ដោយ៖​ តាំង វីដា
ថ្ងៃពុធ ទី18 មិថុនា 2014
http://vodhotnews.com

មើលរូបភាពបន្ថែម

លោក សុរិយា ស៊ូ​ប៊ែ​ឌី ​អ្នករាយការណ៍​ពិសេស​អង្គការសហប្រជាជាតិ​ទទួលបន្ទុក​សិទ្ធិមនុស្ស​ប្រចាំ​កម្ពុជា (រូបថត៖ តាត ឧត្តម)

​អង្គការ​សង្គម​ស៊ីវិល​ពីរ​ក្រុម​ធ្វើកា​រលើ​វិស័យ​ដីធ្លី និង​សិទ្ធិ​ស្ត្រី បាន​ជួប​រាយការណ៍​ពី​បញ្ហា​ប្រឈម​របស់​ពលរដ្ឋ​កម្ពុជា ទៅកាន់​អ្នករាយការណ៍​ពិសេស​អង្គការសហប្រជាជាតិ​ទទួលបន្ទុក​សិទ្ធិមនុស្ស​ប្រចាំ​កម្ពុជា លោក សុរិយា ស៊ូ​ប៊ែ​ឌី ពាក់ព័ន្ធ​នឹង​ការរំលោភ​សិទ្ធិ​មនុស្ស​នា​នា​នៅ​កម្ពុជា​។​

នាយក​លេខាធិការដ្ឋាន​នៃ​ក្រុមការងារ​ពិសេស​សិទ្ធិ​លំនៅដ្ឋាន លោក សៀ ភារម្យ មានប្រសាសន៍ថា ក្នុង​ជំនួប​ជាមួយ​អ្នករាយការណ៍​ពិសេស​របស់ UN កាលពី​ថ្ងៃ​ចន្ទ​ដើម​សប្តាហ៍​នេះ ក្រុម​សង្គម​ស៊ីវិល ជាង​១០​អង្គការ ដែល​ធ្វើកា​រលើ​វិស័យ​សិទ្ធិ​ដីធ្លី និង​លំនៅដ្ឋាន បាន​លើកឡើង​នូវ​ក្តីព្រួយបារម្ភ​លើ​វិវាទ​ដីធ្លី​ក្នុង​រាជធានី​ភ្នំពេញ និង​តាម​បណ្តា​ខេត្ត ក៏ដូចជា បទល្មើស​កាប់​ព្រៃឈើ​ខុសច្បាប់ ការពង្រីក​ផ្លូវ​ប៉ះពាល់​ដល់​ដី​ប្រជាពលរដ្ឋ​ជា​ដើម​។ ជា​ការឆ្លើយតប លោក​ថា លោក ស៊ូ​ប៊ែ​ឌី នឹង​យក​រឿង​ទាំងនេះ ទៅ​ពិភាក្សា​ជាមួយ​មន្ត្រី​រដ្ឋាភិបាល​ពាក់​ព័ន្ធ និង​ជំរុញ​កិច្ច​អន្តរាគមន៍​បន្ទាន់ «ព្រោះគាត់នឹងជួបជាមួយនឹងខាងរដ្ឋមន្ត្រី ក្រសួងរបស់រដ្ឋាភិបាលហ្នឹង ហើយគាត់នឹងលើកអ្វីជាការព្រួយបារម្ភ របស់យើងទាំងអស់ហ្នឹង។ យ៉ាងណានោះ គាត់នឹងបន្តជជែកនឹងរដ្ឋាភិបាល ឲ្យរដ្ឋាភិបាលគិតគូរ ឬក៏ពិចារណា ទៅលើបញ្ហាទាំងអស់ហ្នឹង ដែលជាការព្រួយបារម្ភ របស់សង្គមស៊ីវិល»។

​ចំណែកនាយិកា​អង្គការ​សីល​ការ លោកស្រី ធីតា ឃឹះ ដែល​ស្ថិត​ក្នុង​ក្រុម​សង្គម​ស៊ីវិល​ទី​២ មាន៨អង្គការ ធ្វើការ​លើ​វិស័យ​សិទ្ធិ​ស្ត្រី មានប្រសាសន៍ថា ក្នុងជំនួប​កាលពី​ថ្ងៃ​អង្គារ​ម្សិលមិញ​នេះ សង្គម​ស៊ីវិល បាន​បង្ហាញ​នូវ​បញ្ហា​ប្រឈម​របស់​ស្ត្រី ដែល​ជា​ពលករ កម្មការិនី និង​ការ​រើស​អើ​ស​ស្ត្រី​ក្នុងសង្គម រួម​នឹង​សិទ្ធិ​សេរីភាព​នៃ​ការបញ្ចេញ​មតិ​របស់​ស្ត្រី​។ លោកស្រី បន្តថា កតា្ត​ទាំងនេះ លោក ស៊ូ​ប៊ែ​ឌី បាន​ប្រឹក្សា​យោបល់​ជា​ច្រើន និង​ផ្តល់​ជា​អនុសាសន៍ ដោយ​សន្យា​ធ្វើ​របាយការណ៍​លម្អិត​បញ្ជូន​ទៅ​អង្គការ​សហប្រជាជាតិ ដើម្បី​ស្នើ​កិច្ច​អន្តរាគមន៍​ «គាត់បានលើកថា គាត់មកធ្វើការស្រុកខ្មែរនេះយូរយារហើយ ហើយគាត់បានធ្វើជារបាយការណ៍ទាក់ទងទៅនឹងការកែតម្រូវដើម្បីធ្វើឲ្យមានប្រព័ន្ធឯករាជ្យ ខាងតុលាការ គាត់បានធ្វើដើម្បីប្រព័ន្ធប្រសិទ្ធិភាព ប្រព័ន្ធខាងផ្នែកនីតិប្រតិបត្តិដើម្បីការពារប្រជាពលរដ្ឋ ហើយគាត់ក៏បានធ្វើជារបាយការណ៍ និងការលើកទឹកចិត្តឲ្យមានការកែទម្រង់ខាងផ្លូវដីធ្លី និងការអនុវត្តផ្សេងៗ»។

VOD មិនអាច​សុំ​ការឆ្លើយតប​ជុំវិញ​ការលើកឡើង​របស់​សង្គម​ស៊ីវិល ពី​សំណាក់​លោក សុរិយា ស៊ូ​ប៊ែ​ឌី បាន​ទេ​នៅ​ថ្ងៃ​ពុធ​នេះ ដោយ​មន្ត្រី​ទំនាក់ទំនង​របស់​លោក ប្រាប់ថា លោក​កំពុង​ជាប់​ប្រជុំ​។​

សម្រាប់​ប្រធាន​អង្គការ​ការពារ​សិទ្ធិមនុស្ស​លីកាដូ លោកស្រី ពុង ឈី​វ​កេក ឲ្យដឹង​ដែរថា ក្នុងជំនួប​ផ្ទាល់​ជាមួយ​លោក ស៊ូ​ប៊ែ​ឌី ដែល​គ្រោង​ធ្វើ​នៅក្នុង​សប្តាហ៍​នេះ គឺ​លោកស្រី គ្រោង​នឹង​លើក​ពី​បញ្ហា​ពលករ​ចំណាកស្រុក ដែល​បាន​វិល​មក​ពី​ប្រទេស​ថៃ​វិញ​យ៉ាងគំហុក ការអនុម័ត​ច្បាប់​ពាក់ព័ន្ធ​វិស័យ​តុលាការ រួម​នឹង​លទ្ធផល ក៏ដូចជា​ការវិវឌ្ឍ​នៃ​កិច្ចចរចា​រវាង​គណបក្ស​ជាប់​ឆ្នោត​ទាំង​ពីរ​នៅ​កម្ពុជា ប្រាប់​ទៅ​កាន់​លោក ស៊ូ​ប៊ែ​ឌី​។ ទន្ទឹមនឹងនេះ លោកស្រី នឹង​រាយការណ៍​ពី​ដំណើរការ​ពង្រៀងច្បាប់ ការបង្កើត​គណៈកម្មកា​រ​ជាតិ​ស្តីពី​សិទ្ធិមនុស្ស​នៅ​កម្ពុជា​ផង​ដែរ​ «ចាំជម្រាបជូនទៅប្រជាពលរដ្ឋ ឲ្យលោកយល់សិន។ ពេលណាលោកយល់ឃើញថា សំខាន់ណាស់ ស្ថាប័នហ្នឹងលោកនឹងចង់បានហើយ។ បើលោកចង់បាន លោកអាចចូលរួមចំណែកជាមួយពួកយើង ដើម្បីសុំទៅរដ្ឋាភិបាល ព្រោះមានតែរដ្ឋាភិបាលទេ ដែលយើងអនុញ្ញាតឲ្យយើងអាចបើកបង្កើត»។

​លោក សូរិយា ស៊ូ​ប៊ែរ​ឌី (Surya P.Subedi) អ្នករាយការណ៍​ពិសេស​អង្គការសហប្រជាជាតិ​ទទួលបន្ទុក​សិទ្ធិមនុស្ស​ប្រចាំ​កម្ពុជា បាន​មក​បំពេញ​ទស្សនកិច្ច​នៅ​កម្ពុជា ចាប់ពី​ថ្ងៃ​ទី​១៦ ដល់​ថ្ងៃ​ទី​២៤​ខែមិថុនា ដើម្បី​ជួប​ជាមួយ​មន្ត្រី​រដ្ឋាភិបាល អង្គការ​សង្គម​ស៊ីវិល និង​ភាគី​ពាក់ព័ន្ធ ក្នុង​គោលដៅ​ពិនិត្យ​លើ​បញ្ហា​សិទ្ធិមនុស្ស និង​ការអនុវត្ត​នូវ​អនុសាសន៍​របស់​លោក​។ លោក ស៊ូ​ប៊ែ​ឌី នឹង​រៀបចំ​សន្និសីទ​សារព័ត៌មាន​មួយ នៅ​ថ្ងៃ​ទី​២៤​ខែមិថុនា ខាងមុខនេះ មុន​នឹង​បញ្ចប់​ដំណើរ​ទស្សនកិច្ច​របស់​លោក​៕

សូមសរសេរមកលោក​ តាំង វីដា តាមរយៈ vida@vodhotnews.com