ដោយ ដែន អយុធ្យា
2016-12-03
RFA
ក្មេងរងរបួសដោយសារការបាញ់កាំជ្រួចនៅឆ្នេរអូរឈើទាល ខេត្តព្រះសីហនុ កាលពីថ្ងៃទី២ ខែធ្នូ ឆ្នាំ២០១៦។ Photo provided
ភ្ញៀវទេសចរជាតិ-អន្តរជាតិ ដែលបានចូលទៅកម្សាន្តតាមតំបន់ឆ្នេរនានា នៅខេត្តព្រះសីហនុ បានរិះគន់រដ្ឋបាលខេត្តនេះ ដែលអនុញ្ញាតឲ្យមានការដុតកាំជ្រួចនៅតាមតំបន់ឆ្នេរនៅពេលរាត្រី ហើយតែងបង្កឲ្យមនុស្សរងរបួស បណ្ដាលមកពីការបាញ់កាំជ្រួចខុសបច្ចេកទេស។ ទាំងមន្ត្រីសង្គមស៊ីវិល និងប្រតិបត្តិករទេសចរណ៍ប្រចាំខេត្តនេះ ក៏មិនពេញចិត្តចំពោះសកម្មភាពដុតកាំជ្រួចនេះដែរ ហើយសំណូមដល់អភិបាលខេត្តនេះឲ្យបញ្ឈប់ជាបន្ទាន់។
ប្រតិបត្តិករទេសចរណ៍ និងភ្ញៀវទេសចរជាតិ អន្តរជាតិ លើកឡើងថា ការដុតកាំជ្រួចនៅតាមឆ្នេរតែងបង្កឲ្យមានការភ្ញាក់ផ្អើល ប៉ះពាល់ដល់ម្ហូបអាហារ និងបង្កឲ្យមានគ្រោះថ្នាក់ដល់មនុស្សពេលកាំជ្រួចផ្ទុះខុសបច្ចេកទេស។
ពួកគេស្នើដល់អភិបាលខេត្តព្រះសីហនុ លោក យន្ត មីន និងស្ថាប័នពាក់ព័ន្ធដទៃទៀត ត្រូវបញ្ឈប់លែងឲ្យមានការដុតកាំជ្រួចនៅពេលរាត្រីតាមឆ្នេរនានា ពិសេសឆ្នេរអូរឈើទាល តទៅទៀត៖ «អាជ្ញាធរខេត្តមិនគួរឲ្យសមត្ថកិច្ចដើរចាប់មុខចាប់ក្រោយទៅលើអ្នកលក់កាំជ្រួច និងដុតកាំជ្រួចនៅតាមឆ្នេរសមុទ្រនានា ដូចរាល់ថ្ងៃនេះទៀតទេ គឺគួរតែដាក់ជាស្លាកសញ្ញាទាក់ទងការលក់ ឬការបាញ់កាំជ្រួច ឲ្យភ្ញៀវបានដឹងអំពីការផាកពិន័យចំពោះអ្នកលក់ និងអ្នកបាញ់កាំជ្រួច ដែលបានធ្វើឲ្យប៉ះពាល់ដល់អារម្មណ៍របស់ភ្ញៀវទេសចររាល់ថ្ងៃនេះ។ នៅពេលមានពិធីបុណ្យធំៗ ដូចជាបុណ្យឆ្លងឆ្នាំសកលជាដើម គឺការដុតកាំជ្រួចតែងបង្កឲ្យមានការឆេះរោង ឬតូបលក់ដូររបស់ក្រុមអាជីវករនៅតាមឆ្នេរអូរឈើទាល បង្កឲ្យមនុស្សរងរបួស និងប៉ះពាល់ដល់ការទទួលទានចំណីអាហារ ពិសេសបង្កឲ្យមានការភ័យខ្លាចដល់ភ្ញៀវទេសចរជាដើម»។
កាលពីរាត្រីថ្ងៃសុក្រ ទី២ ខែធ្នូ ឆ្នាំ២០១៦ ការដុតកាំជ្រួចកម្សាន្តនៅតាមឆ្នេរអូរឈើទាល ខុសបច្ចេកទេសនេះ បានបណ្ដាលឲ្យមនុស្សក្មេងចាស់ចំនួន ៣នាក់ ជាភ្ញៀវទេសចរមកពីខេត្តកំពត និងរាជធានីភ្នំពេញ រងរបួសធ្ងន់ស្រាលត្រូវបញ្ជូនទៅសង្គ្រោះបន្ទាន់នៅមន្ទីរពេទ្យ។
ចំណែកអ្នកសម្របសម្រួលអង្គការលីកាដូ (LICADHO) ប្រចាំខេត្តព្រះសីហនុ លោក ប៊ួន ណារិទ្ធិ ក៏ស្នើដល់អភិបាលខេត្ត និងស្នងការនគរបាលខេត្តនេះ ឲ្យពិចារណាបញ្ឈប់សកម្មភាពដុត ឬបាញ់កាំជ្រួចនៅតាមឆ្នេរនេះដែរ។
អ្នកឃ្លាំមើលសង្គមរូបនេះ ចាត់ទុកការអនុញ្ញាតឲ្យមានសកម្មភាពបាញ់កាំជ្រួចនៅពេលរាត្រី តាមឆ្នេរនានា នៅខេត្តព្រះសីហនុ មានឆ្នេរអូរឈើទាល ជាដើម ថាជាផ្នែកមួយបង្កើតឲ្យមានអសុវត្ថិភាពដល់ភ្ញៀវទេសចរចូលមកទស្សនាខេត្តនេះ៖ «នៅតាមតំបន់ឆ្នេរសមុទ្រយើងនេះ គឺកន្លងមកយើងធ្លាប់ឃើញសកម្មភាពបាញ់កាំជ្រួចនេះ បានបណ្ដាលឲ្យឆេះតូបលក់ដូររបស់ក្រុមអាជីវករ និងខ្លះទៀតការបាញ់កាំជ្រួចនេះ បានបង្កឲ្យមានរងរបួសដល់ភ្ញៀវទេសចរ ដែលចូលទៅកម្សាន្តតាមឆ្នេរនៅជិតខាងអ្នកដុតកាំជ្រួចនោះ។ ជាងនេះចំហាយរំសេវ ដែលសាយភាយចេញពីការបាញ់កាំជ្រួចនោះ បានធ្លាក់មកលើចំណីអាហាររបស់ភ្ញៀវ ដែលអង្គុយពិសាអាហារនៅតាមតំបន់ឆ្នេរ។ ដោយឡែកចំពោះការបាញ់កាំជ្រួច នាំឲ្យរងរបួសប្រជាពលរដ្ឋខ្មែរចំនួន ៣នាក់ កាលពីរាត្រីថ្ងៃទី២ ខែធ្នូ ខ្ញុំយល់ឃើញថា គឺជាការធ្វេសប្រហែស ឬជាការគ្រប់គ្រង មិនបានដិតដល់ទៅលើបម្រាមហាមឃាត់ការគ្រប់គ្រងគ្រឿងផ្ទុះនៅតាមតំបន់ឆ្នេរ របស់អាជ្ញាធរ»។
មិនទាន់មានអត្ថាធិប្បាយបែបណាពីលោក យន្ត មីន អភិបាលខេត្តខេត្តព្រះសីហនុ និងលោក ជួន ណារិន្ទ ស្នងការនគរបាលខេត្តនេះ ទាក់ទងការបាញ់កាំជ្រួចតាមឆ្នេរបង្កឲ្យមានមនុស្សរងរបួសនេះទេ នៅថ្ងៃសៅរ៍ ទី៣ ខែធ្នូ។ ប៉ុន្តែបញ្ហានេះកន្លងមក អភិបាលក្រុងព្រះសីហនុ លោក អ៊ី សុឡេង ធ្លាប់បានលើកសំណើជូនថ្នាក់លើឲ្យបញ្ឈប់សកម្មភាពបាញ់កាំជ្រួច នៅតាមយប់តាមឆ្នេរសមុទ្រនានា ហើយត្រៀមទីតាំងផ្សេងដាច់ដោយឡែកដើម្បីទុកឲ្យភ្ញៀវទេសចរ ដែលចង់ទៅបាញ់កាំជ្រួចកម្សាន្ត និងមិនប៉ះពាល់ដល់អ្នកដទៃ ដើម្បីបញ្ចៀសគ្រោះថ្នាក់ផ្សេងៗដល់ភ្ញៀវទេសចរ។ ប៉ុន្តែមកដល់ពេលនេះ សកម្មភាពបាញ់កាំជ្រួច នៅតាមឆ្នេរសមុទ្រនៅពេលរាត្រី នៅតែបន្តកើតមាន និងបង្កឲ្យមានគ្រោះថ្នាក់ជាបន្តបន្ទាប់។
កម្លាំងនគរបាលមូលដ្ឋានប្រចាំការនៅតាមតំបន់ឆ្នេរអូរឈើទាល បានឲ្យដឹងថា កាំជ្រួចដែលដុតផ្ទុះខុសបច្ចេកទេស ហើយតែបង្កគ្រោះថ្នាក់នៅពេលកន្លងមក គឺមួយផ្នែកត្រូវភ្ញៀវទិញពីអាជីវករដើរលក់នៅតាមឆ្នេរ និងមួយចំនួនទៀត ត្រូវភ្ញៀវទេសចរនាំយកតាមរថយន្តពីតំបន់ផ្សេងៗ និងបានដុតកម្សាន្តពេលរាត្រីតាមឆ្នេរនានា មានឆ្នេរអូរឈើទាល ជាដើម។
កម្លាំងនគរបាលមួយចំនួនដែលប្រចាំការនៅតាមតំបន់ឆ្នេរអូរឈើទាល ក៏ចង់ឲ្យរដ្ឋបាលខេត្តព្រះសីហនុ ចេញបទបញ្ជា មិនឲ្យមានលក់កាំជ្រួច និងបាញ់កាំជ្រួច នៅតាមតំបន់ឆ្នេរនៅពេលរាត្រីនេះដែរ ព្រោះតែងបង្កឲ្យមនុស្សរងរបួស ឬគ្រោះថ្នាក់ និងប៉ះពាល់ដល់អារម្មណ៍ភ្ញៀវទេសចរចូលមកកម្សាន្តតំបន់ឆ្នេរភាគច្រើន៕
កំណត់ចំណាំចំពោះអ្នកបញ្ចូលមតិនៅក្នុងអត្ថបទនេះ៖ ដើម្បីរក្សាសេចក្ដីថ្លៃថ្នូរ យើងខ្ញុំនឹងផ្សាយតែមតិណា ដែលមិនជេរប្រមាថដល់អ្នកដទៃប៉ុណ្ណោះ។
អត្ថបទដែលទាក់ទង
-
ទេសចរជិត៩ម៉ឺននាក់ទៅទស្សនាខេត្តព្រះសីហនុក្នុងអំឡុងពេលបុណ្យអុំទូក
-
អ្នកទេសចរជិត១ម៉ឺននាក់ទៅកម្សាន្តនៅខេត្តរតនគិរីក្នុងពិធីបុណ្យអុំទូក
-
ភ្ញៀវទេសចរប្រមាណ១១ម៉ឺននាក់ទៅលេងខេត្តសៀមរាបអំឡុង៣ថ្ងៃនៃបុណ្យអុំទូក
-
អាជ្ញាធរខេត្តព្រះសីហនុពង្រឹងជំនាញដល់ឆ្មាំសមុទ្រក្នុងការជួយសង្គ្រោះអ្នកលង់ទឹក
-
អង្គការពីរជួយស្រុកបន្ទាយស្រីឲ្យក្លាយជាតំបន់អភិវឌ្ឍន៍សេដ្ឋកិច្ចតាមរយៈវិស័យទេសចរណ៍
-
បុណ្យសមុទ្រឆ្នាំ២០១៦នឹងត្រូវធ្វើនៅខេត្តព្រះសីហនុរយៈពេល៣ថ្ងៃចាប់ពីថ្ងៃទី២៣-២៥ធ្នូ
-
អាជ្ញាធរអប្សរាចុះហត្ថលេខាបង្កើនសម្ព័ន្ធមេត្រីភាពជាមួយគណៈកម្មការគ្រប់គ្រងទេសភាពចិន
-
សង្គមស៊ីវិលនិងអាជ្ញាធរស្វាគមន៍ការបញ្ចុះតម្លៃសំបុត្រទូកទេសចរណ៍ទៅកម្សាន្តតាមកោះ
-
អាជីវករខេត្តព្រះសីហនុត្អូញត្អែរថាភ្ញៀវទេសចរថយចុះក្នុងអំឡុងពេលបុណ្យភ្ជុំបិណ្ឌបីថ្ងៃ
-
ភ្ញៀវទេសចរទៅកម្សាន្តខេត្តស្ទឹងត្រែងនៅរដូវបុណ្យភ្ជុំបិណ្ឌឆ្នាំនេះកើនឡើង