03 តុលា 2022
លាស់ លីបលីប
វីអូអេខ្មែរ
ភ្នំពេញ — លោកនាយករដ្ឋមន្រ្តី ហ៊ុន សែន កាលពីថ្ងៃសោរ៍ បានថ្លែងថា លោកបានប្រើយុទ្ធសាស្រ្ត «រុញទូកបណ្តោយទឹក» ដើម្បីជាអន្ទាក់សម្រាប់អ្នកនយោបាយ ដោយក្នុងនោះមានការផ្តល់ប្រាក់ និងនារីដើម្បីបំពេញការចូលចិត្តរបស់ពួកគេ។
នេះជាប្រតិកម្មរបស់នាយករដ្ឋមន្រ្តីទៅនឹងអ្នករិះគន់ដែលថា លោក ហ៊ុន ម៉ាណែត ដែលជាកូនប្រុសរបស់លោកគ្មានសមត្ថភាពធ្វើជានាយករដ្ឋមន្ត្រី។
លោក ហ៊ុន សែន បានថ្លែងថា លោកប្រើប្រាស់យុទ្ធសាស្ត្ររុញទូកបណ្តោយទឹកដោយលោកបានឌឺដងថា បើអ្នកញៀនល្បែងគឺលោកឱ្យលុយលេងល្បែងថែម ហើយបើអ្នកចូលចិត្តនារី គឺលោករកនារីមកតម្រូវចិត្តតែម្តង។
លោក ហ៊ុន សែន ថ្លែងថា៖ «អ៊ីចឹងបើអ្នកឯងយល់ថា ហ៊ុន ម៉ាណែត វាអត់បានការ អ្នកឯងបណ្តោយឱ្យទៅ! គេហៅយុទ្ធសាស្ត្ររុញទូកបណ្តោយទឹក។ អាហ្នឹងខ្ញុំប្រើយូរហើយអីតើ។ ខ្ញុំថា អាពួកហ្នឹងណា៎ វាដឹកនាំបន្តិចទៀត វារលាយហើយ។ អ៊ីចឹងកុំចាំបាច់ទៅប្រដៅវា។ អាណាពូកែខាងស្រីឱ្យលុយថែម រៀបស្រីឱ្យហ្អែងបណ្តោយទៅ។ អាណាពូកែល្បែងជូនលុយឱ្យចូលល្បែងទៅ! អញនៅអញធ្វើការ។ អាហ្នឹងនិយាយឱ្យជាក់ស្តែងអ៊ីចឹងហ្មង។ អាហ្នឹងគេហៅថា យុទ្ធសាស្ត្ររុញទូកបណ្តោយទឹកដើម្បីគ្រប់គ្រងវា»។
លោក ហ៊ុន សែន បន្ថែមថា បើកាន់តែរិះគន់ លោកកាន់តែដំណើរការកាន់តែលឿន ហើយបើទោះបីលោកមិនធ្វើជានាយករដ្ឋមន្ត្រី ក៏លោកនៅតែមានសិទ្ធិក្នុងការផ្តល់មតិយោបល់ ក្នុងនាមជាប្រធានគណបក្ស។
លោកបន្តថា៖ «ហើយចង់អ្នកណាថាអីថាទៅ! អ្នកឯងព្រុសតាមចិត្តចុះ! ហើយពាក្យថា ព្រុសហើយ គេមិនដែលហៅថា មនុស្សទេ។ នាំគ្នាព្រុសទៅ! ព្រុសឱ្យវាឮបន្តិចទៅ! ព្រុសកាន់តែខ្លាំង ដំណើរការកាន់តែលឿន ប្រាប់អ្នកឯងឱ្យច្បាស់។ អ្នកឯងមករអ៊ូថា លោក ហ៊ុន សែន កាន់អំណាចយូរណាស់ ចុះបើហ៊ុន សែនដើរចេញ រួចហើយប្រគល់ឱ្យកូនហ៊ុន សែនធ្វើវាមានទាស់ក្បាលអ្នកឯងអី! ប្រជាជនបោះឆ្នោតអីតើ»។
គណបក្សក្រៅរដ្ឋាភិបាលយល់ថា លោកនាយករដ្ឋមន្ត្រី ហ៊ុន សែន មិនចាំបាច់ការពារកូនរបស់ខ្លួននោះទេ តែអ្វីដែលសំខាន់គឺត្រូវតែធានាដល់ដំណើរការបោះឆ្នោតថ្នាក់ជាតិឱ្យប្រព្រឹត្តទៅដោយសេរី និងយុត្តិធម៌។
លោក ថាច់ សេដ្ឋា ប្រធានស្តីទីគណបក្សភ្លើងទៀន យល់ឃើញថា ការប្រើប្រាស់វោហារសព្ទឌឺដងបែបនេះវាល្អជាជាងការប្រើប្រាស់កម្លាំងបាយ និងការប្រើប្រាស់អំពើទុច្ចរិតណាមួយក្នុងការវាយគូប្រកួតប្រជែងនយោបាយ។ លោកបន្តថា គណបក្សភ្លើងទៀនមិនមានការភ័យខ្លាចក្នុងការប្រកួតប្រជែងជាមួយគណបក្សកាន់អំណាច ដែលមានលោក ហ៊ុន សែន ឬបេក្ខភាពអនាគតនាយករដ្ឋមន្ត្រីរបស់គណបក្សប្រជាជនកម្ពុជា គឺលោក ហ៊ុន ម៉ាណែត នោះទេ។
លោកថ្លែងថា៖ «ទោះបីបេក្ខជននាយករដ្ឋមន្ត្រី អ្នកណាក៏ដោយ ក៏ជាគូប្រកួតជាមួយគណបក្សភ្លើងទៀនដដែល»។
ចំណែកលោក គង់ មុនីកា ប្រធានគណបក្សឆន្ទៈខ្មែរ យល់ឃើញថា ពាក្យពេចន៍ឌឺដងរបស់លោកនាយករដ្ឋមន្ត្រីនេះ គ្រាន់តែជាចិត្តសាស្ត្រ និងយុទ្ធសាស្ត្រមួយតែប៉ុណ្ណោះ។ ប៉ុន្តែលោកថា លោកនាយករដ្ឋមន្ត្រីមិនគួរខ្វាយខ្វល់រឿងនេះទេ គួរតែខ្វាយខ្វល់អំពីការរៀបចំប្រព័ន្ធបោះឆ្នោតមួយឱ្យប្រកដដោយយុត្តិធម៌ ធានាថា គ្មានការបំភិតបំភ័យប្រជាពលរដ្ឋ និងសកម្មជននយោបាយ និងត្រូវបើកចំហសិទ្ធិនយោបាយឱ្យមានភាពទូលំទូលាយសម្រាប់ការប្រកួតប្រជែងការបោះឆ្នោតថ្នាក់ជាតិនាពេលខាងមុខ។
លោកថ្លែងថា៖ «ខ្ញុំគិតថា លោកនាយករដ្ឋមន្ត្រី ហ៊ុន សែន ពុំចាំបាច់ខ្វល់ខ្វាយ អ្នកដែលមានមតិផ្ទុយ អ្នកដែលមានការមិនពេញចិត្តចំពោះបេក្ខភាពលោក ហ៊ុន ម៉ាណែត ជានាយករដ្ឋមន្ត្រីអនាគតអីនោះទេ ព្រោះវាជារឿងផ្ទៃក្នុងរបស់គណបក្សប្រជាជនកម្ពុជា។ អ្វីដែលលោក ហ៊ុន សែន គួរតែខ្វាយខ្វល់ គួរតែយកចិត្តទុកដាក់នោះគឺការធានាការប្រកួតមួយដែលមានយន្តការ ឬទីលានប្រកួតប្រកបដោយស្មើភាពនឹងសមភាព យុត្តិធម៌ គឺជារឿងមួយចាំបាច់»។
លោក ហ៊ុន ម៉ាណែត កាលពីថ្ងៃអាទិត្យ ក៏បានបង្ហោះសារគាំទ្រនូវការថ្លែងរបស់លោក ហ៊ុន សែន។ ឌឺដឹងនឹងអ្នករិះគន់ លោកថ្លែងក្នុងន័យដើមថា៖ «អរគុណចំពោះអស់លោកទាំងអស់ដែលតែងតែចំណាយអស់នូវពេលវេលា កម្លាំងកាយចិត្ត ប្រាជ្ញាស្មារតី ខិតខំប្រឹងប្រែងបង្កើតគំនិត និងរឿងផ្សេងៗដើម្បីរិះគន់ វាយប្រហារខ្ញុំ ព្រមទាំងបានជួយផ្សព្វផ្សាយលើបណ្តាញផ្សព្វផ្សាយព័ត៌មានមួយចំនួន ដោយឥតគិតថ្លៃ ដែលទាំងនេះបានផ្តល់ឱកាសឱ្យខ្ញុំអាចរៀនចេះការពារ និងពង្រឹងខ្លួនឯងឱ្យបានកាន់តែរឹងមាំ»៕
WOW….. all HUN SEN’s word telling Cambodian about his win and win policy . to me HUN SEN is own this poor people he acting he is their GOD every thing is up to him , the ugly evil monster killer is sourly not the leader of this nation he is 100% evil that have been born in a poor family of HUN . we knew he is trying to cleaning himself to be Cambodian GOD but sorry your true story will return by your own evil act . CHHEAM SREK SBEKHOW soon