កម្ពុជា-នយោបាយ
28/07/2021 – 08:20
ដោយ៖ វណ្ណ សុគន្ធា
RFI

កញ្ញា កឹម មនោវិទ្យា​ កូនស្រីលោក​ កឹម សុខា ​និងលោក ស៊ុន ឆ័យ ​នឹងបង្កើត​គណបក្ស​នយោបាយ​ថ្មី២ផ្សេងគ្នា​នៅចុងឆ្នាំ​២០២១​ និងនៅក្នុង​ឆ្នាំ២០២២​។​ នេះបើតាម​ការបង្ហើបឱ្យដឹង​របស់លោក​មេធាវី​ ផាន់ ច័ន្ទសាក់​ ដែលជាអតីត​សមាជិកនៃ​អតីតគណបក្ស​សង្រ្គោះជាតិ​នៅព្រឹកថ្ងៃពុធ​នេះ​។ ជាមួយគ្នានេះ​ លោក ផាន់ ច័ន្ទសាក់​ ក៏បានអះអាងថា​ លោក គួច ប៊ុនរឿន​ នឹងឡើងមក​ធ្វើជា​ប្រធាន​ដឹកនាំ​គណបក្ស​បេះដូងជាតិ។​ ប៉ុន្តែ ​ស្ថាបនិក​គណបក្ស​នេះបាន​បដិសេធ​ ដោយអះ​អាងថា​ នេះ គឺគ្រាន់តែ​ជាការលើកឡើង​បែបស្មានៗ​តែប៉ុណ្ណោះ​។

ថ្លែងប្រាប់វិទ្យុបារាំងអន្តរជាតិនៅព្រឹកថ្ងៃពុធនេះ លោក ផាន់ ច័ន្ទសាក់ អតីតមេធាវីរបស់លោកកឹម សុខា និងជាអតីតសមា​ជិកនៃអតីតគណបក្សប្រឆាំងបានលើកឡើងថា នៅចុងឆ្នាំ២០២១នេះ កញ្ញា កឹម មនោវិទ្យា ដែលជាកូនស្រីរបស់លោក កឹម សុខា អាចនឹងសរសេរលិខិតសុំទោសទៅកាន់លោកនាយករដ្ឋមន្រ្តី ហ៊ុន សែន ចំពោះសកម្មភាពនយោបាយការទូតរបស់កញ្ញានាពេលកន្លងមកដែលបំពានទៅនឹងបម្រាមរបស់តុលាការកំពូលកម្ពុជា។ លោកបន្តថា កញ្ញា កឹម មនោវិទ្យា មិនមានជម្រើសអ្វីផ្សេងក្រៅពីសុំទោសលោក ហ៊ុន សែន ឡើយ ដើម្បីអាចមានឱកាសចូលប្រឡូកក្នុងនយោ​បា​យបានឡើងវិញ ដូចករណីលោក យ៉ែម បុញ្ញរិទ្ធ ដែលនឹងមកដឹកនាំគណបក្សថ្មីកម្ពុជានិយម។

បើពុំដូច្នោះទេ កញ្ញា កឹម មនោវិទ្យា នឹងមិនត្រូវបានផ្តល់សិទ្ធិធ្វើនយោបាយឡើងវិញដូចករណីលោក ជួង ជូងី និងលោក ញឹម គឹមញ៉ុល អ៊ីចឹងដែរ។ បើតាមលោក ផាន់ ច័ន្ទសាក់ ការធ្វើបែបនេះរបស់កញ្ញា កឹម មនោវិទ្យា គឺដើម្បីឈានទៅបង្កើតគណបក្សនយោបាយថ្មី។ លោក ផាន់ ច័ន្ទ​សាក់ ដែលបច្ចុប្បន្នបានទៅចូលជាមួយគណបក្សថ្មីកែទម្រង់កម្ពុជាហ៊ានអះអាងយ៉ាងដូច្នេះដោយសំអាងទៅលើការប្រកាស និងការរ៉ៃអង្គាសថវិការបស់កញ្ញា កឹម មនោវិទ្យា នៅអាមេរិកនាពេលកន្លងមក ដើម្បីចូលមកប្រទេសកម្ពុជាធ្វើនយោបាយឡើងវិញ។

ក្រៅពីកញ្ញា កឹម មនោវិទ្យា លោក ផាន់ ច័ន្ទសាក់ ក៏បានអះអាងដែរថា លោក សុន ឆ័យ ដែលទទួលបានសិទ្ធិធ្វើនយោ​បាយឡើងវិញក៏នឹងបង្កើតគណបក្សនយោបាយថ្មីមួយដែរនៅក្នុងឆ្នាំ២០២២ខាងមុខ។ មិនតែប៉ុណ្ណោះ លោកថែមទាំងថា គណបក្សបេះដូងជាតិ គឺមិនមែនដឹកនាំដោយលោក ថាច់ សេដ្ឋា នោះទេ ប៉ុន្តែនឹងដឹកនាំដោយលោក គួយ ប៊ុនរឿន ដែលអតីតអនុប្រធានគណៈកម្មាធិការជាតិរៀបចំការបោះឆ្នោត។

ជុំវិញការលើកឡើងរបស់លោក ផាន់ ច័ន្ទសាក់ នេះ ទាំងកញ្ញា កឹម មនោវិទ្យា និងទាំងលោក សុន ឆ័យ មិនទាន់អាចទាក់​ទង​សុំការបំភ្លឺបាននៅឡើយទេនៅព្រឹកថ្ងៃពុធនេះ។ ប៉ុន្តែ ចំពោះករណីគណបក្សបេះដូងជាតិវិញ លោក សៀម ភ្លុក ដែលជាតំណាងស្ថាបនិកគណបក្សនេះបានចេញមកច្រានចោល។ តាមរយៈវិទ្យុបារាំងអន្តរជាតិ លោក សៀម ភ្លុក ចាត់ទុកការលើកឡើងរបស់លោក ផាន់ ច័ន្ទសាក់ ថា គ្រាន់តែជាការនិយាយស្មានៗបែបស្រមើស្រមៃ និងមិនប្រាកដនិយមក្នុងចេតនាវាយប្រហារទៅលើអ្នកនយោបាយដទៃតែប៉ុណ្ណោះ។

សូមបញ្ជាក់ថា គិតមកពេលនេះ អតីតសមាជិកគណបក្សប្រឆាំងមួយចំនួនហើយបានចេញមកបង្កើតគណបក្សនយោបាយថ្មី។ ក្នុងនោះ មានជាអាទិ៍ លោក រៀល ខេមរិន្ទ ប្រធានគណបក្សខ្មែរអភិរក្ស លោក ជីវ កត្តា មកដឹកនាំគណបក្សស្រឡាញ់ជាតិ លោក ប៉ុល ហំម និងលោក អ៊ូ ច័ន្ទរ័ត្ន មកដឹកនាំគណបក្សកែទម្រង់កម្ពុជា និងលោក យ៉ែម បុញ្ញរិទ្ធ នឹងមកដឹកនាំគណបក្សទើបបង្កើតថ្មីកម្ពុជានិយម៕