25/11/2017
RFI
ទិដ្ឋភាពនៃរដ្ឋសភាកម្ពុជា (©សហការី)
សភាកម្ពុជាទាំងពីរថ្នាក់ បានចេញសេចក្តីថ្លែងការណ៍មួយដោយចាត់ទុកការបារម្ភរបស់សភាអន្តរជាតិជាពិសេសព្រឹទ្ធសភារបស់សហរដ្ឋអាមេរិកនាពេលកន្លងមកនោះថា ជាការបារម្ភលើសពីភាពចាំបាច់ រហូតក្លាយជាទង្វើជ្រៀតជ្រែកកិច្ចការផ្ទៃក្នុងរបស់កម្ពុជា។ ប្រតិកម្មនេះដែលទើបតែធ្លាក់មក កាលពីថ្ងៃទី២៤វិច្ឆិកាម្សិលមិញនេះគឺជាការឆ្លើយដោយប្រយោលទៅកាន់សភាអន្តរជាតិ និងជាការឆ្លើយតបចំៗទៅកាន់ព្រឹទ្ធសភាអាមេរិក។ ព្រឹទ្ធសភាអាមេរិកដែលបានដាក់ឱសានវាទឲ្យរដ្ឋាភិបាលកម្ពុជាដោះលែង លោក កឹម សុខា តាំងពីថ្ងៃ៩វិច្ឆិកា និងទាមទារឲ្យបញ្ឈប់ការរំលាយគណបក្សសង្រ្គោះជាតិនោះ។
ដោយ អ៊ឹង ប៊ុនថន
នៅក្នុងសេចក្តីថ្លែងការណ៍ដែលធ្វើឡើងនៅថ្ងៃទី២៤ ខែវិច្ឆិកា ព្រឹទ្ធសភា និងរដ្ឋសភារបស់កម្ពុជា អះអាងថា ការរំលាយគណបក្សសង្គ្រោះជាតិ និងការចាប់ខ្លួនលោក កឹម សុខា គឺធ្វើឡើង ទៅតាមច្បាប់របស់កម្ពុជា ដោយចោទថា លោក កឹម សុខា បានឃុបឃិតជាមួយបរទេស ដើម្បីផ្តួលរំលំរដ្ឋាភិបាលស្របច្បាប់។
ជាមួយគ្នានេះ សភាកម្ពុជាទាំងពីរថ្នាក់នេះ ក៏បានគាំទ្រពេញទំហឹងនូវគោលករណ៏មិនជ្រៀតជ្រែកកិច្ចការផ្ទៃក្នុងប្រទេសដទៃ របស់លោកប្រធានាធិបតី ដូណាល់ ត្រាំ ផងដែរ។
សេចក្តីការណ៍កម្រាស់៣ទំព័ររបស់សភាខ្មែរនេះ ក៏បានឆ្លើយតបទៅនឹងការរិះគន់ពីមជ្ឈដ្ឋានអន្តរជាតិ ចំពោះការបិទវិទ្យុ និងកាសែតដែលតែងតែផ្សាយរិះគន់រដ្ឋាភិបាលកម្ពុជានោះដែរ។
សភាកម្ពុជាទាំងពីរថ្នាក់នេះ បកស្រាយថា ការបញ្ឈប់ផ្សាយរបស់វិទ្យុអាស៊ីសេរី និង វិទ្យុVOA គឺដោយសាររំលោភកិច្ចព្រមព្រៀងជាមួយក្រសួងព័ត៌មាន ខណៈកាសែត The Cambodia Daily បញ្ឈប់ផ្សាយដោយសារតែមិនបានបង់ពន្ធ។ចំណែក ការបញ្ឈប់ប្រតិបត្តិការអង្គការNDI គឺដោយសារតែអង្គការនេះមិនចុះបញ្ជី និងបង្ហាញរបាយការណ៍ហិរញ្ញវត្ថុ។
សូមបញ្ជាក់ថា សមាជិកព្រឹទ្ធសភាអាមេរិក លោក Ted Cruz បានចេញសារព្រមានម្តងហើយម្តងទៀតថា ទាមទារឲ្យរដ្ឋាភិបាលកម្ពុជាដោះលែង លោក កឹម សុខា តាំងពីថ្ងៃទី ៩វិច្ឆិកា ឆ្នាំ២០១៧។ជាមួយគ្នានោះ ព្រឹទ្ធសភាអាមេរិកដែលធ្លាប់តែមានឥទ្ធិពលរូបនេះ បានអះអាងថាលោកនឹងស្នើទៅរដ្ឋបាលលោកដូណាល់ ត្រាំ ដើម្បីដាក់ទណ្ឌកម្ម ហាមឃាត់មិនឲ្យមន្រ្តីរដ្ឋាភិបាលកម្ពុជាចូលទឹកដីអាមេរិក និងអាចឈានទៅបង្កកព្រទ្យសម្បត្តិទៀតផង។
លើសពីនេះទៀត សហភាពអ៊ឺរ៉ុបដែលជាបណ្តុំប្រទេសចំនួន២៧ បានព្រមាននាពេលចុងក្រោយនេះថា សហភាពអ៊ឺរ៉ុបនឹងបញ្ឈប់ការអនុគ្រោះពន្ធលើការនាំទំនិញពីកម្ពុជាចូលទៅលក់នៅទីផ្សារអ៊ឹរ៉ុប ករណីដែលកម្ពុជាបានរំលាយគណបក្សប្រឆាំងដ៏ធំជាងគេ។
សហភាពអ៊ឺរ៉ុប ក៏បានគូសបញ្ជាក់ថា ការគាំទ្ររបស់ខ្លួនគឺសម្រាប់ឲ្យកម្ពុជាមានការគោរពសិទ្ធិមនុស្សជាចំបង និងមានប្រជាធិបតេយ្យសេរីពហុបក្ស។
យ៉ាងណាក៏ដោយ នៅក្នុងសេចក្តីថ្លែងការណ៍របស់សភាកម្ពុជា បានអះអាងថា កម្ពុជានៅតែបន្តប្តេជ្ញារៀបចំការបោះឆ្នោតជ្រើសតាំងសមាជិកព្រឹទ្ធសភា និងតំណាងរាស្រ្តនៅឆ្នាំ២០១៨ដោយបន្តលើកកម្ពស់លទ្ធិប្រជាធិបតេយ្យ សេរី ពហុបក្ស ការគោរពសិទ្ធិមនុស្ស និងនីតិរដ្ឋ ដែលមានគណបក្សនយោបាយជាង៣០នៅកម្ពុជា៕
វាពិតជាប្រជាធិបតេយ្យក្លែងក្លាយ ១០០%ហើយ។ ពួកនេះនៅតែស្រែកថាប្រជាធិបតេយ្យអញ្ចឹងឲ្យតែពួកចោរទាំងនេះនៅកាន់អំណាច។ បើពួកចោរទាំនេះថាប្រជាធិបតេយ្យ ហេតុអ្វីត្រូវរំលាយគណបក្សសង្គ្រោះជាតិដែលមានពលរដ្ឋកន្លះប្រទេសបោះឆ្នោតឲ្យ ហើយទៅរើសយកគណបក្សដែលពលរដ្ឋមិនគាំទ្រទៅវិញ។ យើងដឹងច្បាស់ណាស់ពីមូលហេតុរំលាយនេះ គឺគ្មានទាក់អីនឹងអំពើក្បត់ជាតិអ្វីបន្តិចទាល់តែសោះ គ្រាន់តែគេចង់ឈ្នះឆ្នោត ថាគេចង់រំលំរដ្ឋភិបាល គឺដោយសារតែគណបក្សសង្គ្រោះជាតិមានប្រជាប្រីយភាពខ្លាំង គឺយើងដឹងរឿងហ្នឹង តាំងពីពេលពួកចោរនេះចាប់ លោកកឹមសុខាមកម៉្លេះ ហើយកាន់តែច្បាស់ទៅទៀតនោះ គឺការបែកធ្លាយសំដី ហ៊ុនសែន កាលពីពេលថ្មីៗនេះ ជាភ័ស្តុតាងស្រាប់។
គួរអោយសោកស្ដាយដែលប្រទេសយើងមានសុទ្ធសឹងតែជាក្រុមអាយ៉ង រដ្ធាភិបាលទាំងមូលជាអាយ៉ងបរទេសរីឯ គជប និង រដ្ឋសភាទាំងពីថ្នាក់ក៏ជាអាយ៉ង របស់ ហ៊ុនសែន តុលាការគ្រប់ជាន់ថ្នាក់ក៏ជាអាយ៉ងរបស់ ហ៊ុន សែន ដូច្នេះរដ្ធាភិបាលក្រុងភ្នំពេញជារដ្ធាភិបាលខុសច្បាប់មិនស្របច្បាប់ដូចនេះយើងជាប្រជាជនខ្មែរមានសិទ្ធិកំចាត់ក្រុមមិនស្របច្បាប់និងខុស់ច្បាប់នេះចេញបាននៅពេលណាយើងរៀបចំរួចរាល់ហើយ។