ដោយ៖​ ណាត សុភាព​ | ថ្ងៃអង្គារ ទី5 មករា 2016
http://vodhotnews.com

ការ​កកស្ទះចរាចរណ៍តាមដងផ្លូវ (ដោយ ណាត សុភាព)

---

ប្រជាពលរដ្ឋមួយចំនួន​នៅរាជធានីភ្នំពេញត្អូញត្អែរពីការ​កកស្ទះចរាចរណ៍នៅតាមដងផ្លូវសាធារណៈខ្លះ​ជាពិសេស​​នៅពេល​គណៈប្រតិភូរដ្ឋាភិបាលឬនាយករដ្ឋមន្រ្តី​ចូល​រួម​កម្មវិធីនៅកន្លែងណាមួយដែលត្រូវសមត្ថកិច្ច​បិទផ្លូវ​ជុំវិញតំបន់​នោះ​​។

ការ​ត្អូញត្អែរនេះធ្វើឡើង​ក្នុងថ្ងៃ​ដែល​លោកនាយករដ្ឋមន្ត្រី ហ៊ុន សែន ចូល​រួមសម្ពោធស្ពាន​អាកាសទិចណូក្បែររង្វង់មូលទួលគោកនាព្រឹកថ្ងៃអង្គារនេះ​។ ស្ថានភាពចរាចរណ៍នៅផ្លូវមួយចំនួននៅម្តុំពិធីនោះបាន​កកស្ទះហើយមិនឃើញមានសមត្ថកិច្ចជួយសម្រួលចរាចរណ៍បានទាន់ពេលឡើយ។

កញ្ញា ដារី ធ្វើការ​នៅក្រុមហ៊ុនឯកជនមួយនៅរាជធានីភ្នំពេញប្រាប់អ្នកយកព័ត៌មាន​VODនៅផ្តុំស្ពានទិចណូ​ដោយស្នើឲ្យសមត្ថកិច្ចត្រូវជួយសម្រួលចរាចរណ៍នៅពេលមានកម្មវិធីហើយបិទផ្លូវបែបនេះ។ កញ្ញាបន្តថា៖ “ចាស! ឃើញរាល់ថ្ងៃតែម្តង តែឃើញមានតាមតំបន់ខ្លះដូចថាផ្លូវខ្លះមមាញឹកអញ្ចឹងចឹងវាត្រូវតែអញ្ចឹងរហូតដ៏ពេលអញ្ចឹងទាល់តែមានប៉ូលីសឬក៏អ្នកសណ្តាប់ធ្នាប់ជួយអាយ៉ែឡានឬក៏សារ៉េឡានអីឲ្យស្រួលបួលអញ្ចឹងជាពិសេសកម្មវិធីធំៗដូចជាកម្មវិធីធំឥឡូវហ្នឹងកម្មវិធីសម្ពោធស្ពានហ្នឹងខ្ញុំអត់បានដឹងសោះ”។

អ្នករត់ម៉ូតូឌុបម្នាក់ទៀតលោក មាឃ សំអឿន លើកឡើង​ថាការ​កកស្ទះចរាចរណ៍នោះដោយសារប្រជាពលរដ្ឋបើកបរមិនយោគយល់គ្នា មិន​គោរពច្បាប់ និងមិនមានសមត្ថកិច្ចជួយសម្រួលចរាចរណ៍តាមដងផ្លូវ​ដែលកកស្ទះ​ជាដើម​។ លោកថា ករណីនេះធ្វើឲ្យគាត់​ជួបបញ្ហា​ប្រឈមខាតពេលវេលានិង​ថវិកា។ លោកបន្ថែមថា៖ “វាប៉ះពាល់ខាតពេលវេលាយើងល្មមបានមួយជើងៗផុតម៉ោងទៅវាអាចចំណាយពេលច្រើនឧបមាថាមួយជើងអញ្ចឹងចំណាយមួយម៉ោងឬមួយមួយម៉ោងជាងបានផុតកន្លែងស្ទះហ្នឹងឧបមាថា១០នាទីត្រូវទៅដល់អាចពន្យាដល់កន្លះម៉ោងឬមួយម៉ោងបានដល់អាហ្នឹងគោលដែលទៅ”។

អ្នកនាំពាក្យ​សាលារាជធានីភ្នំពេញលោក ឡុង ឌីម៉ង់ សុំមិនបំភ្លឺជុំវិញករណីនេះដោយ​លោក​អះអាងថាជាប់រវល់​ប្រជុំ។

ប្រជាពលរដ្ឋបានកត់សំគាល់ថាជារៀង​រាល់ថ្ងៃពួកគេសង្កេតឃើញថាផ្លូវ​ដែលកកស្ទះភាគច្រើនគឺ​នៅម្តុំវិទ្យាល័យសាមគ្គីដល់​ម្តុំស្តុបណូគា ផ្សារស្ទឹងមានជ័យ ​ម្តុំពេទ្យមិត្តភាពខ្មែរ-សូវៀត ផ្លូវ​ត្រឡោកបែក​ ក្បែរស្ពាន៧មករា និ​ងនៅជុំវិញកន្លែងសម្ពោធស្ពានអាកាសទិចណូនៅថ្ងៃអង្គារនេះក៏មានការកកស្ទះខ្លំាង​ដោយសារសមត្ថកិច្ច​​បិទផ្លូវ​មួយចំនួនសម្រាប់​ឲ្យ​លោកនាយករដ្ឋមន្ត្រី​សម្ពោធដាក់ឲ្យ​ប្រើប្រាស់​ស្ពានអាកាសថ្មីនោះ​៕

សូម​សរសេរ​មក​កាន់​លោក ណាត សុភាព តាមរយៈ pheap@vodhotnews.com