មេនគរបាលរាជធានីភ្នំពេញ បានសម្រេចដកបញ្ឈរជើងមន្រ្តីនគរបាលម្នាក់ បន្ទាប់ពីនគរបាលរូបនោះ បានប្រើអំពើហិង្សាទៅលើស្រ្តីម្នាក់ ដែលនគរបាលរូបនោះចោទថា បានបើកបរម៉ូតូបញ្ច្រាសផ្លូវកាលពីម្សិលមិញ។
វីដេអូឃ្លីបមួយដែលត្រូវបានចែកចាយតាមបណ្តាញសង្គមកាលពីថ្ងៃម្សិលមិញនេះ បង្ហាញមន្ត្រីនគរបាល លោក កៅ សំអុល បានទះកំផ្លៀងទៅលើផ្ទៃមុខស្ត្រីម្នាក់ ដែលមន្ត្រីនគរបាលចរាចរណ៍រូបនេះចោទថា បានបើកបរម៉ូតូបញ្ច្រាសទិស និងអត់ពាក់មួកសុវត្ថិភាព។
ក្នុងលិខិតបង្គាប់ការចុះថ្ងៃទី២២ឧសភានេះ ស្នងការនគរបាលរាជធានីភ្នំពេញ លោក ជួន សុវណ្ណ បានសម្រេចផ្អាកការងារលោក កៅ សំអុល ជាបណ្ដោះអាសន្ន និងបង្គាប់ឲ្យមន្ត្រីនគរបាលរូបនេះបង្ហាញខ្លួននៅការិយាល័យបុគ្គលិករៀងរាល់ម៉ោងធ្វើការ។
បើតាមលិខិតបង្គាប់ការ លោក ជួន សុវណ្ណ បានហៅទង្វើមន្ត្រីនគរបាលចរាចរណ៍រូបនេះថា «គ្មានសីលធម៌ និងខ្វះសុជីវធម៌» និងធ្វើឲ្យប៉ះពាល់ដល់កិត្តិយសនគរបាលជាតិ។
ទោះជាយ៉ាងណា មន្ត្រីនគរបាលរូប មិនត្រូវបានឃាត់ខ្លួននោះឡើយ ខណៈដែលមន្ត្រីសង្គមស៊ីវិលថ្កោលទោសចំពោះទង្វើមន្ត្រីសាធារណៈបែបនេះ និងទាមទារឲ្យផ្ដន្ទាទោសទៅតាមច្បាប់។
នាយិកាអង្គការសីលការ លោកស្រី ធីតា ឃឹស បានឲ្យដឹងថា មន្រ្តីនគរបាលរូបនោះ បានធ្វើខុសច្បាប់រដ្ឋបាលរបស់នគរបាល និងមានកំហុសផ្នែកព្រហ្មទណ្ឌ។
លោកស្រី ធីតា ឃឹស ឲ្យដឹងថា នេះមិនមែនជាលើកទី១ទេ ដែលមន្រ្តីអាជ្ញាធរនគរបាល ទាហ៊ាន និងប៉េអឹម ប្រើហិង្សាលើស្ត្រីនោះ កន្លងមកមានមន្រ្តីទាំងនោះច្រើនណាស់បានប្រើហិង្សាលើស្រ្តីដូចជាស្រ្តីអាជីវករ ស្រ្តីសហជីព កម្មការិនី និងអ្នកមានជម្លោះដីធ្លីជាដើម ដោយមន្រ្តីអាជ្ញាធរទាំងនោះមិនត្រូវបានដាក់ទោសទណ្ឌនោះឡើយ៕
នេះជាលទ្ធផលនៃសង្គមហឹង្សា និង និទន្តភាព បក្សពួកនិយម ពុករលួយ សាបព្រោះដោយមេដឹកនាំកំពូល គឺពលរដ្ឋឈឺចាប់ឥតល្ហែ។