ដោយ សេក បណ្ឌិត
2024.04.23
RFA
កម្មវិធីដឹកនាំដោយក្រមហ៊ុនស្រាបៀកម្ពុជា របស់ក្រុមហ៊ុនជីបម៉ុង គ្រុប ហៅយុវជនឡើងលើសង្វៀនប្រដាល់ ផឹកស្រាបៀបង្ហាញអតិថិជន និងផ្សព្វផ្សាយតាមកញ្ចប់ទូរទស្សន៍ និងបណ្ដាញសង្គម។ រូប៖ ផ្សព្វផ្សាយលើហ្វេសប៊ុក BTV Cambodia
មន្ត្រីអង្គការសង្គមស៊ីវិល សាទរចំពោះអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) ដែលបានចេញសេចក្ដីប្រកាសហាមឃាត់ការយកអនីតិជនមកប្រគល់រង្វាន់ និងផ្សព្វផ្សាយពាណិជ្ជកម្មពាក់ព័ន្ធគ្រឿងស្រវឹង និងភេសជ្ជៈប៉ូវកម្លាំង។ មន្ត្រីសង្គមស៊ីវិល ក៏ទទូចដល់អាជ្ញាធរពាក់ព័ន្ធមានឆន្ទៈក្នុងការអនុវត្តសេចក្ដីប្រកាសនេះឲ្យបានខ្ជាប់ខ្ជួន កុំរង់ចាំទាល់តែមានការរិះគន់ពីពលរដ្ឋ។
ប្រធានមជ្ឈមណ្ឌលប្រជាពលរដ្ឋ ដើម្បីអភិវឌ្ឍន៍ និងសន្តិភាព លោក យង់ គិមអេង មានប្រសាសន៍ប្រាប់វិទ្យុអាស៊ីសេរីនៅថ្ងៃទី២៣ មេសា ថា ការផ្សព្វផ្សាយរបស់ក្រុមហ៊ុនផលិតស្រាបៀ គឺដើម្បីអូសទាញឲ្យយុវជន និងពលរដ្ឋទាំងអស់ ឲ្យប្រើប្រាស់នូវផលិតផលស្រាបៀរបស់ខ្លួន ប៉ុន្តែអ្នកទទួលរងឥទ្ធិពលអវិជ្ជមានពីការទទួលទានគ្រឿងស្រវឹង គឺជាពលរដ្ឋ ។ មន្ត្រីសង្គមស៊ីវិលរូបនេះ គាំទ្រសេចក្ដីប្រកាសរបស់ក.ប.ប ដែលហាមប្រាមការយកអនីតិជន មកទទួលរង្វាន់ និងផ្សព្វផ្សាយផលិតផលគ្រឿងស្រវឹង។
លោក យង់ គិមអេង៖ «ជុំវិញការអនុវត្តនេះ យើងឃើញប្រសិទ្ធភាពពិបាកនឹងមើល ជួនកាលអ៊ីចឹងទៅការអនុវត្តហ្នឹងអាចបានតែមួយភ្លែត ដោយសារតែមានសម្ពាធពីសាធារណជន ហើយក្រោយមកទៀតក៏ស្ងាត់ទៅវិញទៅ ហើយឃើញមានការផ្សព្វផ្សាយព្រោងព្រាតអ៊ីចឹងទៅ គឺបានន័យថា ការអនុវត្តហ្នឹងគឺអត់ទាន់ឈានទៅដល់កម្រិតមួយ ដែលថា ជាឆន្ទៈខាងនយោបាយ និងការអនុវត្តជាប្រព័ន្ធ ដើម្បីទប់ស្កាត់កុំឲ្យបញ្ហាហ្នឹងកើតឡើង យើងឃើញថា នៅមិនទាន់មាននៅឡើយទេ អ៊ីចឹងហើយបានជាប្រសិទ្ធភាពនៅឡើងចុះទៅតាមហ្នឹងដែរបាទ»។
ការលើកឡើងនេះ បន្ទាប់ពីអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្ក្រាបការក្លែងបន្លំ (ក.ប.ប) នៃក្រសួងពាណិជ្ជកម្មកាលពីថ្ងៃទី២២ មេសា បានផ្សព្វផ្សាយសេចក្ដីប្រកាសស្ដីពីការអនុវត្តមិនសុចរិតក្នុងធុរកិច្ចពាក់ព័ន្ធនឹងការផ្សព្វផ្សាយពាណិជ្ជកម្ម និងជំរុញការលក់ ដើម្បីការពារសិទ្ធិ និងផលប្រយោជន៍របស់អ្នកប្រើប្រាស់ ដែលរដ្ឋមន្ត្រីក្រសួងពាណិជ្ជកម្ម អ្នកស្រី ចម និមល បានចុះហត្ថលេខា កាលពីថ្ងៃទី១២ ខែមេសា កន្លងទៅ។ សេចក្ដីប្រកាសនេះ បានហាមឃាត់ការផ្សព្វផ្សាយមិនសុចរិតមួយចំនួន រួមមានការយកអនីតិជនមកប្រគល់រង្វាន់ និងការផ្សព្វផ្សាយពាក់ព័ន្ធនឹងផលិតផលគ្រឿងស្រវឹង និងភេសជ្ជៈប៉ូវកម្លាំង ដើម្បីជំរុញឲ្យអនីតិជនអនុវត្តសកម្មភាពផ្ទុយពីសីលធម៌ ទំនៀមទម្លាប់ ប្រពៃណី ដែលជះឥទ្ធិពលអវិជ្ជមានដល់សុខភាព ឬការអភិវឌ្ឍរបស់អនីតិជន។
ទោះជាយ៉ាងណា នៅក្នុងពិធីបុណ្យចូលឆ្នាំប្រពៃណីជាតិខ្មែរ អាជ្ញាធរតាមបណ្ដារាជធានី-ខេត្តមួយចំនួន បានទទួលស្រាបៀរាប់រយកេស ពីក្រុមហ៊ុនផលិតស្រាបៀ និងបានផ្សព្វផ្សាយដោយប្រយោលតាមរយៈការសរសេរសារអរគុណក្រុមហ៊ុនស្រាបៀ នៅលើទំព័រហ្វេសប៊ុក ផ្លូវការរបស់ស្ថាប័ន។
ក្រុមអង្គការសង្គមស៊ីវិលជិត ១០ស្ថាប័ន កាលពីខែកុម្ភៈកន្លងទៅ បានប្រារព្ធពិធីបុណ្យផ្សព្វផ្សាយគ្រោះថ្នាក់ ដែលបណ្ដាលមកពីគ្រឿងស្រវឹង និងចេញសេចក្ដីថ្លែងការណ៍រួមទាមទារឱ្យរដ្ឋាភិបាលគិតគូរពីបញ្ហាប្រឈមរបស់ពលរដ្ឋ បណ្ដាលមកពីគ្រឿងស្រវឹង ជាពិសេសត្រូវពន្លឿនការអនុម័តសេចក្តីព្រាងច្បាប់ស្ដីពីការគ្រប់គ្រងផលិតផលគ្រឿងស្រវឹងឱ្យបានឆាប់រហ័ស៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។