ក្រុមអ្នកតវ៉ាក្នុងយុទ្ធនាការថ្ងៃចន្ទពណ៌ខ្មៅ កាលពីឆ្នាំមុន ដែលពេលនោះនាយកអង្គការសមាគមធាងត្នោត លោក អេម សារុំ ត្រូវចាប់ឃុំខ្លួនមួយរយៈ។
Fri, 20 October 2017
នៀម ឆេង and Ananth Baliga
ភ្នំពេញប៉ុស្តិ៍
ភ្នំពេញៈ នាយឧត្តមសេនីយ៍ នាង ផាត រដ្ឋលេខាធិការក្រសួងការពារជាតិបានថ្លែងកាលពីម្សិលមិញថាសមាគមធាងត្នោតបានទទួលមូលនិធិពី ៤០ ម៉ឺនទៅ ៥០ ម៉ឺនដុល្លារពីអាមេរិកដើម្បីបម្រើយុទ្ធសាស្ត្ររបស់អាមេរិក ប៉ុន្តែសមាគមនេះបានបដិសេធ។
លោក នាង ផាត បានថ្លែងដូច្នេះក្នុងពិធីផ្សព្វផ្សាយស្ថានភាពនយោបាយដល់កងទ័ពនៅសាលប្រជុំក្រសួងការពារជាតិ។
តាមរយៈសារព័ត៌មានដើមអំពិលលោក នាង ផាត បានថ្លែងថា សមាគមធាងធ្នោតបានធ្វើសកម្មភាពញុះញង់សហគមន៍នានាឲ្យប្រឆាំងនឹងរដ្ឋាភិបាលតាមរយៈការតវ៉ាទាមទារផ្សេងៗ។
លោកថ្លែងថា មានការបង្កើតសហគមន៍ប្រមាណ ៣ ពាន់សហគមន៍នៅតាមខេត្តហើយនៅភ្នំពេញមានចំនួន ៣០០ សហគមន៍ដែលសហគមន៍ទាំងនេះសុទ្ធតែប្រឆាំងនឹងរដ្ឋាភិបាល។
លោកបញ្ជាក់ថា៖ «មានកន្លែងខ្លះសមាគមនេះបង្កើតជាក្រុមធ្វើបាតុកម្ម។ បើអ៊ីចឹងទេ យើងងាកមកឃើញថាក្រុមនេះជ្រកក្រោមអង្គការផ្សេងៗលើផែនការដែលធ្វើបដិវត្តន៍មួយទៀតដែលយើងឃើញកន្លងមកហៅបដិវត្តន៍មួយទៀតគឺថ្ងៃចន្ទអាវខ្មៅរបស់ អ៊ី សារុំ ក៏យើងបានឃាត់សាកសួរអប់រំតាមរយៈនេះគាត់ក៏បានសារភាពដែរថាពួកគាត់បានទទួលមូលនិធិប្រចាំឆ្នាំពី ៤០ ទៅ ៥០ ម៉ឺនដុល្លារក្នុងមួយឆ្នាំវាមានលុយបង្កើតឲ្យមានចលនាទាំងអស់នេះដើម្បីបម្រើយុទ្ធសាស្ត្ររបស់ពួកអាមេរិក»។
ភ្នំពេញប៉ុស្តិ៍ បានទាក់ទងសុំការបំភ្លឺបន្ថែមពីនាយឧត្តមសេនីយ៍ នាង ផាត ប៉ុន្តែលោកថ្លែងថា អ្វីដែលលោកបានថ្លែងកាលពីម្សិលមិញនោះគឺយោងតាមរបាយការណ៍របស់នាយឧត្តមសេនីយ៍ ឆៃ ស៊ីណារិទ្ធ អគ្គស្នងការរងនគរបាលជាតិ។
នាយឧត្តមសេនីយ៍ ឆៃ ស៊ីណារិទ្ធ មិនអាចទាក់ទងសុំការបំភ្លឺបានទេ កាលពីម្សិលមិញ។
លោក សុង សារ៉ាន់ នាយកប្រតិបត្តិសមាគមធាងត្នោតថ្លែងថា សមាគមរបស់លោកបង្កើតកម្មវិធីដើម្បីផ្តល់ជំនួយបច្ចេកទេសសម្រាប់ពលរដ្ឋក្រីក្រ ពាក់ព័ន្ធនឹងសិទ្ធិលំនៅឋានឲ្យពួកគាត់យល់ពីសិទ្ធិលំនៅឋាន និងច្បាប់ដែលពាក់ព័ន្ធនឹងពួកគេ។ «សមាគមធាងត្នោតមិនដែលបានទទួលមូលនិធិពីអង្គការ USAID ឬពីក្រសួងការបរទេសអាមេរិកទេ ហើយសមាគមក៏មិនបម្រើឲ្យយុទ្ធសាស្ត្ររបស់អាមេរិក ឬបរទេសណាមួយដែរ»។
អ្នកស្រី ច្រាយ នី ពីសហគមន៍ថ្មគោលដែលរងគ្រោះរឿងដីធ្លីបានថ្លែងថា សហគមន៍អ្នកស្រីទទួលបានការបណ្តុះបណ្តាលផ្នែកច្បាប់ដីធ្លី និងសិទ្ធិមនុស្សពីសមាគមធាងត្នោត។
អ្នកស្រីថ្លែងថា៖ «រដ្ឋាភិបាលគួរបញ្ឈប់ការលាបពណ៌ដល់អង្គការសមាគម អង្គការដៃគូដែលគាត់ធ្លាប់ជួយផ្នែកច្បាប់ និងផ្នែកផ្សេងៗបំពេញជំនួសរាជរដ្ឋាភិបាលដែលមានកង្វះខាតនៅពេលគាត់អភិវឌ្ឍកន្លែងណាប្រជាពលរដ្ឋទឹកភ្នែកកន្លែងហ្នឹង»។
លោក ចាន់ ពុទ្ធិសាក់ សកម្មជនដីធ្លីនៅតំបន់បឹងកក់បានប្រតិកម្មថាការតវ៉ារបស់ពលរដ្ឋរងគ្រោះមិនមែនដោយសារការញុះញង់របស់សមាគម ឬអង្គការសង្គមស៊ីវិលណាមួយនោះទេ ប៉ុន្តែដោយសារតែជនរងគ្រោះមិនអាចសុំអន្តរាគមន៍ពីរដ្ឋាភិបាលបាន។
លោកថា ការចោទប្រកាន់នេះជារឿងអយុត្តិធម៌សម្រាប់សមាគម និងអង្គការសង្គមស៊ីវិល។
ស្ថានទូតអាមេរិកបានថ្លែងប្រាប់តាមសារអេឡិចត្រូនិកយ៉ាងខ្លីថាអាមេរិកគាំទ្រដល់ការរកដំណោះស្រាយដោយសន្តិវិធីសម្រាប់ជម្លោះដីធ្លីនានា ប៉ុន្តែថាខ្លួនហាក់ដូចជាមិនមានទំនាក់ទំនងជាមួយសមាគមធាងត្នោតទេ៕
Contact authors: នៀម ឆេង and Ananth Baliga
ជាក់ស្ដែងគេមិនចង់ឲ្យមានអ្នកណាមកបង្រៀនប្រជាពលរដ្ឋខ្មែរយើងឲ្យចេះដឹងអំពីច្បាប់និងសិទ្ធិរបស់ខ្លួនទេ
នៅពេលប្រជាពលរដ្ឋបានយល់ដឹង ពួកគេពិបាកជិះជាន់