ដោយ ជាតិ ចំណាន
2018-12-06
RFA
អ្នកនាំពាក្យនៃទីស្ដីការរដ្ឋមន្ត្រី លោក ផៃ ស៊ីផាន ថ្លែងក្នុងសន្និសីទកាសែតនាទីស្ដីការគណៈរដ្ឋមន្ត្រី នៅថ្ងៃទី៤ ខែមេសា ឆ្នាំ២០១៤។ RFA
ទីស្ដីការគណៈរដ្ឋមន្ត្រី មិនទាន់ទទួលបានសំណើរបស់សហភាពសហជីពកម្ពុជា ករណីស្នើសុំបញ្ចូលឈ្មោះគ្រូបង្រៀនជាង១០នាក់ ដែលរដ្ឋមន្ត្រីក្រសួងអប់រំ លុបឈ្មោះចេញពីក្រសួង កាលពីខែមករា នៅឡើយទេ។ សហភាពសហជីពកម្ពុជា និងសមាគមគ្រូបង្រៀនឯករាជ្យ ទាមទារឲ្យមន្ត្រីខុទ្ទកាល័យ របស់ លោក ហ៊ុន សែន នៅទីស្ដីការគណៈរដ្ឋមន្ត្រី មានភាពទទួលខុសត្រូវ ព្រោះសហភាពសហជីព បានដាក់លិខិត២ថ្ងៃ ជាប់គ្នា និងរងការរុញឯកសារចេញច្រើនដង មិនព្រមទទួល។
ប្រធានសហភាពសហជីពកម្ពុជា លោក រ៉ុង ឈុន អះអាងថា បានយកលិខិត ទៅដាក់នៅខុទ្ទកាល័យ មេដឹកនាំរបបក្រុងភ្នំពេញ លោក ហ៊ុន សែន នៅទីស្ដីការគណៈរដ្ឋមន្ត្រី ២ថ្ងៃជាប់គ្នា គឺនៅថ្ងៃទី៤ និងទី៥ ធ្នូ ប៉ុន្តែមន្ត្រី ទទួលញត្តិ បានបង្កភាពស្មុគស្មាញខ្លាំង និងមិនព្រមទទួលសំណើទេ បើទោះជា សហភាពសហជីពបានថែមឯកសារ តាមតម្រូវការគ្រប់ចំនួន៖ «លិខិតហ្នឹង យើងចេញថ្ងៃ៤ ដាក់ថ្ងៃ៤ម្ដង។ ដាក់ថ្ងៃ៤ គេ (មន្ត្រីខុទ្ទកាល័យ នៅទីស្ដីការគណៈរដ្ឋមន្ត្រី) រុញមកវិញ ថា យើងអត់មានភ្ជាប់លិខិតយោងទៅ។ ដល់ពេលម្សិលមិញនេះ ថ្ងៃ៥ យើងកូពី (ថតចម្លង) លិខិតយោងអី អស់ហើយ ទៅដាក់ទៅ គេថា អត់ដែលបានឃើញលិខិតយោងនេះផង សុំភស្តុតាង។ ដល់ពេលអ៊ីចឹងទៅ យើងកូពី ស៊ីញេលិខិតក្នុងនាមសមាគម លិខិតហ្មងមក បានយើងយកទៅដាក់មួយសារទៀត។ ដល់ពេលដាក់មួយសារទៀត គេថា ចាំសួរ ឆ្លងយោបល់មេសិន…ដល់អ៊ីចឹងសហការីខ្ញុំ ទុកនៅលើតុហ្នឹងទៅ។…. អ៊ីចឹងផ្ញើសារតាមរយៈហ្នឹង ឲ្យនាយករដ្ឋមន្ត្រី ត្រូវមើលកូនចៅគាត់ផង ក្នុងការទទួលលិខិត»។
ក្នុងលិខិតសុំកិច្ចអន្តរាគមន៍ ពីលោក ហ៊ុន សែន ចុះថ្ងៃទី៤ ធ្នូ លោក រ៉ុង ឈុន បញ្ជក់ថា បុគ្គលិកអប់រំ ចំនួន១១នាក់ ដែលរងការលុបចេញពីក្រសួងអប់រំ កាលពីថ្ងៃទី៣០ មករា មិនបានប្រព្រឹត្តិកំហុសដូចការចោទប្រកាន់របស់ក្រសួងអប់រំទេ។ លោក ថា ការចោទប្រកាន់ទាំងនោះ ជារឿងអយុត្តិធម៌ និងរំលោភលើអនុក្រឹត្យ ស្ដីពីការស្ថិតនៅក្រៅក្របខ័ណ្ឌដើម និងច្បាប់ស្ដីពីសហ លក្ខន្តិកៈ មន្ត្រីរាជការស៊ីវិល ត្រង់មាត្រា ៤០ និងមាត្រា ៤៧។
កាលពីខែមករា ដើមឆ្នាំ២០១៨ រដ្ឋមន្ត្រីក្រសួងអប់រំ យុវជន និងកីឡា លោក ហង់ ជួនណារ៉ុន បានចេញប្រកាស លុបឈ្មោះបុគ្គលិកក្រសួងអប់រំយ៉ាងហោចណាស់ ១១នាក់ ចេញពីក្របខ័ណ្ឌក្រសួងអប់រំ ដោយលើកហេតុផលសាមីជនអវត្តមាន គ្មានច្បាប់អនុញ្ញាត។ បុគ្គលិកទាំងនោះ មានដូចជា លោក រ៉ុង ឈុន បុគ្គលិកនៅក្រសួងអប់រំ លោកគ្រូ ឌី លី អ្នកគ្រូ វង រុន្នី ជាគ្រូបង្រៀននៅខេត្តព្រះសីហនុ និងគ្រូបង្រៀន ជាច្រើននាក់ទៀត នៅខេត្តកំពង់ចាម ព្រៃវែង សៀមរាប កំពត និងបាត់ដំបង។
ប៉ុន្តែ សមាគមគ្រូបង្រៀនកម្ពុជាឯករាជ្យ ឲ្យដឹងថា បុគ្គលិកអប់រំទាំងនោះ សុទ្ធតែជាសមាជិករបស់សមាគម ហើយការបញ្ឈប់គ្រូបង្រៀនទាំងនោះ ជាការរើសអើង នយោបាយ ដោយសារ គ្រូបង្រៀនខ្លះ ជាសមាជិកគណគណៈកម្មាធិការជាតិរៀបចំការបោះឆ្នោត (គ.ជ.ប) និង គ្រូខ្លះទៀត ជាសមាជិកក្រុមប្រឹក្សាឃុំ ស្រុក ខេត្ត របស់គណបក្សសង្គ្រោះជាតិ ដែលមិនព្រមចុះចូលជាមួយគណបក្សកាន់អំណាច នៅពេលអាជ្ញាធររបបលោក ហ៊ុន សែន បង្ខំឲ្យសមាជិកក្រុមប្រឹក្សាបក្សប្រឆាំង ចុះចូល។
សមាគមគ្រូបង្រៀនកម្ពុជាឯករាជ្យ និងសហភាពសហជីពការងារ អះអាងថា លោកគ្រូ អ្នកគ្រូទាំងនោះ មិនបានប្រព្រឹត្តិខុសច្បាប់ ដូចការចោទប្រកាន់ទេ គឺ ពួកគាត់បានដាក់ច្បាប់ត្រឹមត្រូវ ដើម្បីទៅបំពេញ តួនាទី មួយរយៈជាក្រុមប្រឹក្សាខេត្ត ស្រុក ឃុំ ដែលស្របតាមច្បាប់អនុញ្ញាត។
លោក រ៉ុង ឈុន អះអាងថា ការស្នើសុំអន្តរាគមន៍ ពីលោក ហ៊ុន សែន នៅពេលនេះ ដោយសារ សង្កេតឃើញ របបក្រុងភ្នំពេញ និងរដ្ឋសភាឯកបក្សកំពុងពន្លឿនកែប្រែច្បាប់ បើកផ្លូវឲ្យមន្ត្រីបក្សប្រឆាំងចំនួន១១៨នាក់ ទទួលបានសិទ្ធិធ្វើនយោបាយវិញ លើកលែងការចោទប្រកាន់ មេដឹកនាំសហជីព និងការបន្ធូរបន្ថយភាពតានតឹងនយោបាយនៅកម្ពុជា។ ដូច្នេះក្រុមគ្រូបង្រៀនទាំង១១នាក់ ក៏រងគ្រោះ ដោយសារនយោបាយ ត្រូវតែទទួលបានយុត្តិធម៌មកវិញដែរ។
ប្រធានសមាគមគ្រូបង្រៀនឯករាជ្យកម្ពុជា អ្នកស្រី អ៊ុក ឆាយាវី ជំរុញឲ្យមេដឹកនាំរបបលោក ហ៊ុន សែន បញ្ជាឲ្យមន្ត្រីក្រោមឱវាទ ឲ្យមានភាពទទួលខុសត្រូវលើការទទួលញត្តិពលរដ្ឋ សមាគម និង សហជីព កុំឲ្យរុញច្រានការងារ និងបង្កភាពស្មុគស្មាញច្រើន ដល់អ្នកមានទុក្ខកង្វល់ ដែលបានទៅដាក់ញត្តិ។ សង្គមស៊ីវិលរូបនេះ សង្ឃឹមថា លោក ហ៊ុន សែន នឹងអន្តរាគមន៍ឲ្យគ្រូបង្រៀន បានត្រលប់មកចូលធ្វើការវិញ និងកំពុងត្រៀម លិខិតអមមួយច្បាប់ ដាក់ជូនក្រសួងអប់រំ យុវជន និងកីឡា ដូចគ្នា ដើម្បីពិចារណា លុបចោលប្រកាសក្រសួង បើកផ្លូវឲ្យគ្រូបង្រៀន ទាំងនោះ បានត្រលប់ចូលមកបំពេញតួនាទីវិញ៖ «នាយករដ្ឋមន្ត្រីកំពុងធ្វើការយ៉ាងណា ដើម្បីឲ្យសង្គមស៊ីវិល ក៏ដូចជាប្រជាពលរដ្ឋទាំងអស់ហ្នឹង ទុកចិត្ត ថា នាយករដ្ឋមន្ត្រីកំពុងតែយកចិត្តទុកដាក់ចំពោះគាត់។ ខ្ញុំសង្ឃឹមថា នាយករដ្ឋមន្ត្រីច្បាស់ជា បានលឺព័ត៌មាន ដែលពួកយើងកំពុងតែជជែកគ្នានេះ។ ចាស ដូច្នេះ សុំឲ្យនាយករដ្ឋមន្ត្រី ជួយអន្តរាគមន៍យ៉ាងណា ដើម្បីឲ្យលោកគ្រូ អ្នកគ្រូយើង (ចូលធ្វើការវិញ)។ ចាស គាត់អត់មានទោសទណ្ឌអ្វី ក្នុងការដែលក្រសួងអប់រំ លុបឈ្មោះគាត់ចេញពីក្របខ័ណ្ឌ ក្រសួងអប់រំទេ»។
អ្នកនាំពាក្យទីស្ដីការគណៈរដ្ឋមន្ត្រី លោក ផៃ ស៊ីផាន និង លោក ទិត សុធា ប្រាប់អាស៊ីសេរីថា មិនបានដឹង រឿងលិខិតរបស់សហភាពសហជីពកម្ពុជា ដាក់ជូនទីស្ដីការគណៈរដ្ឋមន្ត្រីទេ។
ប្រធានសហភាពសហជីពកម្ពុជា លោក រ៉ុង ឈុន ព្រមានថា ប្រសិនបើ មិនមានដំណោះស្រាយ ពី លោក ហ៊ុន សែន ទេ សហភាពសហជីពកម្ពុជា នឹងដាក់ពាក្យ ប្ដឹងទៅតុលាការ និងបន្តស្វែងរកកិច្ចអន្តរាគមន៍ ពីស្ថាប័នអប់រំអន្តរជាតិ ដើម្បីទាមទាររកយុត្តិធម៌មកវិញ៕