ដោយ យន់ សាមៀន
2024.04.27
RFA
លោកនាយករដ្ឋមន្ត្រី ហ៊ុន ម៉ាណែត (រូបកណ្ដាលក្នុងសំលៀកបំពាក់យោធា) ចូលរួមពិធីសម្ពោធដាក់ឱ្យប្រើប្រាស់អគារសហសិក្សា អគារស្នាក់នៅ និងអគារអាហារដ្ឋាននៅសាកលវិទ្យាល័យការពារជាតិ កាលពីថ្ងៃទី១៩ មេសា ២០២៤។ រូប៖ ហ្វេសប៊ុកក្រសួងការពារជាតិ
យោធិននៅយោធភូមិភាគទី៣ នៃខេត្តកំពង់ស្ពឺ ចំនួន ២០នាក់បានស្លាប់ និងរបួសមួយចំនួនទៀត ដោយសារផ្ទុះគ្រាប់ នៅរសៀលថ្ងៃទី២៧ មេសា។
លោកនាយករដ្ឋមន្ត្រី ហ៊ុន ម៉ាណែត បង្ហោះសារលើហ្វេសប៊ុករបស់លោកនៅយប់ថ្ងៃទី២៧ មេសា ថា លោកមានក្ដីរន្ធត់ពេលឮដំណឹងនេះ។
រដ្ឋាភិបាលនឹងទទួលរ៉ាប់រងទាំងស្រុង លើការចំណាយរៀបចំពិធីបុណ្យសពនេះ។ ជាមួយគ្នានេះ លោកអះអាងថា លោកនឹងឧបត្ថម្ភជាថវិកាជូនគ្រួសារយោធិនពលី ចំនួន ២ម៉ឺនដុល្លារអាមេរិក ក្នុងមួយគ្រួសារសព និង ២០លានរៀលសម្រាប់យោធិនម្នាក់ៗដែលរងរបួសក្នុងឧបទ្ទវហេតុនេះ។
រហូតត្រឹមម៉ោងជិត ៩យប់ថ្ងៃទី២៧ មេសា នេះ ក្រសួងការពារជាតិពុំទាន់បង្ហាញរបាយការណ៍ជាក់លាក់ពីមូលហេតុនៃឧបទ្ទវហេតុផ្ទុះគ្រាប់សម្លាប់យោធិនរហូត ២០នាក់ និងរបួសមួយចំនួនឡើយ ក្រៅតែពីព័ត៌មានដែលលោកនាយករដ្ឋមន្ត្រី ហ៊ុន ម៉ាណែត បង្ហោះនិងចូលរួមរំលែកទុក្ខនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។