ដោយ៖ ញឹម សុខន
ថ្ងៃពុធ ទី17 ធ្នូ 2014
http://vodhotnews.com
ស្តាប់សំឡេង៖ |
ចម្លងទុក |
មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ (CCIM) ប្រកាសប្តឹងឧទ្ធរណ៍ ប្រឆាំងនឹងសាលាដំបូងរាជធានីភ្នំពេញ ដែលសម្រេចមិនចាត់ការមន្ត្រីរដ្ឋាភិបាលបីរូប ដែលអង្គការនេះប្តឹងចោទថា ជាអ្នកនៅពីក្រោយនៃព្រឹត្តិការណ៍វាយអ្នកសារព័ត៌មាន VOD ឲ្យបាក់ឆ្អឹងមុខ ពេលចុះបំពេញការងារនៅជិតទីលានប្រជាធិបតេយ្យ ។
លិខិតបញ្ជាក់ថា នៅថ្ងៃទី២៨ ខែឧសភា ឆ្នាំ២០១៤ មជ្ឈមណ្ឌលកម្ពុជាដើម្បីប្រព័ន្ធផ្សព្វផ្សាយឯករាជ្យ ដាក់ពាក្យបណ្តឹងទៅសាលាដំបូងរាជធានីភ្នំពេញ ដើម្បីស្វែងរកយុត្តិធ៌មឲ្យលោក ឡាយ សាមាន ដោយប្តឹងចោទមន្ត្រីរដ្ឋាភិបាល៣រូប ដូចជាអភិបាលរាជធានីភ្នំពេញ លោក ប៉ា សុជាតិវង្ស អតីតអភិបាលខណ្ឌដូនពេញ លោក សុខសម្បត្តិ និងអភិបាលរង លោក សុខ ពេញវុធ ដែល CCIM យល់ថាជាអ្នកបង្កើតឲ្យមាន ព្រឹត្តិការណ៍ប្រើហិង្សាវាយអ្នកសារព័ត៌មាន និងទាមទារសំនង៣០០០០ដុល្លារអាមេរិចសម្រាប់ព្យាបាលផ្លូវចិត្តរបស់ជនរងគ្រោះ ។
ប៉ុន្តែពាក្យបណ្តឹងនោះត្រូវបានព្រះរាជអាជ្ញារងអមសាលាដំបូងរាជធានីភ្នំពេញ លោក មាស ច័ន្ទពិសិដ្ឋ ជូនដំណឹងមក CCIM កាលពីថ្ងៃទី២៦ ខែវិច្ឆិកា ឆ្នាំ២០១៤ថាពាក្យបណ្តឹងនោះត្រូវតម្កល់ទុកមិនចាត់ការ ព្រមទាំងផ្តល់ពេល២ខែឲ្យប្តឹងទៅសាលាឧទ្ធរណ៍ ។
ប្រកាសព័ត៌មានដដែលបានដកស្រង់សំដីនាយកប្រត្តិ CCIM លោក ប៉ា ងួនទៀង មកចុះផ្សាយថា ស្ថាប័ននេះនឹងប្តឹងឧទ្ធរណ៍ ជំរុញឲ្យបើកការស៊ើបអង្កេតពេញដ៏័ពេញលេញមួយ ករណីអាជ្ញាធរវាយអ្នកសារព័ត៌មាននេះ ដោយអះអាងថា ជនណាម្នាក់ត្រូវតែចាប់អោយទទួលខុសត្រូវលើការវាយប្រហារនេះ និងជាការផ្ញើសារថា ការបំបិទមាត់អ្នកការសែតតាមរយៈហិង្សាជារឿងមិនអាចទទួលយកបានឡើយ ។ ហើយអ្នកដែលព្យាយាមធ្វើដូច្នេះត្រូវទទួលខុសត្រូវមុខច្បាប់ ។
មេធាវីរបស់ CCIM លោក សេក សោភ័ណ ត្រូវបានដកស្រង់សំដីមកចុះផ្សាយដែរថា តុលាការគួផ្តល់ដំណឹងក្នុងរយៈពេលពីរខែ ថាតើពួកគេបន្តនីតិវិធីក្នុងការចោទប្រកាន់ឬក៏យ៉ាងណា ប៉ុន្តែករណីនេះ វាមានរយៈជិតប្រាំពីរខែហើយ ។ ម្យាងវិញទៀតមេធាវីរូបនោះយល់ថា សេចក្តីជូនដំណឹងរបស់ព្រះរាជអាជ្ញា មិនបានផ្តល់ហេតុផលច្បាស់លាស់ពីមូលហេតុដែលធ្វើឲ្យរឿងក្តីនេះត្រូវតម្កល់មិនចាត់ការទេ ។
ព្រះរាជអាជ្ញារងអមសាលាដំបូង លោក មាស ច័ន្ទពិសិដ្ឋ ប្រាប់ VOD ដោយខ្លីថា លោកគ្មានពេលបកស្រាយបន្ថែម លើសពីអ្វី ដែលលោកបានជូនដំណឹងជាផ្លូវការទៅCCIMទេ ។ លោកថា «លោកមកមើលទៅ សំណុំរឿងមិនចាត់ការហ្នឹង ខ្ញុំយល់ឃើញហើយៗ ។ ខ្ញុំអត់ដឹងទេ ខ្ញុំអត់មានអីត្រូវឆ្លើយប្រាប់ព័ត៌មានអ៊ីចឹងទេ» ។
នាយកវិទ្យាស្ថានកម្ពុជាសម្រាប់សិក្សាផ្នែកព័ត៌មាន លោក មឿន ឈាន ណារិទ្ធិ សោកស្តាយករណីតុលាការមិនចាត់ការលើជនដែលពាក់ព័ន្ធលើការវាយអ្នកសារព័ត៌មាននេះ ដោយលោកយល់ថាវាជាសញ្ញាគ្រោះ ថ្នាក់សម្រាប់អ្នកសារព័ត៌ដទៃទៅថ្ងៃអនាគត ។ លោកបញ្ជាក់ថា «ខ្ញុំគិតថា កាលដែលតុលាការ មិនចាត់ការទៅលើពាក្យបណ្តឹងចំពោះការវាយប្រហារទៅលើអ្នកសារព័ត៌មានណាម្នាក់នោះ វានឹងជះឥទ្ធិពលអាក្រក់ចំពោះបរិយាកាស នៃសេរីភាពសារព័ត៌មាននៅក្នុងប្រទេសកម្ពុជា ហើយវានឹងជំរុញឲ្យវប្បធម៌និទណ្ឌភាព ចេះតែបន្តទៅមុខទៀតនៅក្នុងប្រទេសកម្ពុជាយើង» ។
លោក មឿន ឈាន ណារិទ្ធិ ជំរុញឲ្យឧត្តមក្រុមប្រឹក្សានៃអង្គចៅក្រមពិនិត្យមើលឡើងវិញ ពីវិជ្ជាជីវៈព្រះរាជអាជ្ញា និងចៅក្រមដើម្បីធានាពីសេរីភាពរបស់អ្នកសារព័ត៌មាន ស្របពេលដែលរដ្ឋធម្មនុញ្ញចែងថា កម្ពុជាប្រកាន់លិទ្ធិប្រជាធិបតេយ្យ ។
លោក ឡាយ សាមាន ត្រូវសន្តិសុខខណ្ឌដូនពេញ មានគ្នាប្រមាណពី៦ទៅ១០នាក់ ប្រដាប់ដោយដំបង ព្រួតគ្នាវាយរហូតសន្លប់នៅនឹងកន្លែង កាលពីថ្ងៃទី២ ខែឧសភា ឆ្នាំ២០១៤ ពេលអ្នកសារព័ត៌មានរូបនោះ តាមផ្តិតយកព្រឹត្តិការណ៍បង្ក្រាបរបស់សន្តិសុខខណ្ឌដូនពេញ ទៅលើអ្នកតវ៉ានៅជិតទីលានប្រជាធិបតេយ្យ ៕
សូមសរសេរមកលោក ញឹម សុខន តាមរយៈ sokhorn@vodhotnews.com