Fri, 17 November 2017
សុទ្ធ គឹមសឿន
ភ្នំពេញប៉ុស្តិ៍
ភ្នំពេញៈ ស្ត្រីម្នាក់ត្រូវអាជ្ញាធរឃាត់ខ្លួនសាកសួរកាលពីម្សិលមិញបន្ទាប់ពីគាត់បានមកស្រែកតវ៉ាមិនឲ្យរំលាយគណបក្សសង្គ្រោះជាតិ និងបាចខិត្តប័ណ្ណតាមផ្លូវ ខណៈបុរសម្នាក់ត្រូវបានបញ្ជូនទៅតុលាការពីម្សិលម្ង៉ៃក្នុងករណីដូចគ្នា។
ស្ត្រីរូបនេះឈ្មោះ មោង ចន្ថន អាយុ ៤៧ ឆ្នាំមុខរបរជាកសិករនៅភូមិអង្ក្រង ឃុំជាងដែក ស្រុកកំពង់ត្របែក ខេត្តព្រៃវែង។ គាត់ត្រូវឃាត់ខ្លួននៅផ្លូវលេខ ២៤០ កែងផ្លូវលេខ ១៩ សង្កាត់ចតុមុខ ខណ្ឌដូនពេញដោយត្រូវបានចោទប្រកាន់ថាបានញុះញង់បង្កឲ្យមានចលាចលក្នុងសង្គម។
លោក ជួប សុគន្ធ នាយប៉ុស្ដិ៍នគរបាលសង្កាត់ចតុមុខបានឲ្យដឹងថាសមត្ថកិច្ចបានឃាត់ខ្លួនស្ត្រីរូបនេះហើយភ្លាមៗនោះក៏បញ្ជូនគាត់ទៅអធិការដ្ឋាននគរបាលដើម្បីសួរនាំ និងចាត់ចែងតាមច្បាប់។
លោកថា៖ «ពេលឃាត់ខ្លួនស្ត្រីម្នាក់នោះអំឡុងពេលគាត់កំពុងចែកចាយខិត្តប័ណ្ណ…»។
លោក ហួត ចាន់យ៉ារ៉ាន់ អធិការនគរបាលខណ្ឌដូនពេញបានថ្លែងយ៉ាងខ្លីថា គេកំពុងសួរនាំ និងថាលោករវល់ណាស់។
បើតាមវីដេអូស្ដ្រីរូបនោះបានប្រាប់សមត្ថកិច្ចថាអ្នកស្រីមកពីខេត្តព្រៃវែងដោយធ្វើដំណើរមកភ្នំពេញដើម្បីស្ដាប់សវនាការរឿងរំលាយបក្សប្រឆាំង។
អ្នកស្រីបន្តថាមកតែម្នាក់ឯងទេដោយអ្នកស្រីបានសរសេរអក្សរលើខិត្តប័ណ្ណផ្ទាល់រួចកូពីជាច្រើនសន្លឹកដើម្បីបោះតាមផ្លូវ ប៉ុន្ដែមិនទាន់បោះបានប៉ុន្មានផង ក៏ត្រូវបានឃាត់ខ្លួន។ អ្នកស្រីថា៖ «ខ្ញុំមកចែកខិត្តប័ណ្ណ បោះតាមផ្លូវឲ្យគេមើល ដើម្បីឲ្យកូនខ្មែរជួយដោះស្រាយ…»។
ករណីដូចគ្នានេះដែរកាលពីថ្ងៃទី ១៥ ខែវិច្ឆិកា កងអាវុធហត្ថរាជធានីភ្នំពេញបានចាប់បញ្ជូនបុរសម្នាក់ឈ្មោះ តាន់ តុងហ៊ី អាយុ ៤៤ ឆ្នាំទៅកាន់តុលាការ ដើម្បីផ្តន្ទាទោសតាមច្បាប់ពាក់ព័ន្ធករណីដើរបាចឯកសារព័ត៌មានញុះញង់ដើម្បីឲ្យមានចលាចលក្នុងសង្គម។
លោក អេង ហ៊ី អ្នកនាំពាក្យកងរាជអាវុធហត្ថមិនអាចទាក់ទងសុំការបញ្ជាក់បន្ថែមបានទេដោយលោកថាជាប់រវល់ ប៉ុន្ដែតាមរបាយការណ៍កងរាជអាវុធហត្ថរាជធានីភ្នំពេញបង្ហាញថាជនសង្ស័យបានសារភាពថាបានដើរបាចឯកសារញុះញង់ច្រើនកន្លែងនៅភ្នំពេញកាលពីថ្ងៃទី ៥ ខែតុលាថ្មីៗកន្លងមក។
របាយការណ៍នេះបន្តថាគឺរូបគេជាអ្នកធ្វើពិតប្រាកដមែនដោយមានផែនការបាចលើ ៥៨ គោលដៅ តែពេលបាចបាន ៥០ គោលដៅក៏ត្រូវបានឃាត់ខ្លួនក៏ផ្អាកសិនរួចបានរត់គេចទៅថៃនៅថ្ងៃទី ៦ តុលា។ លុះថ្ងៃទី ៤ ខែវិច្ឆិកាឆ្នាំនេះ រូបគេក៏មកខ្មែរវិញ ដើម្បីចែកឯកសារ ប៉ុន្ដែក៏ត្រូវអាវុធហត្ថរាជធានីភ្នំពេញឃាត់ខ្លួនបាននៅព្រឹកថ្ងៃទី ១៣ ខែវិច្ឆិកា ឆ្នាំ២០១៧៕
Contact author: សុទ្ធ គឹមសឿន