កម្ពុជា
17/04/2024 – 10:46
ដោយ៖ អ៊ឹង ប៊ុនថន
RFI
ប្រមុខការទូតចិន លោក វ៉ាង យី គ្រោងបំពេញទស្សនកិច្ចក្នុងសប្តាហ៍នេះនៅក្នុងប្រទេសអាស៊ីចំនួន ៣ប្រទេស។ បើតាមសារព័ត៌មានចិន South China Morning Post ទស្សនកិច្ចរបស់លោក វ៉ាង យី មានគោលដៅជំរុញការអនុវត្តលើគម្រោងខ្សែក្រវ៉ាត់ និងផ្លូវ ដែលបានផ្តួចផ្តើមឡើងដោយប្រធានាធិបតីចិនលោកស៊ី ជីនពីង។
កម្ពុជាជាប្រទេសមួយក្នុងចំណោម ៣ប្រទេសដែលប្រមុខការទូតចិនគ្រោងបំពេញទស្សនកិច្ច
ប្រមុខការទូតចិន លោក វ៉ាង យី នឹង ត្រូវ ចំណាយពេល៦ថ្ងៃដើម្បីបំពេញទស្សនកិច្ចនៅក្នុងប្រទេសអាស៊ីចំនួន៣ប្រទេស គឺឥណ្ឌូនេស៊ី កម្ពុជា និងប្រទេសប៉ាពូអាស៊ីនូវែលហ្គីណេ។ អំឡុងពេលទស្សនកិច្ចនៅកម្ពុជា លោកវ៉ាង យីនឹងចូលរួមកិច្ចប្រជុំនៃគណៈកម្មាធិការសម្របសម្រួលអន្តររដ្ឋាភិបាលកម្ពុជា-ចិន។ បើតាមអ្នកនាំពាក្យក្រសួងការបរទេសចិន លោក Lin Jian ប្រទេសចិនសង្ឃឹមថាដំណើរទស្សនកិច្ចរបស់លោកវ៉ាង យីនឹងជួយជំរុញការឯកភាពនូវអ្វីដែលត្រូវបានប្រធានាធិបតីចិនលោក ស៊ី ជីនពីង សម្រេចជាមួយមេដឹកនាំនៃប្រទេសទាំង ៣ និងជំរុញការលើកកម្ពស់ការអនុវត្តគម្រោងខ្សែក្រវ៉ាត់ និងផ្លូវ។
គួររម្លឹកថាកាលពីឆ្នាំ ២០២៣ លោកស៊ី ជីនពីង និងអតីតនាយករដ្ឋមន្ត្រីកម្ពុជា លោក ហ៊ុន សែនបានប្រកាសអំពីកិច្ចសហប្រតិបត្តិការ «ត្បូងពេជ្រ» នៅទីក្រុងប៉េកាំងក្នុងគោលបំណងបង្កើនទំនាក់ទំនងទ្វេភាគីក្នុងវិស័យនយោបាយ ផលិតភាព កសិកម្ម ថាមពល សន្តិសុខ និងការផ្លាស់ប្តូរមនុស្ស។ អ្វីជាការកត់សំគាល់ ដំណើរទស្សនកិច្ចរបស់ប្រមុខការទូតចិននៅពេលខាងមុខនេះ គឺស្របពេលដែលប្រទេសចិនបង្កើនការទូតរបស់ខ្លួនជាមួយបណ្តាប្រទេសអាស៊ីអាគ្នេយ៍ និងចំពេលដែលការប្រកួតប្រជែងជាយុទ្ធសាស្ត្រជាមួយសហរដ្ឋអាមេរិកក្នុងតំបន់អាស៊ីប៉ាស៊ីហ្វិកកំពុងរឹតបន្តឹង។
ក្នុងនាមជាមហាអំណាចសេដ្ឋកិច្ចទី២ ក្នុងលោក ចិនមិនត្រឹមតែកំពុងព្យាយាមរក្សាឋានៈរបស់ខ្លួនជាដៃគូពាណិជ្ជកម្មកំពូលជាមួយប៉ាពូអាស៊ីនូវែលហ្គីណេដែលជាប្រទេសកោះធំជាងគេនៅប៉ាស៊ីហ្វិកខាងត្បូងប៉ុណ្ណោះទេ តែថែមទាំងបានពង្រីកទំនាក់ទំនងរបស់ខ្លួនទៅកាន់តំបន់ជាច្រើនទៀតផង។ ក្នុងពេលជាមួយគ្នា ចិនក៏បានបង្កើនទំនាក់ទំនងរបស់ខ្លួនជាមួយឥណ្ឌូនេស៊ី និងកម្ពុជាដល់កម្រិតនៃការកសាង «សហគមន៍មួយ ជោគវាសនារួម» ខណៈចិនកំពុងជំរុញទំនាក់ទំនងជាមួយប៉ាពូអាស៊ីនូវែលហ្គីណេឲ្យទៅជា «ភាពជាដៃគូយុទ្ធសាស្ត្រគ្រប់ជ្រុងជ្រោយ» ។ នេះបើយោងតាមអ្នកនាំពាក្យក្រសួងការរបទេសចិន។
ផ្លូវរថភ្លើងល្បឿនលឿន Jakarta-Bandung ដែលជាខ្សែរថភ្លើងល្បឿនលឿនដំបូងគេនៅអាស៊ីអាគ្នេយ៍ត្រូវបានសាងសង់ឡើងដោយមូលនិធិរបស់ចិន។ សម្រាប់ក្រុងប៉េកាំង នេះជាឧទាហរណ៍ដ៏ជោគជ័យបំផុតមួយនៃយុទ្ធសាស្ត្រខ្សែក្រវ៉ាត់ និងផ្លូវដែលជាផែនការផ្តួចផ្តើមឡើងដោយប្រធានាធិបតីចិនលោមស៊ី ជីនពីងក្នុងការកែលម្អហេដ្ឋារចនាសម្ព័ន្ធ និងការតភ្ជាប់នៅក្នុងតំបន់៕