ដោយ សូត សុខប្រាថ្នា
2014-12-18
RFA
កម្មកររោងចក្រស្បែកជើង ជូហួយ (JUHUI) ឈរមុខមន្ទីរការងារ ខេត្តកំពង់ចាម ដើម្បីឱ្យខាងមន្ទីរជួយដោះស្រាយបញ្ហារបស់ពួកគាត់ កាលពីព្រឹកថ្ងៃទី១ ខែតុលា ឆ្នាំ២០១៤។ RFA/Saut Sokprathna
សមាជិកសហជីពស៊ីខៅឌូ (CCAWDU) ឲ្យដឹងថា ការដោះស្រាយបញ្ហាការងារនៅក្នុងរោងចក្រស្បែកជើងជូហួយ (JUHUI) នៅខេត្តកំពង់ចាម ដែលកើតឡើងកន្លងមកនោះ គឺជារឿងមួយមិនអាចទទួលយកបាន។
លើសពីនេះ វាជារឿងអយុត្តិធម៌សម្រាប់កម្មករជាច្រើនរយនាក់ ដែលព្រមទទួលយកដំណោះស្រាយមួយដែលមិនស្របច្បាប់។ ចំណែកខាងតំណាងរោងចក្រយល់ថា ការលើកឡើងយ៉ាងណានោះ គឺជាសិទ្ធិរបស់សហជីព ប៉ុន្តែស្ថានភាពការងារនៅក្នុងរោងចក្រមិនមានអ្វីចោទជាបញ្ហាទៀតទេ។
ភាគីរោងចក្រស្បែកជើងជូហួយ នៅខេត្តកំពង់ចាម អះអាងថា ស្ថានភាពនៅក្នុងរោងចក្ររបស់ខ្លួនបានស្ងប់ស្ងាត់ទៅវិញហើយ ប៉ុន្តែនៅមានកម្មករ និងសហជីពជាច្រើនយល់ថា បញ្ហានៅរោងចក្រមិនទាន់ស្ងប់ស្ងាត់ទេ ពីព្រោះថា ការដោះស្រាយបញ្ហាកន្លងមក គឺជារឿងមួយមិនត្រឹមត្រូវ។
បន្ថែមពីលើនេះទៀត មានកម្មករ និងសហជីពមួយចំនួន គឺជាប់ក្នុងពាក្យបណ្ដឹងរបស់ក្រុមហ៊ុននៅឡើយ និងត្រូវតុលាការកោះហៅឲ្យចូលបំភ្លឺជាបន្តបន្ទាប់។
អគ្គលេខាសម្ព័ន្ធសហជីពស៊ីខៅឌូ លោក ឯក សុភក្តី មានប្រសាសន៍ថា ខាងភាគីរោងចក្រមិនមានចេតនាដោះស្រាយបញ្ហាការងារជូនកម្មករនោះទេ ក្រៅតែពីយកប្រព័ន្ធតុលាការមកប្រើប្រាស់នោះ។ លោកបន្តថា មកដល់ពេលនេះ មានកម្មករប្រមាណ ២០០នាក់ មិនព្រមទទួលយកសំណងពីរោងចក្រ ដោយបង្ខំចិត្តទៅធ្វើការនៅរោងចក្រផ្សេង ពីព្រោះពួកគាត់យល់ថាជាការបញ្ឈប់មួយដែលមិនស្របតាមច្បាប់ការងារ។ លើសពីនេះ គឺជារឿងអយុត្តិធម៌សម្រាប់កម្មករប្រមាណ ២ពាន់នាក់ ដែលព្រមចូលធ្វើការជាកម្មករថ្មីនោះ៖ «ហេតុអីបានខ្ញុំថាជាង ២ពាន់នាក់ជាងហ្នឹង ព្រោះគាត់ឈប់ទៅដោយអយុត្តិធម៌ គាត់ទទួលលុយគេទៅដោយអយុត្តិធម៌»។
លោក ឯក សុភក្តី បន្តថា ភាគីរោងចក្រនៅតែបន្តដាក់ពាក្យបណ្ដឹងមកតុលាការ ស្របពេលការប្រជុំពិភាក្សាគ្នាកន្លងមក ថាមិនឲ្យប្តឹងផ្តល់គ្នាទៀតនោះទេ។ ដោយឡែកការកោះហៅកម្មករ និងសហជីពស៊ីខៅឌូ ជាង ១០នាក់ ឲ្យចូលបំភ្លឺនៅតុលាការនៅថ្ងៃទី១៦ និងថ្ងៃទី១៧ ធ្នូ លោកយល់ថា តុលាការធ្វើតាមនីតិវិធីនៃពាក្យបណ្ដឹង ក៏ប៉ុន្តែវាជាសញ្ញាមួយបង្ហាញពីការបំបាក់ស្មារតីក្រុមកម្មករតែប៉ុណ្ណោះ និងម្យ៉ាងបញ្ជាក់ថា តុលាការមិនបានការពារផលប្រយោជន៍ជូនប្រជាពលរដ្ឋ ឬកម្មករនោះទេ។
ឆ្លើយតបការលើកឡើងនេះ ប្រធានផ្នែករដ្ឋបាលរោងចក្រជូហួយ លោក តេង សម្បត្តិ មានប្រសាសន៍ថា ការចោទប្រកាន់ ឬការលើកឡើងយ៉ាងណានោះ គឺជាសិទ្ធិរបស់គេ ពីព្រោះកម្មករប្រមាណ ៣ពាន់នាក់ នាំគ្នាចូលធ្វើការដូចធម្មតាវិញហើយ។ លោកបន្តថា មិនមានកម្មករណាមិនពេញចិត្តចំពោះការដោះស្រាយបញ្ហាការងារកន្លងមកនោះទេ ចំណែកពាក្យបណ្ដឹងយ៉ាងណានោះ គឺខាងមេធាវីលោកជាអ្នកទទួលខុសត្រូវ៖ «ខ្ញុំប្រាប់បងថារឿងហ្នឹងវាផុតដៃខ្ញុំហើយ គឺទីប្រឹក្សា ឬមេធាវីគេចាត់ចែងរឿងហ្នឹង ខ្ញុំអត់បានទទួលព័ត៌មានច្បាស់ដែរ»។
យ៉ាងណា មេធាវីការពារក្តីឲ្យកម្មករ និងសហជីពទាំងនោះ គឺលោក គីម សុជាតិ ឲ្យដឹងថា ភាគីរោងចក្របានប្ដឹងកូនក្តីលោកជាង ១០នាក់ ទាក់ទងបទល្មើសបីផ្សេងគ្នា។ ក្នុងនោះ ភាគីរោងចក្រប្ដឹងមនុស្ស ១២នាក់ ពីបទមិនបានគោរពតាមសាលដីការក្សាការពាររបស់តុលាការ ដែលតម្រូវឲ្យកម្មករចូលធ្វើការរយៈពេល ៤៨ម៉ោងកាលពីខែកញ្ញា។ ចំណែក ១៥នាក់ទៀត គឺត្រូវ លោក តេង សម្បត្តិ ប្ដឹងពីបទញុះញង់កម្មករឲ្យប្រព្រឹត្តអំពើហិង្សាកាលពីថ្ងៃទី៦ តុលា។ រីឯ ៤នាក់ដែលមានឈ្មោះជាប់ក្នុងពាក្យបណ្ដឹងមុនៗនោះ ក៏ត្រូវតុលាការចេញដីកាកោះហៅឲ្យចូលបំភ្លឺនៅតុលាការ ពាក់ព័ន្ធនឹងរឿងផ្ដើមគំនិតគាំទ្រឲ្យមានអំពើហិង្សាកាលពីថ្ងៃទី២៥ តុលា។
លោក សុជាតិ ឲ្យដឹងទៀតថា កូនក្តីលោកបានចូលបំភ្លឺចំនួនពីរថ្ងៃមកហើយ ប៉ុន្តែនៅ ២នាក់ទៀតមិនទាន់សាកសួរទេ ដោយត្រូវលើកទៅថ្ងៃក្រោយ។ លោកយល់ថា បណ្ដឹងរបស់ភាគីរោងចក្រ និងការកោះហៅកម្មករ រួមនឹងសហជីពនេះ គឺជាការគំរាមកំហែងសិទ្ធិសេរីភាពពីសំណាក់ក្រុមហ៊ុនទៅលើកម្មករ ដើម្បីចាប់បង្ខំឲ្យខាងពួកគាត់ព្រមទទួលយកដំណោះស្រាយមួយ ដោយគ្មានវត្តមានសហជីព។ បន្ថែមពីនេះទៀត លោកថា គឺជាពាក្យបណ្ដឹងមួយដែលគ្មានទឡ្ហីករណ៍ច្បាស់លាស់៖ «ចំពោះពាក្យបណ្ដឹងថាមិនគោរពតាមសាលដីកាតុលាការនោះ គឺគាត់បានអនុវត្តហើយ គឺគាត់បានចូលហើយ។ ប៉ុន្តែពេលកម្មករចូលទៅនោះ គាត់មានការខឹងសម្បារជាមួយក្រុមហ៊ុន ប៉ុន្តែគាត់មិនបានរកដំណោះស្រាយ»។
លោកបន្ថែមថា លោកនឹងប្រមូលភស្តុតាង ឬសាក្សីដែលដឹងពីវិវាទការងារនៅក្នុងរោងចក្រជូហួយ បន្ថែមទៀតដាក់ជូនទៅព្រះរាជអាជ្ញា សម្រាប់ជាមូលដ្ឋានដើម្បីកុំឲ្យចោទប្រកាន់កូនក្តីលោកទាំងនោះ។
ប្រធានសហជីពស៊ីខៅឌូ ប្រចាំរោងចក្រជូហួយ លោក ហ៊ិត ហ៊ុន ដែលបានចូលបំភ្លឺតាមដីកាកោះហៅរបស់តុលាការនោះបញ្ជាក់ថា ការចោទប្រកាន់ទាំងប៉ុន្មាន លោក និងកម្មករផ្សេងទៀត មិនអាចទទួលយកបានឡើយ។ លោកយល់ថា ការប្ដឹងពួកលោកដោយចោទប្រកាន់ពីបទផ្សេងៗ គឺប្រៀបដូចកំពុងបំបិទសិទ្ធិសេរីភាពពួកគាត់យ៉ាងនោះឯង ពីព្រោះរាល់សកម្មភាពទាំងអស់របស់ពួកគាត់ គឺស្ថិតនៅក្រោមការត្រួតពិនិត្យរបស់តុលាការ និងអាជ្ញាធររហូត។ ទោះបីជាយ៉ាងណាក៏ដោយ ខាងសម្ព័ន្ធសហជីពស៊ីខៅឌូ ថានឹងដោះស្រាយបញ្ហាទាំងនេះតាមផ្លូវតុលាការ ហើយគ្រោងនឹងប្ដឹងទៅសហគមន៍អន្តរជាតិ ចំពោះសកម្មភាពរបស់ភាគីរោងចក្រ រួមនឹងអាជ្ញាធរពាក់ព័ន្ធដែលចូលរួមរំលោភសិទ្ធិកម្មករនាពេលកន្លងមកនោះ៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
- មូលហេតុដែលលោក ហ៊ុន សែន ស្នើឲ្យកូរ៉េបង្កើនទទួលពលករពីកម្ពុជា
- នាយករដ្ឋមន្ត្រីខ្មែរស្នើឲ្យកូរ៉េបង្កើនចំនួនពលករខ្មែរទៅធ្វើការនៅប្រទេសខ្លួន
- ពលករខ្មែរ៣នាក់ស្លាប់នៅប្រទេសថៃដោយគ្រោះថ្នាក់ផ្សេងៗពីគ្នា
- មន្ត្រីសហជីពនិងក្រសួងការងារជួបពិភាក្សាអំពីលក្ខខណ្ឌការងារកម្មករ
- មន្ត្រីទូតខ្មែរ៖ បាតុកម្មរបស់ពលរដ្ឋខ្មែរនៅកូរ៉េជាចេតនាបង្ខូចកេរ្តិ៍ឈ្មោះរដ្ឋាភិបាល
- កម្មកររោងចក្រនូវខបតវ៉ាបិទផ្លូវទាមទារការដោះស្រាយពីអាជ្ញាធរពាក់ព័ន្ធ
- ពលករចោទប៉ូលិសធ្វើប័ណ្ណឆ្លងដែននៅប៉ោយប៉ែតថាប្រព្រឹត្តអំពើពុករលួយ
- បុគ្គលិកកម្មករព្រលានយន្តហោះខេត្តសៀមរាបបន្តធ្វើកូដកម្មទាមទារលក្ខខណ្ឌការងារ
- កម្មកររោងចក្រកាត់ដេរនៅតាកែវជាង២០នាក់សន្លប់