ដោយ អាស៊ីសេរី
2018-01-11
មេបញ្ជាការនៃបញ្ជាការដ្ឋានអង្គរក្ស លោក ហ៊ីង ប៊ុនហៀង ថ្លែងក្នុងពិធីខួបឆ្នាំទី៨ នៃប្រកាសបង្កើតបញ្ជាការដ្ឋានអង្គរក្ស នៅក្រុងតាខ្មៅ ខេត្តកណ្ដាល ថ្ងៃទី៤ ខែកញ្ញា ឆ្នាំ២០១៦។ Photo: RFA
តំណាងប្រជាពលរដ្ឋមកពីស្រុករវៀង ខេត្តព្រះវិហារ ចំនួន ៥៦គ្រួសារ គ្រោងដាក់ញត្តិសុំអន្តរាគមន៍ពីក្រសួងដែនដី ក្នុងរឿងដីដែលអាជ្ញាធរឃុបឃិតជាមួយក្រុមហ៊ុន ដែលពាក់ព័ន្ធអ្នកមានអំណាចជាខ្នងបង្អែក។
ពលរដ្ឋរស់នៅក្រុមទី៦ រំដេង ភូមិត្រពាំងទន្ទឹម ឃុំរម្យទម ស្រុករវៀង លោក ទុយ ឆេង ថ្លែងថា នៅថ្ងៃទី១២ មករា អ្នកភូមិចំនួន ៥នាក់ នឹងទៅក្រសួងដែនដីនគរូបនីយកម្ម និងសំណង់ ដើម្បីស្វែងរកកិច្ចអន្តរាគមន៍ពីបញ្ហាដីធ្លីរបស់ពួកគាត់ ដែលក្រុមហ៊ុន ដែលខម កម្ពុជា (Delcom Cambodia) រំលោភយកតាំងពីឆ្នាំ២០០២ មក ដោយមានការគាំទ្រពីអាជ្ញាធរមូលដ្ឋាន ហើយក្រុមហ៊ុននេះមានលោក ហ៊ីង ប៊ុនហៀង ដែលជាអគ្គបញ្ជាការរងនៃទីបញ្ជាការដ្ឋានកងអង្គរក្ស ជាខ្នងបង្អែកថែមទៀត។
លោកបន្តថា កាលពីខែកក្កដា ឆ្នាំ២០១៦ អាជ្ញាធរភូមិឃុំ បានឲ្យប្រជាពលរដ្ឋធ្វើកិច្ចសន្យា ដើម្បីមានសិទ្ធិកាន់កាប់ដីធ្លីច្បាស់លាស់តែផ្ទុយទៅវិញ នៅពេលពលរដ្ឋផ្ដិតមេដៃហើយ បែរជាចោទថា ពលរដ្ឋរស់នៅលើដីក្រុមហ៊ុនទៅវិញ។ បញ្ហានេះលោកថា ប្រៀបបានពលរដ្ឋចាញ់បោកអាជ្ញាធរ៖ «បានថាចាញ់បោកហ្នឹងប្រជាពលរដ្ឋអ្នកមិនយល់ដឹងហើយគាត់ ខ្លាចការគំរាមកំហែងរបស់អ្នកមានអំណាចផងម្យ៉ាងទៀត គាត់អ្នកល្ងង់ខ្លៅផងគេអានប្រាប់ដំបូងហ្នឹងឯងថា ធ្វើកិច្ចសន្យាថា អត់មានដីក្រុមហ៊ុនដីអីទេ គេថាដីប្រជាពលរដ្ឋតែផ្ទុយទៅវិញ នៅពេលធ្វើបានហើយប្រជាពលរដ្ឋផ្ដិតមេដៃលើឯកសារហ្នឹងហើយដល់ពេលយកមកឲ្យឃុំវាយត្រា គេកែពាក្យប្រជាពលរដ្ឋរស់នៅលើដីក្រុមហ៊ុនមួយកន្លែងទៅវិញ គេចោទប្រកាន់ថា គេបានអានឲ្យស្ដាប់ហើយតើម៉េចមិនតវ៉ា តែតាមការពិតអត់មានពាក្យរស់នៅលើដីក្រុមហ៊ុនផង តែពួកអស់នេះគេយកខ្នង ហ៊ីង ប៊ុនហៀង ទៅផ្អែក»។
ប្រភពដដែលអះអាងថា ពួកគាត់ចំនួន ៥៦គ្រួសាររស់នៅលើដីទំនាស់ តាំងពី១៩៩៧មក មានឯកសារកាន់កាប់ដីធ្លី និងអាជ្ញាធរទទួលស្គាល់ត្រឹមត្រូវ។
ប៉ុន្តែចាប់តាំងពីឆ្នាំ២០០២មក ក្រុមហ៊ុនបានព័ទ្ធរបងការដ្ឋានរំលោភយកដីចម្ការអ្នកភូមិអស់ចំនួន ១២៧ហិកតារ ពោលគឺនៅសល់តែ ២០ហិកតារទៀតប៉ុណ្ណោះ ដែលពួកគាត់នៅបង្កបង្កើនផលបាន។ បញ្ហានេះបានអូសបន្លាយជាច្រើនឆ្នាំ ហើយមានការប៉ះទង្គិចរវាងក្រុមហ៊ុន និងពលរដ្ឋជាច្រើនដង នៅពេលដែលពលរដ្ឋចូលទៅធ្វើចម្ការ ដោយសារខ្វះខាតបញ្ហាជីវភាព។ ចំណែកអាជ្ញាធរវិញ បានដាក់កម្លាំងសមត្ថកិច្ចការពារខាងក្រុមហ៊ុន និងគំរាមកំហែងពលរដ្ឋថែមទៀត៕