ដោយ អាស៊ីសេរី
2021-05-11
RFA

លោក​ ហ្វ៊ីល​ រ៉ូប៊ើតសុន​ (​Phil Robertson​) ​នាយក​រង​ប្រចាំ​តំបន់​អាស៊ី​នៃ​អង្គការ​ឃ្លាំមើល​សិទ្ធិមនុស្ស​អន្តរជាតិ​ ​យូ​មែន​ ​រ៉ៃត៍វ៉ច្ឆ (​Human Rights ​Watch​)។ រូប៖ RFA

មន្រ្តី​​ឃ្លាំមើល​សិទ្ធិមនុស្ស​អន្តរជាតិ​ ​ថា​ជំងឺ​កូ​វី​ដ​-​១​៩​ ​បាន​ឆ្លង​រាលដាល​ដល់​អ្នកជាប់ឃុំ​​នៅ​ក្នុង​ពន្ធ​នាគា​រ​​ក៏​ដោយ​សារ​តែ​​រដ្ឋាភិបាល​​​មិន​​អើពើ​​ចំពោះ​​ក្តី​កង្វល់​​ ​និង​​សារ​​អំពាវនាវ​​របស់​​អង្គការ​សង្គម​​ស៊ីវិល​ ​ដែល​​បាន​​ស្នើ​ឲ្យ​រដ្ឋាភិបាល​ ​ចាត់វិធានការ​​បន្ទាន់​​លើ​​រឿង​​នេះ​។​

នាយក​រង​ប្រចាំ​តំបន់​អាស៊ី​នៃ​អង្គការ​ឃ្លាំមើល​សិទ្ធិមនុស្ស​អន្តរជាតិ​ ​យូ​មែន​ ​រ៉ៃត៍វ៉ច្ឆ (​Human Rights ​Watch​) ​លោក​ ហ្វ៊ីល​ រ៉ូប៊ើតសុន​ (​Phil Robertson​) ​ចេញ​សេចក្តីថ្លែង​ការណ៍​នៅ​ថ្ងៃ​ទី​​១​១​ ​ខែ​​ឧសភា​ ​ថា​ជា​រឿង​គួរឲ្យ​សោកស្ដាយ​​​ដែល​​សំឡេង​​អំពាវនាវ​​របស់​​អង្គការ​សង្គម​ស៊ីវិល​​​ដែល​​ទទូច​​ឲ្យ​​រដ្ឋាភិបាល​​​ដោះស្រាយ​បញ្ហា​​អ្នក​ទោស​​​ជាពិសេស​​បញ្ហា​ចង្អៀត​ណែន​នៅ​ក្នុង​ពន្ធ​នាគា​រ​ ​បែរជា​ត្រូវ​រដ្ឋាភិបាល​ ​ធ្វើមិនដឹង​មិន​ឮ​ ​រហូត​គ្រោះថ្នាក់​នេះ​ ​ឥឡូវ​កើតឡើង​ជាយថាហេតុ​ហើយ​។​ ​លោក​ថា​ ​ទាល់តែ​ទឹក​ដល់​ច្រមុះ​ ​ទើប​រដ្ឋាភិបាល​ ​ភ្ញាក់ខ្លួន​​​ចាប់ផ្តើម​​ប្រវេ​ប្រវា​ចាត់ការ​រឿង​នេះ​។​

​ទោះ​ជា​យ៉ាងនេះ​ក្ដី​​​លោក​ ហ្វ៊ីល​ រ៉ូប៊ើតសុន​ ​ថា​​នៅ​ពេល​​​ឃើញ​​មាន​​សញ្ញាវិជ្ជមាន​ខ្លះ​ ​ដែល​រដ្ឋាភិបាល​មាន​ផែនការ​ធ្វើ​តេ​ស្ត​រក​ជំងឺ​កូ​វី​ដ​-​១​៩​ ​លើ​​អ្នកទោស​​នៅ​​ទូទាំង​​ប្រទេស​ ​ក្រោ​យ​​ផ្ទុះ​ការ​​ឆ្លង​​ជំងឺ​កូ​វី​ដ​-​១​៩​ ​ដល់​អ្នកទោស​​នៅ​​ពន្ធ​នាគា​រ​​ខេត្ត​ព្រះ​សី​ហ​នុ​។​ ​ប៉ុន្តែ​លោក​ថា​ ​ចំណាត់​ការ​ត្រឹម​ប៉ុណ្ណឹង​ ​នៅ​តិចតួចស្តួចស្តើង​ណាស់​។​ ​លោក​ស្នើ​ឲ្យ​​រដ្ឋាភិបាល​​ធ្វើ​ច្រើន​ជាង​​នេះ​​​ពោល​​គឺ​ត្រូវ​​អនុវត្ត​វិធាន​ការ​បន្ទាន់​ ​ដោយ​​ដោះលែង​​អ្ន​ក​ទោស​ ​ដែល​​ងាយ​​រងគ្រោះ​​ដោយសារ​​ជំងឺ​កូ​វី​ដ​-​១​៩​នេះ​ ​ដូចជា​​ស្រ្តី​មានផ្ទៃពោះ​ ស្រ្តី​​មាន​កូន​​នៅ​​ជា​មួយ​ ​មនុស្សចាស់​ ​ឬ​អ្នកទោស​ជា​ជន​ពិការ​។​

​មិនតែប៉ុណ្ណោះ​ ​លោក​បន្ថែម​ថា​ ​ក្នុង​កាលៈទេសៈ​បែប​នេះ​ ​រដ្ឋាភិបាល​គួរតែ​ចាត់វិធានការ​មួយ​ជំហាន​ទៀត​ ​ដោយ​កំណត់​អ្នកទោស​​ជា​ក្រុម​អាទិភាព​ ​ដើម្បី​ទទួល​បាន​​វ៉ាក់សាំង​បង្ការ​ជំងឺ​កូ​វី​ដ​-​១​៩​ ​មុនគេ​ផង​។​ ​ជាចុងក្រោយ​លោក​រម្លឹក​មេដឹកនាំ​កម្ពុជា​ ​ឲ្យ​ព្រម​ទទួលស្គាល់​ការពិត​ថា​ ​ពន្ធ​នាគា​រដែ​ល​ចង្អៀត​ណែន​ ​គឺជា​កត្តា​ដែល​នាំទៅ​រកគ្រោះ​មហន្តរាយ​ក្នុង​ការ​ចម្លង​ជំងឺ​កូ​វី​ដ​-​១​៩​ ​ព្រោះ​ស្ថានភាព​បែប​នេះ​ ​ងាយ​នឹង​ធ្វើឲ្យ​ការ​រីក​រាលដាល​នៃ​ជំងឺ​នេះ​ ​ផ្ទុះឡើង​លឿន​ ​និង​មិន​អាច​គ្រប់គ្រង​បាន​ ​បើ​រដ្ឋាភិបាល​មិន​ចាត់ការ​ឲ្យបាន​ត្រឹមត្រូវ​ពី​ពេលឥឡូវនេះ​៕

កំណត់​ចំណាំ​ចំពោះ​អ្នក​បញ្ចូល​មតិ​នៅ​ក្នុង​អត្ថបទ​នេះ៖ ដើម្បី​រក្សា​សេចក្ដី​ថ្លៃថ្នូរ យើង​ខ្ញុំ​នឹង​ផ្សាយ​តែ​មតិ​ណា ដែល​មិន​ជេរ​ប្រមាថ​ដល់​អ្នក​ដទៃ​ប៉ុណ្ណោះ។