ្យលោកធ្វើជាប្រធានស្ដីទីគណបក្សជំនួស៕
this country is under control of veitcong mafia dictator’ so when mafia groups or dictator say or threat to killed anybody no problem but other parties or ordinary people criticise them will be jail or kill’ .Cambodia is the dark world no freedom of speech ‘ but freedom only for veitcong mafia dictator and his veitcong mafia groups. people must vote to change for the good leader and must stay only two term only ‘.GOD bless all cambodian people’